Read kinyarwanda Matayo 7 Bible Online

Matayo 7 - kinyarwanda bible

Matayo 7

¹Mwica urubanza[38] namwe mutazarucirwa,

²kuko, uko muzaba mwaziciye, ni ko muzazicirwa, n’igipimisho muzageresha, ni cyo namwe muzagererwamo.

³Kuki ubona akatsi kari mu jisho rya mugenzi wawe, ariko umugogo uri mu jisho ryawe ntuwubone ?

⁴Ubwo se wabwira ute mugenzi wawe uti ’Reka ngutokore akatsi kakuri mu jisho’ kandi utareba umugogo uri mu ryawe?

⁵Wa ndyarya we, banza ukure umugogo uri mu jisho ryawe, hanyuma uzabone neza, ushobore gutokora akatsi ko mu jisho rya mugenzi wawe.

⁶Ikintu gitagatifu[39] ntimukakigabize imbwa, amasaro yanyu ntimukayajugunye imbere y’ingurube: hato zitayaribata hanyuma zikabahindukirana zikabashiha.

⁷Musabe, muzahabwa; mushakashake, muzaronka; mukomange, muzakingurirwa.

⁸Kuko usaba wese ahabwa; ushakashatse akaronka, n’ukomanze agakingurirwa.

⁹Mbese ni nde muntu muri mwe, umwana we yasaba umugati, akamuhereza ibuye?

¹⁰Cyangwa se, yamusaba ifi, akamuhereza inzoka?

¹¹Niba rero, mwebwe n’ububi bwanyu, muzi guha abana banyu ibintu byiza, So uri mu ijuru azarushaho ate guha ibyiza abamusabye?

¹²Ibyo mwifuza ko abandi babagirira byose, namwe muzajye mubibagirira : ngayo Amategeko n’Abahanuzi.

¹³Nimwinjirire mu muryango ufunganye, kuko umuryango wagutse n’inzira y’igihogere ari byo bijyana mu cyorezo, kandi abahanyura ni benshi.

¹⁴Mbega ukuntu umuryango ugana mu bugingo ufunganye, n’inzira ijyayo ikaba impatanwa, maze bikabonwa na bake!

¹⁵Muritondere abahanurabinyoma babasanga, inyuma basa n’intama, naho imbere ari ibirura by’ibihubuzi.

¹⁶Muzabamenyera ku mbuto bera. Hari usoroma imizabibu ku mahwa? Cyangwa se imitini ku mikeri?

¹⁷Burya igiti cyose cyiza cyera imbuto nziza, naho igiti kibi kikera imbuto mbi.

¹⁸Igiti cyiza ntigishobora kwera imbuto mbi, n’igiti kibi ntigishobora kwera imbuto nziza.

¹⁹Igiti cyose kitera imbuto nziza baragitema, bakakijugunya mu muriro.

²⁰Nuko rero, muzabamenyera ku mbuto bera.

²¹Umbwira wese ngo ’ Nyagasani, Nyagasani ', si we uzinjira mu ngoma y’ijuru, ahubwo ni ukora ibyo Data uri mu ijuru ashaka.

²²Benshi bazambwira uwo munsi[40] bati ’Nyagasani, Nyagasani, ese ntitwahanuye mu izina ryawe? Ese ntitwirukanye roho mbi mu izina ryawe? Ese ntitwakoze ibitangaza byinshi mu izina ryawe?

²³Ubwo nzaba bwira nti ’Sinigeze mbamenya; nimwigireyo, mwa nkozi z’ibibi mwe!’

²⁴Nuko rero, umuntu wese wumva ayo magambo maze kuvuga, kandi akayakurikiza, ameze nk’umuntu w’umunyabwenge wubatse inzu ye ku rutare.

²⁵Imvura yaraguye, imivu iratemba, imiyaga irahuha, bikoranira kuri ya nzu ariko ntiyatemba; kuko yari yubatse ku rutare!

²⁶Naho uwumva wese ayo magambo maze kuvuga, ntayakurikize, ameze nk’umuntu w’umusazi wubatse inzu ye ku musenyi.

²⁷Imvura yaraguye, imivu iratemba, imiyaga irahuha, bikoranira kuri ya nzu, irahirima; ihinduka ubushingwe!»

²⁸Yezu amaze kuvuga ayo magambo, rubanda batangarira ibyo yigishije,

²⁹kuko yigishaga nk’umuntu ufite ububasha, atameze nk’abigishamategeko babo.