Read kinyarwanda Matayo 25 Bible Online

Matayo 25 - kinyarwanda bible

Matayo 25

¹Ubwo rero Ingoma y’ijuru izagereranywa n’abakobwa cumi bafashe amatara yabo, bajya gusanganira umukwe.

²Batanu muri bo bari abapfayongo, abandi batanu ari abanyamutima.

³Abakobwa b’abapfayongo bafata amatara yabo, ariko ntibajyana amavuta yo kongeramo[138];

⁴naho abanyamutima bafata amatara hamwe n’amavuta mu tweso.

⁵Nuko rero umukwe atinze, barahunyiza, bose barasinzira.

⁶Ariko mu gicuku akamu karavuga ngo ’Dore umukwe araje, nimujye kumusanganira!’

⁷Nuko ba bakobwa bose barabaduka, batunganya amatara yabo.

⁸Ab’abapfayongo babwira ab’abanyamutima bati ’Nimuduhe ku mavuta yanyu, kuko amatara yacu agiye kuzima.’

⁹Ariko abanyamutima barabasubiza bati ’Ahubwo nimugane abacuruzi, mwigurire, tutavaho tubura aduhagije twese.’

¹⁰Igihe bagiye kuyagura, umukwe aba araje; abiteguye binjirana na we mu nzu y’ubukwe, nuko umuryango urakingwa.

¹¹Hanyuma ba bakobwa bandi baraza, barahamagara bati ’Nyagasani, Nyagasani, dukingurire!’

¹²We rero arabasubiza ati ’Ndababwira ukuri: simbazi!’

¹³Nuko rero, murabe maso, kuko mutazi umunsi n’isaha.

¹⁴Koko, iby’icyo gihe bizamera nk’umuntu wari ugiye kujya mu rugendo, agahamagara abagaragu be, akababitsa ibintu bye.

¹⁵Umwe amuha amatalenta[139] atanu, undi abiri, undi imwe, umuntu wese ku rugero rw’icyo ashoboye, hanyuma aragenda.

¹⁶Ako kanya uwari wahawe amatalenta atanu ajya kuyakoresha maze yunguka andi atanu.

¹⁷Uwari wahawe abiri na we, yunguka andi abiri.

¹⁸Naho uwari wahawe imwe, aragenda acukura umwobo mu gitaka maze ahishamo imari ya shebuja.

¹⁹Hashize igihe kirekire, shebuja wa ba bagaragu araza, maze abamurikisha ibintu bye.

²⁰Uwahawe amatalenta atanu aregera maze amuhereza amatalenta atanu yandi, agira ati ’Shobuja, wari wampaye amatalenta atanu, dore andi atanu nungutse.’

²¹Shebuja aramubwira ati ’Ni uko, mugaragu mwiza kandi udahemuka, wabaye inyangamugayo mu bintu bike, nzagushinga ibisumbyeho; ngwino wishimane na Shobuja!’

²²Uwahawe amatalenta abiri, na we araza, agira ati ’Shobuja, wari wampaye amatalenta abiri, dore andi abiri nungutse.’

²³Shebuja aramubwira ati ’Ni uko, mugaragu mwiza kandi udahemuka, wabaye inyangamugayo mu bintu bike, nzagushinga ibisumbyeho; ngwino wishimane na Shobuja.’

²⁴Haza uwahawe talenta imwe, aravuga ati ’Shobuja, nzi ko uri umuntu w’umunyabugugu, usarura aho utabibye, ukanura aho utanitse.

²⁵Naratinye, ndagenda mpisha talenta yawe mu gitaka: dore ibiri ibyawe.’

²⁶Naho shebuja aramusubiza ati ’Mugaragu mubi kandi w’umunebwe, wari uzi ko nsarura aho ntabibye, nkanura aho ntanitse;

²⁷uba rero warabikije imari yanjye abari kunyungukira, nagaruka nkabona ibyanjye n’inyungu.

²⁸Nimumwambure talenta ye maze muyihe ufite amatalenta cumi;

²⁹kuko utunze bazamuha agakungahara; naho udafite na mba bazamwaka n’utwo yaganyiragaho.

³⁰Naho uwo mugaragu w’imburamumaro nimumujugunye hanze, aho azaririra kandi agahekenya amenyo.’

³¹Igihe Umwana w’umuntu azaza yuje ikuzo, ashagawe n’abamalayika bose, ubwo azicara ku ntebe ye y’ikuzo.

³²Ibihugu byose[140] bizakoranyirizwe imbere ye, maze azatandukanye abantu nk’uko umushumba asobanura intama n’ihene.

³³Azashyira intama iburyo bwe, n’ihene ibumoso.

³⁴Nuko rero Umwami azabwire abari iburyo bwe, ati ’Nimuze, abahawe umugisha na Data, muhabwe Ingoma mwateguriwe kuva isi ikiremwa;

³⁵kuko nashonje mukamfungurira; nagize inyota mumpa icyo kunywa; naje ndi umugenzi murancumbikira;

³⁶nari nambaye ubusa muranyambika; nari ndwaye muransura; nari imbohe muza kundeba[141].’

³⁷Nuko intungane zizamusubize ziti ’Nyagasani, twakubonye ryari ushonje, maze turagufungurira; ufite inyota tuguha icyo unywa;

³⁸uri umugenzi turagucumbikira; wambaye ubusa turakwambika;

³⁹urwaye cyangwa se uri imbohe tuza kukureba?’

⁴⁰Nuko Umwami azabasubize, ati ’Ndababwira ukuri: ibyo mwagiriye umwe muri abo bavandimwe banjye baciye bugufi, ni jye mwabaga mubigiriye.’

⁴¹Hanyuma azabwire n’ab’ibumoso, ati ’Nimumve iruhande, mwa bivume mwe, mujye mu muriro w’iteka wagenewe Sekibi n’abamalayika be;

⁴²kuko nashonje ntimwamfungurira; nagize inyota ntimwampa icyo nywa;

⁴³naje ndi umugenzi ntimwancumbikira; nari nambaye ubusa ntimwanyambika; nari ndwaye cyangwa ndi imbohe ntimwaza kunsura.’

⁴⁴Nuko abo na bo bazamubaze bati ’Nyagasani, twakubonye ryari ushonje cyangwa ufite inyota; uri umugenzi cyangwa wambaye ubusa; urwaye cyangwa uri imbohe ntitwagufasha?’

⁴⁵Nuko azabasubize, ati ’Ndababwira ukuri: ibyo mutagiriye umwe muri abo baciye bugufi, ni jye mutabigiriye.’

⁴⁶Maze abo bazajye mu bubabare bw’iteka, naho intungane zijye mu bugingo bw’iteka.»