Read kinyarwanda Mariko 16 Bible Online

Mariko 16 - kinyarwanda bible

Mariko 16

¹Isabato irangiye, Mariya Madalena na Mariya nyina wa Yakobo na Solome, bagura imibavu yo kumusiga.

²Nuko mu gitondo cya kare, ku wa mbere w’isabato, bajya ku mva, izuba rirashe.

³Baravugana bati «Ni nde uri buduhirikire ibuye riri ku muryango w’imva?»

⁴Nuko bitegereje, babona ibuye rihirikiye iruhande; nyamara ryari rinini cyane.

⁵Binjiye mu mva, babona umusore wari wicaye iburyo, yambaye ikanzu yera, maze bashya ubwoba.

⁶Nuko arababwira ati «Mwigira ubwoba. Murashaka Yezu w’i Nazareti, uwabambwe ku musaraba; yazutse, ntakiri hano. Ngaho nimwirebere n’aho bari bamushyize.

⁷Ahubwo nimujye kubwira abigishwa be, na Petero, ko abatanze mu Galileya; ni ho muzamubonera nk’uko yabibabwiye.»

⁸Basohoka mu mva bahunga, kuko umushyitsi n’ubwoba byari byabatashye. Nuko ntibagira uwo babibwira[63], kuko bari bafite ubwoba.

⁹Yezu amaze kuzuka mu gitondo cy’uwa mbere w’isabato, abanza kubonekera Mariya Madalena[64], uwo yari yarirukanyemo roho mbi ndwi.

¹⁰Nuko Mariya ajya kubimenyesha abari barabanye na we, bari bakiri mu mubabaro n’amarira.

¹¹Bumvise ko Yezu ari muzima, kandi ko yamubonye, ntibamwemera.

¹²Hanyuma Yezu yongera kubonekera babiri muri bo[65], bari mu nzira bajya mu cyaro, bamubona asa ukundi.

¹³Na bo bajya kubimenyesha abandi, ariko ntibabemera.

¹⁴Hanyuma abonekera ba bandi Cumi n’umwe, bari ku meza, maze abatonganyiriza ukutemera kwabo n’umutima wabo unangiye, kuko bari banze kwemera abari bamubonye amaze kuzuka.

¹⁵Ni bwo ababwiye ati «Nimujye mu isi hose, mwamamaze Inkuru Nziza mu biremwa byose.

¹⁶Uzemera akabatizwa azakira; utazemera azacibwa.

¹⁷Dore kandi n’ibimenyetso bizaranga abazaba bemeye: mu izina ryanjye bazirukana roho mbi, bazavuga indimi nshya,

¹⁸bazafata inzoka; nibagira kandi icyo banywa cyica, nta cyo kizabatwara; bazaramburira ibiganza ku barwayi bakire.»

¹⁹Nuko Nyagasani Yezu amaze kubabwira atyo, ajyanwa mu ijuru, maze yicara iburyo bw’Imana.

²⁰Naho bo baragenda, bajya kwigisha hose. Nyagasani yabibafashagamo, kandi ijambo ryabo akarikomeresha ibimenyetso byariherekezaga.