Read kinyarwanda Mariko 10 Bible Online

Mariko 10 - kinyarwanda bible

Mariko 10

¹Nuko Yezu ava aho ngaho, ajya mu ntara ya Yudeya yo hakurya ya Yorudani. Abantu benshi bongera gukoranira iruhande rwe, nuko abigisha uko bisanzwe.

²Abafarizayi baramwegera, maze bamubaza niba umugabo afite uruhushya rwo gusenda[33] umugore we, ariko bamwinja.

³Arababwira ati «Musa yabategetse iki?»

⁴Baramusubiza bati «Musa yemereye umugabo kwandika icyemezo cyo gusenda umugore, akabona kumusezerera.»

⁵Yezu arababwira ati «Icyamuteye kwandika iryo tegeko, ni uko umutima wanyu unangiye.

⁶Naho mu ntangiriro y’isi, ’Imana yaremye umugabo n’umugore;

⁷ni yo mpamvu umugabo azasiga se na nyina, akifatanya n’umugore we,

⁸maze bombi bakaba umubiri umwe[34].’ Bityo ntibaba bakiri babiri, ahubwo baba ari umubiri umwe.

⁹Nuko rero ntihakagire umuntu utandukanya icyo Imana yafatanyije.»

¹⁰Basubiye imuhira, abigishwa bongera kumusobanuza ibyerekeye iyo ngingo.

¹¹Arababwira ati «Koko umugabo usenda umugore we akazana undi aba asambana;

¹²umugore na we utandukana n’umugabo we agacyurwa n’undi, aba asambana.»

¹³Nuko bamuzanira abana bato ngo abakoreho, maze abigishwa barabakabukira.

¹⁴Yezu abibonye ararakara, maze arababwira ati «Nimureke abana bansange, mwibabuza, kuko Ingoma y’Imana ari iy’abameze nka bo.

¹⁵Ndababwira ukuri : umuntu wese utazakira Ingoma y’Imana nk’umwana, ntazayinjiramo bibaho.»

¹⁶Nuko arabahobera, abasabira umugisha abashyizeho ibiganza.

¹⁷Yezu agihaguruka aho, umuntu aza yiruka amupfukama imbere, aramubaza ati «Mwigisha mwiza, nkore iki kugira ngo nzabone ubugingo bw’iteka ho umurage?»

¹⁸Yezu aramubwira ati «Kuki unyita mwiza? Nta mwiza ubaho, keretse Imana yonyine.

¹⁹Uzi amategeko: ntuzice, ntuzasambane, ntuzibe, ntuzahamye ibinyoma, ntuzagirire abandi nabi, urajye wubaha so na nyoko[35].»

²⁰Uwo muntu aramusubiza ati «Mwigisha, ibyo byose nabikurikije kuva mu buto bwanjye.»

²¹Yezu aramwitegereza yumva amukunze; aramubwira ati «Ubuze ikintu kimwe gusa: genda ugurishe ibyo utunze, ubihe abakene, uzagira ubukire mu ijuru, hanyuma uze unkurikire.»

²²We ariko abyumvise arasuherwa, agenda ababaye, kuko yari atunze ibintu byinshi.

²³Nuko Yezu araranganya amaso, abwira abigishwa be ati «Mbega ukuntu kuzinjira mu Ngoma y’Imana biruhije ku bakungu!»

²⁴Abigishwa batangazwa n’ayo magambo; Yezu ariko abibasubiriramo ati «Bana banjye, mbega ukuntu biruhije kwinjira mu Ngoma y’Imana.

²⁵Byoroheye ingamiya guca mu mwenge w’urushinge, kurusha uko byoroheye umukungu kwinjira mu Ngoma y’Imana!»

²⁶Abigishwa barushaho gutangara, barabazanya bati «Ubwo se ni nde ushobora kurokoka?»

²⁷Yezu arabitegereza, maze arababwira ati «Ku bantu ntibishoboka, ariko ku Mana birashoboka, kuko nta kinanira Imana.»

²⁸Nuko Petero araterura, aramubwira ati «Dore twebwe twasize byose turagukurikira.»

²⁹Yezu arasubiza ati «Ndababwira ukuri, nta we uzaba yarasize urugo, cyangwa abavandimwe be, cyangwa bashiki be, cyangwa nyina, cyangwa se, cyangwa abana, cyangwa isambu ye, ari jye abigirira n’Inkuru Nziza,

³⁰ngo abure kwiturwa karijana muri iki gihe, ari amazu, ari abavandimwe, ari na bashiki be, na ba nyina, n’abana n’amasambu, ariko n’ibitotezo bitabuze, kandi no mu gihe kizaza, akaziturwa ubugingo bw’iteka.

³¹Benshi mu ba mbere bazaba aba nyuma, n’aba nyuma babe aba mbere.»

³²Ubwo bari mu nzira bazamuka bajya i Yeruzalemu, Yezu abarangaje imbere. Bari bahagaritse umutima, n’abari babakurikiye bari bafite ubwoba. Yongera kwihererana ba Cumi na babiri iruhande rwe, ababwira ibigiye kumubaho ati

³³«Dore tuzamutse tujya i Yeruzalemu, kandi Umwana w’umuntu agiye kugabizwa abatware b’abaherezabitambo n’abigishamategeko; bazamucira urubanza rwo gupfa, maze bamugabize abanyamahanga.

³⁴Bazamushinyagurira, bamuvunderezeho amacandwe, bamukubite, bamwice, ariko nyuma y’iminsi itatu azuke.»

³⁵Nuko Yakobo na Yohani, bene Zebedeyi, begera Yezu, baramubwira bati «Mwigisha, turashaka ko udukorera icyo tugiye kugusaba.»

³⁶Arababaza ati «Murashaka ko mbakorera iki?»

³⁷Baramusubiza bati «Uraduhe kuzicarana nawe, umwe iburyo, undi ibumoso mu ikuzo ryawe.»

³⁸Yezu arababwira ati «Ntimuzi icyo musaba. Mushobora se kunywera ku nkongoro nzanyweraho, cyangwa se guhabwa batisimu[36] nzahabwa?»

³⁹Baramusubiza bati «Turabishobora!» Yezu arababwira ati «Koko inkongoro nzanyweraho muzayinywesha, na batisimu nzahabwa muzayihabwa;

⁴⁰naho ibyo kwicara iburyo bwanjye cyangwa ibumoso bwanjye, si jye ubitanga; bizahabwa ababigenewe.»

⁴¹Abandi uko ari icumi babyumvise, batangira kurakarira Yakobo na Yohani.

⁴²Yezu arabahamagara, arababwira ati «Muzi ko abahawe kugenga amahanga, bayagenga uko bashatse, kandi ko abatware bayo bayategekesha agahato.

⁴³Kuri mwebwe rero si ko bimeze. Ahubwo ushaka kuba mukuru muri mwe, ajye yigira umugaragu wanyu,

⁴⁴maze ushaka kuba uwa mbere, yihindure umucakara wa bose.

⁴⁵Dore n’Umwana w’umuntu ntiyazanywe no gukorerwa, ahubwo yazanywe no gukorera abandi, no gutanga ubugingo bwe ngo bube incungu ya benshi.»

⁴⁶Nuko bagera i Yeriko. Igihe agisohoka muri Yeriko, ari kumwe n’abigishwa be n’imbaga y’abantu benshi, umuntu w’impumyi witwaga Baritimeyo, mwene Timeyo, akaba yari yicaye iruhande rw’inzira asabiriza.

⁴⁷Yumvise ko ari Yezu w’i Nazareti, atera hejuru ati «Yezu, Mwana wa Dawudi, mbabarira!»

⁴⁸Benshi baramucyaha ngo aceceke, ariko we arushaho gusakuza ati «Mwana wa Dawudi, mbabarira!»

⁴⁹Yezu arahagarara, aravuga ati «Nimumuhamagare.» Bahamagara iyo mpumyi, barayibwira bati «Humura, haguruka, dore araguhamagaye.»

⁵⁰Ajugunya igishura cye, ahaguruka bwangu, asanga Yezu.

⁵¹Yezu aramubaza ati «Urashaka ko ngukorera iki?» Impumyi iramusubiza iti «Mwigisha, mpa kubona!»

⁵²Yezu aramubwira ati «Genda, ukwemera kwawe kuragukijije.» Ako kanya arahumuka, maze akurikira Yezu.