Read kinyarwanda Mariko 14 Bible Online

Mariko 14 - kinyarwanda bible

Mariko 14

¹Hari hasigaye iminsi ibiri ngo Pasika ibe, n’umunsi mukuru w’imigati idasembuye[53]. Nuko abatware b’abaherezabitambo n’abigishamategeko bashaka gufata Yezu ku mayeri ngo bamwice.

²Icyakora baravugaga bati «Ntibizabe ku munsi mukuru, ejo rubanda rudatera imidugararo.»

³Igihe Yezu yari i Betaniya kwa Simoni umubembe, ari ku meza, haza umugore ufite agacupa kuzuye umubavu umininnye w’igiciro gikomeye. Nuko amaze kugapfundura, umubavu awusuka ku mutwe wa Yezu.

⁴Bamwe ariko birabarakaza, barabwirana bati «Uriya mubavu uzize iki?

⁵Uyu mubavu wajyaga kugurwa amadenari arenze magana atatu, maze agahabwa abakene!» Nuko batonganya uwo mugore.

⁶Ariko Yezu arababwira ati «Nimumureke! Muramutonganyiriza iki? Dore ibyo amaze kungirira ni byiza.

⁷Abakene muzabahorana iteka, kandi aho mushakiye mubagirira neza; naho jyewe ntimuzamporana iteka.

⁸Yakoze ibyo ashoboye: yasize umubiri wanjye ateganya ihambwa ryanjye.

⁹Ndababwira ukuri: ku isi yose, aho Inkuru Nziza izamamazwa hose, bazajya bavuga n’ibyo uyu mugore amaze gukora, bamwibuke.»

¹⁰Nuko Yuda Isikariyoti, umwe muri ba Cumi na babiri, asanga abatware b’abaherezabitambo bakuru, agira ngo azamubagabize.

¹¹Ngo babyumve, barishima, maze bamusezeranya kuzamuha ikiguzi. Yuda asigara ashaka uburyo bwo kumutanga.

¹²Umunsi wa mbere wo kurya Imigati idasembuye, ari na wo babagagaho intama za Pasika, abigishwa be baramubaza bati «Urashaka ko tujya gutegura he, ngo uharire Pasika?»

¹³Yezu yohereza babiri mu bigishwa be, arababwira ati «Nimujye mu murwa, muri buhure n’umuntu wikoreye ikibindi cy’amazi, mumukurikire,

¹⁴maze aho yinjira, mubwire nyir’urugo muti ’Umwigisha aravuze ngo: Icyumba cyanjye nza kuriramo Pasika hamwe n’abigishwa banjye kiri hehe?’

¹⁵Ari bubereke mu nzu yo hejuru icyumba kigari, gishashe, kandi giteguye neza, abe ariho mudutegurira ibya Pasika.»

¹⁶Abigishwa baragenda, bagera mu murwa, maze basanga bimeze uko yabibabwiye, batunganya ibya Pasika.

¹⁷Bugorobye, Yezu azana na ba Cumi na babiri.

¹⁸Nuko igihe bari ku meza barya, Yezu aravuga ati «Ndababwira ukuri: umwe muri mwe dusangira, agiye kungambanira.»

¹⁹Nuko barashavura, batangira kumubaza umwe umwe bati «Mbese yaba ari jyewe?»

²⁰Arabasubiza ati «Ni umwe muri ba Cumi na babiri; dore dukoreye ku mbehe rimwe.

²¹Koko Umwana w’umuntu aragiye, nk’uko ibyanditswe bimuvuga, ariko hagowe uwemeye kumugambanira! Ibyiza ni uko uwo muntu aba ataravutse.»

²²Nuko igihe bafunguraga, Yezu afata umugati, amaze gushimira Imana, arawumanyura, arawubahereza avuga ati «Nimwakire: iki ni umubiri wanjye.»

²³Hanyuma afata inkongoro, amaze gushimira Imana, arayibahereza, maze bayinyweraho bose.

²⁴Nuko arababwira ati «Iki ni amaraso yanjye y’Isezerano, amenewe abantu batabarika.

²⁵Ndababwira ukuri: Nta bwo nzongera kunywa ku mbuto y’imizabibu, kugeza ku munsi nzanywera divayi nshya[54] mu Ngoma y’Imana.»

²⁶Bamaze kuririmba zaburi[55], barasohoka bagana ku musozi w’Imizeti.

²⁷Yezu arababwira ati «Mwese ibigiye kumbaho biratuma muhungabana, kuko byanditswe ngo ’Nzakubita umushumba, maze intama zitatane.’

²⁸Ariko nimara kuzuka, nzabatanga mu Galileya.»

²⁹Petero aramubwira ati «N’aho bose bahungabana, jye ntibizambaho!»

³⁰Yezu aramusubiza ati «Ndakubwira ukuri: None muri iri joro, isake itarabika ubwa kabiri, uraba umaze kunyihakana gatatu.»

³¹Ariko we arakomeza ati «N’aho nagomba gupfana nawe, sinakwihakana!» Abandi bose na bo bavuga batyo.

³²Nuko bajya mu murima witwa Getsemani, maze Yezu abwira abigishwa be ati «Nimube mwicaye hano, umwanya ngiye gusenga.»

³³Yezu ajyana na Petero na Yakobo na Yohani, maze atangira kugira ubwoba n’ishavu.

³⁴Arababwira ati «Umutima wanjye ushavuye byo gupfa; nimugume aha, maze mube maso.»

³⁵Yigiye imbere gato, yikubita hasi, arasaba ngo niba bishoboka, iyo saha ice kure ye.

³⁶Yaravugaga ati «Abba, Dawe ! Byose biragushobokera : igizayo iyi nkongoro ; nyamara ntibibe uko jye nshaka, ahubwo bibe uko wowe ushaka.»

³⁷Yezu aragaruka, asanga basinziriye; abwira Petero ati «Simoni, urasinziriye, ntiwashoboye kuba maso isaha n’imwe?

³⁸Nimube maso, musenge kugira ngo mutaza kugwa mu gishuko; koko umutima w’umuntu uharanira ibyiza, ariko umubiri we ukagira intege nke.»

³⁹Yezu asubirayo, yongera kwambaza avuga nka mbere.

⁴⁰Hanyuma agarutse, asanga na none basinziriye, kuko amaso yabo yari aremerewe; nuko ntibabona icyo bamusubiza.

⁴¹Ubwa gatatu araza, arababwira ati «Noneho nimusinzire, muruhuke! Nimurekere aho. Isaha irageze; dore Umwana w’umuntu agiye gushyirwa mu maboko y’abanyabyaha.

⁴²Nimuhaguruke tugende! Dore untanga ari hafi.»

⁴³Nuko ako kanya akivuga, Yuda umwe muri ba Cumi na babiri azana n’igitero cy’abantu bafite inkota n’ibibando, boherejwe n’abaherezabitambo bakuru, n’abigishamategeko, n’abakuru b’imiryango.

⁴⁴Umugambanyi yari yabahaye ikimenyetso, ati «Uwo nza guhobera nkamusoma, araba ari we: mumufate, maze mumujyane, mumenye ntabacike.»

⁴⁵Nuko Yuda araza yegera Yezu, ati «Mwigisha!»; nuko aramusoma.

⁴⁶Ba bandi bahita basumira Yezu ubwo, baramufata.

⁴⁷Umwe mu bari aho, akura inkota ayikubita umugaragu w’umuherezabitambo mukuru, amuca ugutwi.

⁴⁸Nuko Yezu arababwira ati «Mwaje kumfata mufite inkota n’ibibando nk’aho ndi igisambo!

⁴⁹Nyamara iminsi yose nabaga ndi kumwe namwe mu Ngoro y'Imana nigisha, ntimwamfashe. Ariko ibi bibereye kugira ngo Ibyanditswe byuzuzwe.»

⁵⁰Nuko bose bamusiga aho barahunga.

⁵¹Hari umusore[56] wari ukurikiye Yezu, yifubitse igishura cyonyine; nuko baramufata.

⁵²We rero arabiyaka, abasigira igishura mu ntoki, ahunga yambaye ubusa.

⁵³Nuko Yezu bamushyira umuherezabitambo mukuru, maze abatware b’abaherezabitambo, n’abakuru b’imiryango, n’abigishamategeko, baraterana bose.

⁵⁴Petero akaba yari yamukurikiriye kure, kugera mu ngoro y’umuherezabitambo mukuru, maze yicarana n’abagaragu ku ikome, arota.

⁵⁵Ubwo rero abatware b’abaherezabitambo n’inama nkuru yose bashaka icyo bashinja Yezu kugira ngo bamucire urwo gupfa, ariko barakibura.

⁵⁶Benshi nanone bamushinjaga ibitari byo, n’ibyo bamushinje ntibabihuze.

⁵⁷Bamwe barahaguruka, bamushinja ibinyoma bavuga bati

⁵⁸«Twamwumvise avuga ati ’Jyewe nzasenya iyi Ngoro yubatswe n’amaboko y’abantu, maze mu minsi itatu nubake indi itubakishijwe amaboko y’abantu.’»

⁵⁹Ariko no kuri ibyo, uko bamuregaga ntibabihuze.

⁶⁰Nuko umuherezabitambo mukuru arahaguruka, ahagarara hagati y’iteraniro, abaza Yezu ati «Nta cyo usubiza ku byo aba bantu bakurega?»

⁶¹We rero araceceka, ntiyagira icyo asubiza. Umuherezabitambo mukuru arongera aramubaza ati «Mbese uri Kristu, Umwana wa Nyagusingizwa?»

⁶²Yezu arasubiza ati «Ndi we, byongeye kandi muzabona Umwana w’umuntu yicaye iburyo bwa Nyir’ububasha, munamubone aje ku bicu[57] by’ijuru.»

⁶³Nuko umuherezabitambo mukuru ashishimura imyambaro ye, avuga ati «Abagabo bandi dushaka ni ab’iki?

⁶⁴Mwiyumviye ukuntu atutse Imana. Mubitekerezaho iki?» Bose bahamya ko akwiye gupfa.

⁶⁵Hanyuma bamwe batangira kumuvunderezaho amacandwe no kumupfuka mu maso, no kumukubita inshyi, bamubwira bati «Ngaho duhanurire!» Abagaragu na bo bamukubita inshyi.

⁶⁶Icyo gihe Petero yari mu rugo, maze haza umwe mu baja b’umuherezabitambo mukuru.

⁶⁷Abonye Petero yota aramwitegereza, maze aramubwira ati «Nawe wari kumwe na Yezu w’i Nazareti!»

⁶⁸Petero ahakana avuga ati «Ibyo simbizi, sinumva icyo ushaka kuvuga.» Arahaguruka, ajya ku irembo.

⁶⁹Wa muja yongera kumwitegereza, abwira abari aho ati «Koko uriya ni umwe muri bo!»

⁷⁰We ariko arongera arahakana. Hashize akanya, abari aho babwira Petero bati «Ni ukuri, uri umwe muri bo! Byongeye uri Umunyagalileya.»

⁷¹Nuko we atangira kurahira yimazeyo ati «Uwo muntu muvuga, nta bwo muzi!» Ako kanya isake ibika ubwa kabiri.

⁷²Nuko Petero yibuka ijambo Yezu yari yamubwiye ati «Isake itarabika ubwa kabiri, uzaba unyihakanye gatatu.» Nuko araturika ararira.