Read kinyarwanda Matayo 5 Bible Online

Matayo 5 - kinyarwanda bible

Matayo 5

¹Yezu abonye icyo kivunge cy’abantu aterera umusozi[27]. Aricara, abigishwa be baramwegera.

²Nuko araterura arigisha ati

³«Hahirwa abakene ku mutima, kuko Ingoma y’ijuru ari iyabo.

⁴Hahirwa abiyoroshya, kuko bazatunga isi ho umurage.

⁵Hahirwa abababaye, kuko bazahozwa.

⁶Hahirwa abasonzeye ubutungane bakabugirira inyota, kuko bazahozwa.

⁷Hahirwa abagira impuhwe, kuko bazazigirirwa.

⁸Hahirwa abakeye ku mutima, kuko bazabona Imana.

⁹Hahirwa abatera amahoro, kuko bazitwa abana b’Imana.

¹⁰Hahirwa abatotezwa bazira ubutungane, kuko Ingoma y’ijuru ari iyabo.

¹¹Murahirwa nibabatuka, bakabatoteza, bakanababeshyera ku buryo bwose, ari jye babahora.

¹²Nimwishime munezerwe, kuko ingororano yanyu izaba nyinshi mu ijuru! Ni uko batoteje abahanuzi bababanjirije.

¹³Muri umunyu w’isi. Ariko se umunyu wakayutse, bawusubirishamo iki uburyohe? Nta kandi kamaro kawo kereka kujugunywa hanze, ugakandagirwa n’abantu.

¹⁴Muri urumuri rw’isi. Ikigo cyubatse mu mpinga y’umusozi nticyihishira.

¹⁵Kandi nta we ucana itara ngo aryubikeho icyibo, ahubwo arishyira ku gitereko cyaryo aho rimurikira abari mu nzu bose.

¹⁶Urumuri rwanyu niruboneshereze rutyo abantu kugira ngo barebe ibyiza mukora, bakurizeho gusingiza So uri mu ijuru.

¹⁷Ntimukeke ko naje kuvanaho Amategeko cyangwa Abahanuzi; sinaje gukuraho, ahubwo naje kunonosora.

¹⁸Koko rero, ndababwira ukuri: kugera igihe ijuru n’isi bizashirira, nta kanyuguti, nta n’akadomo kazava mu Mategeko ibyo byose bitarangiye[28].

¹⁹Nuko rero, uzarenga kuri rimwe muri ayo mategeko yoroheje, kandi akigisha n’abandi kugenza batyo, azitwa igiseswa mu Ngoma y’ijuru. Naho uzajya ayakurikiza akayatoza abandi, azitwa umuntu ukomeye mu Ngoma y’ijuru.

²⁰Reka kandi mbabwire: niba ubutungane bwanyu budasumba ubw’abigishamategeko n’abafarizayi, nta bwo muzinjira mu Ngoma y’ijuru.

²¹Mwumvise ko abakurambere babwiwe ngo ’Ntuzice’, kandi nihagira uwica, azabibarizwa mu rubanza.

²²Jyewe mbabwiye ko umuntu wese urakariye mugenzi we, azabibarizwa mu rukiko ; naho nabwira mugenzi we ’Gicucu!’ azabibarizwa mu Nama Nkuru; namubwira ati ’Uri umusazi!’, azishyurira mu nyenga y’umuriro.

²³Nuko rero nujyana ituro ryawe imbere y’urutambiro, ukahibukira ko mugenzi wawe mufitanye akantu,

²⁴rekera ituro ryawe imbere y’urutambiro, ubanze ujye kwigorora na mugenzi wawe ; hanyuma ugaruke ubone guhereza ituro ryawe.

²⁵Jya ugira ubwira bwo kwiyunga n’uwo mwangana, igihe mukiri kumwe mu nzira kugira ngo ataguteza umucamanza, umucamanza akagushyikiriza umupolisi, ubwo ukaba uroshywe mu buroko.

²⁶Mbikubwize ukuri: nta bwo uzavamo utishyuye byose, kugeza ku giceri cya nyuma.

²⁷Mwumvise ko byavuzwe ngo ’Ntuzasambane’,

²⁸jyeweho, mbabwiye ko ureba umugore akamwifuza, mu mutima we aba yamusambanyije.

²⁹Ijisho ryawe ry’iburyo nirikubera impamvu yo gukora icyaha, rinogore urijugunye kure yawe: ikigufitiye akamaro ni ukubura rumwe mu ngingo zawe, aho kubona umubiri wose utawe mu nyenga y’umuriro.

³⁰Niba ikiganza cy’iburyo kigutera gukora icyaha, gice ukijugunye kure yawe: ikiruta ni uko wabura rumwe mu ngingo zawe, aho kubona umubiri wawe wose ugiye mu nyenga y’umuriro.

³¹Kandi byaravuzwe ngo ’Usenze umugore we agomba kumuha urwandiko rwo kumusenda’[29].

³²Naho jye mbabwiye ko umuntu wese usenda umugore we — usibye iyo babanaga bitemewe[30]— aba amuteye gusambana; n’ucyura umugore wasenzwe, aba asambanye.

³³Mwumvise kandi ko abakurambere babwiwe ngo ’Ntuzarahire ibinyoma ahubwo uzahigura Nyagasani ibyo wamusezeranije mu ndahiro’[31].

³⁴Jyeweho mbabwiye kutarahira na gato: ari ukurahira ijuru, kuko ari inteko y’Imana;

³⁵ari ukurahira isi, kuko ari umusego w’ibirenge byayo; ari na Yeruzalemu, kuko ari Umurwa w’Umwami mukuru.

³⁶Ntukarahize n’umutwe wawe, kuko udashobora guhindura n’umwe mu misatsi yawe umweru cyangwa igikara.

³⁷Mujye muvuga muti ’Yego’, niba ari yego, cyangwa ’Oya’, niba ari oya; ibigeretsweho bindi biba biturutse kuri Sekibi.

³⁸Mwumvise ko byavuzwe ngo ’Ijisho rihorerwe ijisho, iryinyo rihorerwe irindi[32]’.

³⁹Jyeweho mbabwiye kudashyamirana n’umugiranabi; ahubwo nihagira ugukubita urushyi mu musaya w’iburyo, mutegeze n’uwundi.

⁴⁰Nihagira ushaka kukuburanya ngo agutware ikanzu yawe, mwegurire n’igishura cyawe.

⁴¹Nihagira uguhatira gutera intambwe igihumbi, muterane ibihumbi bibiri.

⁴²Ugusabye, umuhe; n’ushatse ko umuguriza, ntukamwihunze.

⁴³Mwumvise ko byavuzwe ngo ’Uzakunde mugenzi wawe, wange umwanzi wawe[33].’

⁴⁴Jyeweho ndababwira ngo ’Nimukunde ababanga, musabire ababatoteza’.

⁴⁵Bityo muzabe abana ba So uri mu ijuru, We uvusha izuba rye ku babi no ku beza, kandi akavubira imvura abatunganye n’abadatunganye.

⁴⁶Nimwikundira gusa ababakunda, muzahemberwa iki? Ese abasoresha[34] bo, si ko babigenza?

⁴⁷Maze se nimuramutsa gusa abo muva inda imwe, muzaba murushije iki abandi? Ese abatazi Imana bo, si ko babigenza?

⁴⁸Mwebweho rero, muzabe intungane nk’uko So wo mu ijuru ari intungane.