Read kinyarwanda Matayo 28 Bible Online

Matayo 28 - kinyarwanda bible

Matayo 28

¹Isabato irangiye, ku wa mbere wayo mu museso, Mariya Madalena na Mariya wundi bazindukira ku mva.

²Ubwo isi ihinda umushyitsi mwinshi; umumalayika wa Nyagasani amanuka mu ijuru aregera, ahirika ibuye, aryicara hejuru.

³Yari ameze nk’umurabyo, umwambaro we wera nk’urubura.

⁴Abarinzi bamurabutswe bakuka umutima, bamera nk’abapfuye.

⁵Ariko wa mumalayika araterura, abwira abagore ati «Mwebweho mwitinya! Nzi ko mushaka Yezu wabambwe ku musaraba.

⁶Ntari hano, yazutse[162] nk’uko yari yabivuze; nimuze mwirebere aho yari arambitse.

⁷None rero, nimugende mwihuta, mubwire abigishwa be ko yazutse, kandi ko agiye kubatanga mu Galileya; ni ho muzamubonera. Ngibyo ibyo nari mfite kubabwira.»

⁸Ubwo abagore bava ku mva bafite ubwoba buvanze n’ibyishimo byinshi, bihutira kubwira abigishwa be iyo nkuru.

⁹Ni bwo Yezu ahuye na bo ati «Nimugire amahoro!» Baramwegera, bahobera ibirenge bye, bamupfukamye imbere.

¹⁰Nuko Yezu arababwira ati «Mwitinya! Ahubwo nimugende mubwire abavandimwe banjye bajye mu Galileya; ni ho bazambonera.»

¹¹Abagore bakiri mu nzira, bamwe mu bazamu baza mu murwa kumenyesha abatware b’abaherezabitambo ibyari byabaye byose.

¹²Ni bwo bateraniye hamwe n’abakuru b’umuryango; nuko bajya inama; baha abo basirikare amafaranga menshi,

¹³babihanangiriza bati «Muvuge ko abigishwa be baje nijoro, bakiba umurambo we musinziriye.’

¹⁴Umutware w’igihugu nabyumva, tuzamugusha neza, maze tubarinde impagarara.»

¹⁵Bamaze gushyikira amafaranga bagenza uko bari babwirijwe. Nuko iyo nkuru yogera mu Bayahudi kugeza na n’ubu.

¹⁶Nuko abigishwa cumi n’umwe bajya mu Galileya[163] ku musozi Yezu yari yarabarangiye.

¹⁷Bamubonye barapfukama, bamwe ariko bashidikanya.

¹⁸Yezu arabegera, arababwira ati «Nahawe ububasha bwose mu ijuru no ku isi.

¹⁹Nuko rero, nimugende mwigishe amahanga yose, mubabatize ku izina ry’Imana Data na Mwana na Roho Mutagatifu,

²⁰mubatoze gukurikiza ibyo nabategetse byose. Dore kandi ndi kumwe namwe iminsi yose, kugeza ku ndunduro y'ibihe.»