Read kinyarwanda Matayo 26 Bible Online

Matayo 26 - kinyarwanda bible

Matayo 26

¹Yezu arangije izo nyigisho zose, abwira abigishwa be, ati

²«Muzi ko Pasika izaba mu minsi ibiri, maze Umwana w’umuntu agatangwa kugira ngo abambwe ku musaraba.»

³Nuko abatware b’abaherezabitambo n’abakuru b’umuryango bakoranira mu ngoro y’umuherezabitambo mukuru witwaga Kayifa,

⁴kugira ngo bajye inama yo gufata Yezu ku mayeri, maze bamwice.

⁵Icyakora baravugaga bati «Ntibizabe ku munsi mukuru, ejo rubanda rudatera imidugararo.»

⁶Igihe Yezu yari i Betaniya kwa Simoni umubembe[142],

⁷umugore aza amusanga, afite urweso rwuzuye umubavu umininnye, awusuka ku mutwe wa Yezu, igihe yari ku meza afungura.

⁸Abigishwa babibonye, bararakara bati «Bimaze iki gupfusha ubusa bene ako kageni?

⁹Uwo mubavu wari kugurwa byinshi bigahabwa abakene!»

¹⁰Yezu arababwira ati «Uwo mugore muramutonganyiriza iki? Dore ibyo amaze kungirira ni byiza.

¹¹Abakene muzabahorana iteka, ariko jye ntimuzamporana iteka.

¹²Kuba asize uyu mubavu umubiri wanjye, abigize ateganya ihambwa ryanjye.

¹³Ndababwira ukuri: aho iyi Nkuru Nziza izamamazwa hose, ku isi yose, bazajya bavuga n’ibyo amaze gukora, bamwibuke.»

¹⁴Nuko umwe muri ba Cumi na babiri witwaga Yuda Isikariyoti, asanga abatware b’abaherezabitambo,

¹⁵arababwira ati «Murampa iki, nanjye nkamubagabiza?» Bamubarira ibiceri mirongo itatu bya feza[143].

¹⁶Kuva icyo gihe atangira gushaka uburyo buboneye bwo kumutanga.

¹⁷Umunsi wa mbere wo kurya Imigati idasembuye[144], abigishwa baza kubaza Yezu, bati «Aho ushaka ko tugutegurira ibyo kurya Pasika[145] ni he?»

¹⁸Ati «Nimujye mu murwa kwa kanaka, mumubwire muti ’Umwigisha agutumyeho ngo: Igihe cyanjye kiregereje, ndashaka kurira Pasika iwawe ndi kumwe n’abigishwa banjye.’»

¹⁹Abigishwa babigenza uko Yezu yabategetse, maze bategura ibya Pasika.

²⁰Bugorobye, Yezu ajya ku meza hamwe na ba Cumi na babiri.

²¹Nuko rero igihe bafungura, aravuga ati «Ndababwira ukuri: umwe muri mwe agiye kungambanira.»

²²Birabababaza cyane, batangira kumubaza umwe umwe, bati «Mbese yaba ari jye, Nyagasani?»

²³Arabasubiza ati «Uwo duhurije intoki ku mbehe[146], ni we ugiye kungambanira!

²⁴Koko Umwana w’umuntu aragiye nk’uko Ibyanditswe bimuvuga! Ariko rero hagowe uwo muntu wemeye kugambanira Umwana w’umuntu; icyari kuba cyiza ni uko uwo muntu aba ataravutse!»

²⁵Yuda umugambanyi na we aramubaza, ati «Aho ntiyaba jye, Mwigisha?» Yezu ati «Urabyivugiye!»

²⁶Nuko bafungura, Yezu afata umugati; amaze gushimira Imana, arawumanyura, awuhereza abigishwa be, ati «Nimwakire, murye: iki ni umubiri wanjye.»

²⁷Arongera afata n’inkongoro, arashimira, arabahereza, ati «Nimunyweho mwese,

²⁸kuko iki ari amaraso yanjye, ay’Isezerano, agiye kumenerwa benshi ngo bababarirwe ibyaha[147].

²⁹Ndabibabwiye, sinzongera kunywa ukundi ku mbuto y’umuzabibu kugeza ku munsi nzanywera divayi nshya hamwe namwe mu Ngoma ya Data.»

³⁰Bamaze kuririmba zaburi[148], barasohoka bagana ku musozi w’Imizeti.

³¹Nuko Yezu arababwira ati «Iri joro, ibigiye kumbaho biratuma mwese muhungabana, kuko handitse ngo ’Nzakubita umushumba, maze umukumbi w’intama utatane[149].’

³²Ariko nimara kuzuka, nzabatanga mu Galileya.»

³³Petero asubiza, amubwira ati «N’aho bose bahungabana kubera wowe, jyewe sinzigera mpungabana!»

³⁴Yezu aramubwira ati «Ndakubwira ukuri: iri joro, isake itarabika, uranyihakana gatatu.»

³⁵Petero aramusubiza ati «N’aho nagomba gupfana nawe, sinzakwihakana!» Abigishwa bose bavuga batyo.

³⁶Nuko Yezu ajyana na bo ahantu hitwa Getsemani maze abwira abigishwa be, ati «Nimube mwicaye aha, umwanya ngiye hariya gusenga.»

³⁷Ajyana na Petero na bene Zebedeyi bombi, atangira kugira agahinda n’ishavu.

³⁸Nuko arababwira ati «Umutima wanjye urashavuye byo gupfa; nimugume aha, kandi mube maso hamwe nanjye.»

³⁹Hanyuma yigira imbere gato, agwa yubitse amaso, asenga agira ati «Data, niba bishoboka, iyi nkongoro[150] ice kure yanjye! Nyamara ntibibe uko jye nshaka, ahubwo bibe uko wowe ushaka!»

⁴⁰Agaruka ku bigishwa be, maze asanga basinziriye; nuko abwira Petero ati «Ni ibyo byawe, ntiwashoboye kuba maso hamwe nanjye isaha imwe?

⁴¹Nimube maso kandi mwambaze, kugira ngo mutaza kugwa mu gishuko: umutima w’umuntu uharanira ibyiza, naho umubiri wo ugira intege nke.»

⁴²Arongera ajya kwambaza ubwa kabiri, ati «Data, niba iyi nkongoro idashobora guhita ntayinyoyeho, icyo ushaka nigikorwe!»

⁴³Hanyuma agarutse, asanga na none basinziriye, kuko amaso yabo yari aremerewe.

⁴⁴Arabihorera, maze yongera kujya kwambaza ubwa gatatu, asubira muri ya magambo.

⁴⁵Hanyuma asanga abigishwa be, arababwira ati «Noneho nimusinzire, muruhuke! Dore isaha irageze, Umwana w’umuntu agiye gushyirwa mu maboko y’abanyabyaha.

⁴⁶Nimuhaguruke, tugende! Dore untanga ari hafi.»

⁴⁷Akivuga ibyo, Yuda umwe muri ba Cumi na babiri atunguka aherekejwe n’abantu benshi bitwaje inkota n’ibibando, boherejwe n’abatware b’abaherezabitambo n’abakuru b’umuryango.

⁴⁸Umugambanyi yari yabahaye iki kimenyetso, ati «Uwo nza guhobera nkamusoma, araba ari we, mumufate.»

⁴⁹Maze ako kanya yegera Yezu, ati «Ndakuramutsa, Mwigisha», nuko aramusoma.

⁵⁰Naho Yezu aramubwira ati «Ncuti, kora icyakuzanye!» Nuko baratambuka, basingira Yezu, baramufata.

⁵¹Ni bwo umwe mu bari kumwe na Yezu akuye inkota ye, ayikubita umugaragu w’umuherezabitambo mukuru, amuca ugutwi.

⁵²Nuko Yezu aramubwira ati «Subiza inkota yawe mu rwubati, kuko abarwanisha inkota bose bazicishwa inkota.

⁵³Ubona ko ntashobora gutabaza Data akampa muri aka kanya imitwe irenze cumi n’ibiri y’abamalayika?

⁵⁴Ariko se Ibyanditswe[151] ko ari uko bigomba kumera byazarangira bite?»

⁵⁵Ubwo nyine Yezu abwira rubanda, ati «Mwaje n’inkota n’ibibando kumfata nk’aho ndi igisambo! Nyamara buri munsi nari nicaye mu Ngoro y'Imana nigisha, ntimwamfata.

⁵⁶Ariko ibyo byose byabereye kugira ngo ibyanditswe n’Abahanuzi byuzuzwe.» Nuko abigishwa baramutererana, bose barahunga.

⁵⁷Abari bafashe Yezu bamujyana kwa Kayifa, umuherezabitambo mukuru, aho abigishamategeko n’abakuru b’umuryango bari bateraniye.

⁵⁸Petero yari yamukurikiye yitaruye kugera ku ngoro y’umuherezabitambo mukuru, arinjira yicarana n’abagaragu bo mu rugo, ashaka kumenya amaherezo.

⁵⁹Abatware b’abaherezabitambo n’Inama Nkuru yose bashakaga ibyo bahimbira Yezu ngo bamwicishe.

⁶⁰Ariko ntibabibona, n’ubwo abashinjabinyoma baje ari benshi. Nyuma haza babiri,

⁶¹bati «Uyu muntu yaravuze, ati ’Nshobora gusenya Ingoro y’Imana maze nkongera kuyubaka mu minsi itatu[152].’»

⁶²Nuko umuherezabitambo mukuru arahaguruka, aramubwira ati «Ko nta cyo usubiza ku byo bakurega?»

⁶³Ariko Yezu aricecekera. Umuherezabitambo mukuru aramubwira ati «Nkurahije Imana ihoraho, ngo utubwire niba uri Kristu, Umwana w’Imana.»

⁶⁴Yezu aramusubiza ati «Wabyivugiye. Byongeye kandi, nkwerurire, kuva ubu muzabona Umwana w’umuntu yicaye iburyo bw’Ushoborabyose, kandi aje ku bicu byo mu kirere[153].»

⁶⁵Nuko umuherezabitambo mukuru ashishimura imyambaro ye, ati «Atutse Imana! Abagabo bandi turacyabakeneyeho iki? Dore noneho mwiyumviye ko atutse Imana!

⁶⁶Murabibona mute?» Baramusubiza bati «Akwiye urupfu!»

⁶⁷Nuko bamucira mu maso, bamukubita ibipfunsi, abandi bamukubita inshyi,

⁶⁸bavuga bati «Umva ko uri Kristu, ngaho duhanurire! Ni nde ugukubise?»

⁶⁹Naho ubwo Petero yari yicaye hanze mu rugo. Umuja aregera, aramubwira ati «Nawe wari kumwe na Yezu Umunyagalileya.»

⁷⁰Ariko we ahakanira imbere ya bose, ati «Sinumva icyo ushaka kuvuga.»

⁷¹Igihe yerekeye ku irembo, undi muja aramubona, abwira abantu bari aho, ati «Uyu yari kumwe na Yezu Umunyanazareti.»

⁷²Nuko yongera kubihakanisha indahiro, ati «Sinzi uwo muntu!»

⁷³Bimaze akanya, abari aho baregera, babwira Petero, bati «Koko nawe uri uwabo! N’imvugo yawe irakugaragaza[154].»

⁷⁴Noneho atangira gutukana no gucurikiranya indahiro, ati «Uwo muntu, nta bwo muzi!» Ako kanya isake irabika.

⁷⁵Nuko Petero yibuka ijambo Yezu yari yamubwiye, ati «Isake itarabika, uraba unyihakanye gatatu.» Nuko, arasohoka, arirana ishavu.