Read kinyarwanda Matayo 24 Bible Online

Matayo 24 - kinyarwanda bible

Matayo 24

¹Nuko Yezu ava mu Ngoro y'Imana, aragenda. Abigishwa be baramwegera, bamuratira uburyo iyo Ngoro yubakitse.

²Ariko arabasubiza, ati «Ntimubona ibi byose? Ndababwira ukuri, hano nta buye rizasigara rigeretse ku rindi ridashenywe.»

³Nuko amaze kwicara ku musozi w’Imizeti, abigishwa be baraza baramwegera, baramubaza biherereye, bati «Tubwire igihe ibyo bizabera[133], n’ikizaba ikimenyetso cy’ukuza kwawe n’icy’iherezo ry’isi.»

⁴Nuko Yezu arabasubiza ati «Muramenye ntihazagire ubayobya!

⁵Kuko hazaduka benshi biyita izina ryanjye, bavuga ngo ’Ni jyewe Kristu’, maze bakayobya benshi.

⁶Muzumva bavuga intambara, mwumve n’impuha zayo. Ariko ntimuzakuke umutima, kuko bigomba kuba; nyamara si byo herezo.

⁷Igihugu kizahagurukira ikindi, ingoma ishyamirane n’indi. Hirya no hino hazatera inzara n’imitingito y’isi.

⁸Ibyo byose bizamera nk’intangiriro y’ububabare bw’umugore wenda kubyara.

⁹Ubwo bazabagabiza ababababaza, bakanabica; muzangwa n’amahanga yose kubera izina ryanjye.

¹⁰Benshi bazaboneraho ibibagusha, maze bazasubiranemo bangane.

¹¹Hazaduka n’abahanurabinyoma batabarika, maze bayobye abantu benshi.

¹²Urukundo ruzacogora muri benshi kubera ko ubugome buzaba bwiganje.

¹³Ariko uzakomera kugeza ku ndunduro, uwo ni we uzarokoka.

¹⁴Iyi Nkuru Nziza y’Ingoma izamamazwe ku isi yose, kugira ngo ibere gihamya amahanga yose. Ubwo ni ho iherezo rizagera.

¹⁵Nuko rero nimubona ’rya shyano ry’icyorezo’ ryavuzwe n’umuhanuzi Daniyeli[134] rihagaze ahantu hatagatifu — usoma abyumve neza! —

¹⁶icyo gihe abazaba bari muri Yudeya bazahungire mu misozi.

¹⁷Uzaba ari hejuru y’inzu, ntazururuke ngo hari icyo agiye gufata mu nzu ye.

¹⁸Kandi uzaba ari mu murima, ntazahindukire ngo ajye gufata umwitero we!

¹⁹Hagowe abazaba batwite n’abazaba bonsa, muri iyo minsi!

²⁰Nimusabe kugira ngo ihunga ryanyu ritazaba mu itumba cyangwa ku munsi w’isabato.

²¹Nuko rero hazaba amagorwa akomeye atigeze aboneka kuva aho isi yatangiriye kugeza kuri uyu munsi, kandi adateze kuzaboneka ukundi.

²²Ndetse iyo minsi iyo itagerurwa, nta kizima cyajyaga kurokoka; ariko iyo minsi izagerurwa bigiriwe abatowe.

²³Nuko rero nihagira ubabwira ati ’Dore Kristu ari hano’, cyangwa ’ari hariya’, ntimuzabyemere.

²⁴Koko hazaduka abiyita Kristu, haze n’abahanuzi b’ibinyoma; bazerekana ibimenyetso bikomeye, bakore n’ibitangaza, byayobya ndetse n’abatowe bibaye ibishoboka.

²⁵Dore ndababuriye hakiri kare.

²⁶Nibababwira ngo ’Nguriya mu butayu’, ntimuzajyeyo; bati ’Nguriya ari mu nzu’, ntimuzabyemere.

²⁷Uko umurabyo urabiriza mu burasirazuba ukabonekera mu burengerazuba, ni ko ukuza k’Umwana w’umuntu kuzamera.

²⁸Aho intumbi izaba iri hose, ni ho inkongoro zizakoranira.

²⁹Bidatinze, nyuma y’iyo minsi y’amagorwa, izuba rizacura umwijima, ukwezi ntikuzamurika, inyenyeri zizahanuka ku ijuru, maze ibikomeye byo mu ijuru bihungabane.

³⁰Ubwo ikimenyetso cy’Umwana w’umuntu[135] kizaboneka mu ijuru, n’amoko yose y’isi azacure imiborogo, maze azabone Umwana w’umuntu aje ku bicu byo mu kirere afite ububasha n’ikuzo ryinshi.

³¹Nuko azatume abamalayika be bavuze ihembe riranguruye, bakoranye abo yatoye mu byerekezo bine by’isi, kuva aho ijuru ritangirira kugeza aho riherera.

³²Nimurebere ku giti cy’umutini. Iyo amashami yacyo atoshye, n’amababi akamera, mumenya ko igihe cy’imbuto cyegereje.

³³Namwe, nimubona ibyo byose bibaye, muzamenye ko Umwana w’umuntu ari hafi, ko yageze ku irembo.

³⁴Ndababwira ukuri: iki gisekuru ntikizashira ibyo byose bitabaye[136].

³⁵Ijuru n’isi bizashira, ariko amagambo yanjye ntazashira.

³⁶Naho umunsi n’isaha ibyo bizabera nta we ubizi, ari abamalayika bo mu ijuru, ari Mwana[137], keretse Data wenyine.

³⁷Mu gihe cy’ukuza k’Umwana w’umuntu bizamera nko mu minsi ya Nowa.

³⁸Muri iyo minsi yabanjirije umwuzure, bararyaga kandi baranywaga, bashakaga abagore cyangwa abagabo, kugeza umunsi Nowa yinjiriye mu bwato,

³⁹nuko abantu ntibagira icyo bamenya, kugera igihe umwuzure uziye ukabahitana bose. Nguko uko bizamera mu gihe cy’ukuza k’Umwana w’umuntu.

⁴⁰Mu bagabo babiri bazaba bari mu mirima, umwe azatwarwa undi asigare;

⁴¹mu bagore babiri bazaba basya, umwe azatwarwa undi asigare.

⁴²Nuko rero murabe maso, kuko mutazi umunsi Umwami wanyu azaziraho.

⁴³Murabizi: iyaba nyir’urugo yamenyaga igihe cy’ijoro umujura azaziraho, yabaye maso maze ntareke bamupfumurira inzu.

⁴⁴Namwe rero nimube maso, kuko Umwana w’umuntu azaza igihe mudakeka.

⁴⁵Mubirebye, ni nde mugaragu w’indahemuka kandi uzi ubwenge, atari uwo shebuja yemeye gushinga abo mu rugo rwe, kugira ngo ajye abaha igaburo ryabo ku gihe gikwiye?

⁴⁶Hahirwa uwo mugaragu, shebuja azagaruka agasanga agenza atyo!

⁴⁷Ndababwira ukuri: azamushinga ibyo atunze byose.

⁴⁸Naho niba ari umugaragu mubi, wibwira ati ’Databuja aratinze’,

⁴⁹maze agatangira gukubita bagenzi be, akarya akanywa hamwe n’abasinzi,

⁵⁰shebuja azaza umunsi atamwitezeho no ku isaha atazi,

⁵¹amwirukane, amuherereze mu gice cy’indyarya: aho azaririra kandi agahekenya amenyo.