Read kinyarwanda Mariko 1 Bible Online

Mariko 1 - kinyarwanda bible

Mariko 1

¹Intangiriro y’Inkuru Nziza ya Yezu Kristu, Umwana w’Imana[1].

²Mu gitabo cya Izayi umuhanuzi[2], handitswemo ngo «Dore nohereje intumwa yanjye mbere yawe, kugira ngo izagutegurire inzira.

³Ni ijwi ry’uvugira mu butayu aranguruye ati ’Nimutegure inzira ya Nyagasani, muringanize aho azanyura!’»

⁴Nuko Yohani Batisita atunguka mu butayu yamamaza mu bantu batisimu yo kwisubiraho kugira ngo bakire ibyaha.

⁵Maze intara yose ya Yudeya ikagenda imugana, n’abaturage bose ba Yeruzalemu. Nuko bakabatizwa na we mu ruzi rwa Yorudani, babanje kwirega ibyaha byabo.

⁶Yohani yambaraga umwenda uboheshejwe ubwoya bw’ingamiya[3], agakenyeza umukoba; yatungwaga n’isanane n’ubuki bw’ubuhura.

⁷Yamamazaga avuga ati «Uje ankurikiye andusha ububasha; sinkwiye no kunama ngo mfundure udushumi tw’inkweto ze.

⁸Jyewe nababatirishije amazi, naho We azababatirisha Roho Mutagatifu.»

⁹Muri iyo minsi Yezu ava i Nazareti ho muri Galileya, aza kubatizwa na Yohani muri Yorudani.

¹⁰Akiva mu mazi, abona ijuru rirakingutse na Roho Mutagatifu amumanukiraho nk’inuma.

¹¹Nuko ijwi rituruka mu ijuru, riti «Uri Umwana wanjye nkunda cyane unyizihira.»

¹²Ako kanya Roho Mutagatifu amuganisha mu butayu.

¹³Ahamara iminsi mirongo ine, ashukwa na Sekibi. Yahabanaga n’inyamaswa, abamalayika bakamuhereza.

¹⁴Yohani amaze gutangwa, Yezu aza mu Galileya. Yamamaza Inkuru Nziza y’Imana, avuga ati

¹⁵«Igihe kirageze, none Ingoma y’Imana iregereje[4]. Nimwisubireho maze mwemere Inkuru Nziza!»

¹⁶Uko yagendaga akikiye inyanja ya Galileya, abona Simoni na Andereya murumuna we; bariho baroha inshundura mu nyanja, kuko bari abarobyi.

¹⁷Yezu arababwira ati «Nimunkurikire, nzabagira abarobyi b’abantu.»

¹⁸Ako kanya basiga aho inshundura zabo, baramukurikira.

¹⁹Yigiye imbere gatoya, abona Yakobo, mwene Zebedeyi, na Yohani murumuna we; bariho batunganya inshundura zabo mu bwato.

²⁰Ako kanya arabahamagara. Nuko basiga se Zebedeyi mu bwato, hamwe n’abakozi be, baramukurikira.

²¹Bagera i Kafarinawumu[5]. Nuko ku munsi w’isabato, Yezu yinjira mu isengero, arigisha.

²²Batangariraga inyigisho ze, kuko yabigishaga nk’umuntu ufite ububasha, utameze nk’abigishamategeko babo.

²³Ubwo nyine mu isengero ryabo hakaba umuntu wahanzweho na roho mbi. Nuko itera hejuru iti

²⁴«Uradushakaho iki, Yezu w’i Nazareti? Waje kuturimbura! Nzi uwo uri we: uri Intungane y’Imana[6].»

²⁵Yezu ayibwira ayikangara, ati «Ceceka, kandi uve muri uwo muntu!»

²⁶Nuko iyo roho mbi iramutigisa cyane, imusohokamo ivuza induru.

²⁷Bose barumirwa, bituma babazanya bati «Ibi ni ibiki? Mbega inyigisho nshya itanganywe ububasha! Arategeka na roho mbi, zikamwumvira!»

²⁸Nuko bidatinze, inkuru ye ikwira mu ntara yose ya Galileya.

²⁹Bakiva mu isengero, bajya kwa Simoni na Andereya, bari kumwe na Yakobo na Yohani.

³⁰Ubwo rero nyirabukwe wa Simoni yari aryamye, ahinda umuriro. Bahita babwira Yezu iby’uburwayi bwe.

³¹Ni ko kumwegera, amufata ukuboko aramuhagurutsa. Nuko umuriro urazima, atangira kubazimanira.

³²Bugorobye, izuba rimaze kurenga, bamuzanira abarwayi bose n’abahanzweho na roho mbi;

³³mbese umugi wose ukoranira imbere y’umuryango.

³⁴Nuko akiza abarwayi benshi bari bababajwe n’indwara z’amoko menshi, kandi yirukana roho mbi nyinshi, ariko akazibuza kumuvuga, kuko zari zizi uwo ari we[7].

³⁵Bukeye bwaho Yezu abyuka mu rukerera, arasohoka, ajya ahantu hiherereye, nuko arasenga.

³⁶Simoni na bagenzi be bajya kumushakashaka.

³⁷Bamubonye, baramubwira bati «Rubanda rwose ruragushaka.»

³⁸We rero arabasubiza ati «Nimucyo tujye ahandi, mu nsisiro za hafi, na ho mpamamaze Inkuru Nziza, kuko ari cyo cyanzanye[8].»

³⁹Nuko azenguruka Galileya yose, yamamaza Inkuru Nziza mu masengero yabo, kandi yirukana roho mbi.

⁴⁰Umubembe aza amugana, apfukama imbere ye, amwinginga agira ati «Ubishatse wankiza!»

⁴¹Yezu amugirira impuhwe, arambura ukuboko amukoraho; avuga ati «Ndabishatse, kira!»

⁴²Ako kanya ibibembe bimuvaho, arakira.

⁴³Yezu aramwihanangiriza, amusezerera ako kanya,

⁴⁴amubwira ati «Uramenye ntugire uwo ubibwira, ahubwo genda, wiyereke umuherezabitambo[9] kandi uture ibyo Musa yategetse abahumanuwe, maze bibabere icyemezo cy’uko wakize.»

⁴⁵We ariko, ngo amare kugenda, atangira gutangaza no gukwiza hose iyo nkuru, bituma Yezu atagishoboye kwinjira mu mugi ku mugaragaro, ahubwo yigumira ahantu hadatuwe; akaba ari ho abantu bamusanga, baturutse impande zose.