Read kinyarwanda Mariko 8 Bible Online

Mariko 8 - kinyarwanda bible

Mariko 8

¹Muri iyo minsi, hongera kuza imbaga y’abantu badafite ibyo kurya. Yezu ahamagara abigishwa be arababwira ati

²«Iyi mbaga nyifitiye impuhwe, kuko hashize iminsi itatu bankurikiye, kandi bakaba badafite ibyo kurya.

³Nimbasezerera batariye, baragwa mu nzira, kandi muri bo harimo abaturutse kure.»

⁴Abigishwa be baramusubiza bati «Imigati ihagije aba bantu bangana batya umuntu yayikura he muri ubu butayu?»

⁵Arababaza ati «Mufite imigati ingahe?» Bati «Irindwi.»

⁶Nuko ategeka rubanda kwicara hasi, maze afata ya migati irindwi, ashimira Imana, arayimanyura, maze ayiha abigishwa be ngo bayibahereze.

⁷Bayihereza imbaga. Bari bafite n’udufi dukeya; Yezu ashimira Imana, abategeka kutubahereza na two.

⁸Nuko bararya barahaga. Hanyuma bakoranya ibisate byasigaye, byuzura inkangara ndwi!

⁹Ubwo kandi bari nk’ibihumbi bine. Nuko Yezu arabasezerera.

¹⁰Aherako ajya mu bwato hamwe n’abigishwa be, agana mu karere ka Dalimanuta.

¹¹Abafarizayi baraza, maze batangira kumwiyenzaho bamusaba ikimenyetso giturutse mu ijuru, byo kumwinja.

¹²Nuko asuhuza umutima, ati «Kuki abantu b’iki gihe bashaka ikimenyetso? Ndababwira ukuri, nta kimenyetso abantu b’ubu bateze kubona.»

¹³Nuko abasiga aho, arongera ajya mu bwato agana ku yindi nkombe y’inyanja.

¹⁴Abigishwa bari bibagiwe kujyana imigati, maze bakagira umugati umwe gusa mu bwato.

¹⁵Nuko Yezu arabihanangiriza ati «Murabe maso, kandi mwirinde umusemburo w’Abafarizayi[27] n’umusemburo wa Herodi.»

¹⁶Bo rero batangira kujya impaka ngo nta migati bafite.

¹⁷Yezu abimenye, arababwira ati «Kuki mujya impaka ngo nta migati mufite? Ntimurumva kandi ntimurasobanukirwa? Mbese umutima wanyu uracyanangiye?

¹⁸Mufite amaso ntimubone, mukagira n’amatwi ntimwumve? Kandi ntimwibuka,

¹⁹igihe manyuriye imigati itanu abantu ibihumbi bitanu, mwahakuye inkangara zingahe zuzuye ibisate?» Baramusubiza bati «Ni cumi n’ebyiri.»

²⁰Arongera ati «N’igihe manyuriye imigati irindwi abantu ibihumbi bine, mwahakuye inkangara zingahe zuzuye ibisate?» Baramusubiza bati «Ni indwi.»

²¹Nuko arababwira ati «Na n’ubu ntimurasobanukirwa?»

²²Ngo bagere i Betsayida, abantu bamuzanira impumyi, bamwingingira ko ayikoraho.

²³Afata impumyi ukuboko, ayikura mu rusisiro, ayisiga amacandwe ku maso, ayiramburiraho n’ibiganza, maze arayibaza ati «Hari icyo ubona?»

²⁴Impumyi irambura amaso, iramusubiza iti «Ndabona abantu, barasa n’ibiti, ariko baragenda.»

²⁵Yezu arongera ashyira ibiganza ku maso ye, undi atangira kubona bigaragara, arakira, abona neza ibintu byose uko biri.

²⁶Nuko Yezu amwohereza iwe, amubwira ati «Ntiwinjire no mu rusisiro.»

²⁷Yezu ajyana n’abigishwa be, agana mu nsisiro za Kayizareya ya Filipo. Bakiri mu nzira, abaza abigishwa be ati «Abantu bavuga ko ndi nde?»

²⁸Baramusubiza bati «Ngo uri Yohani Batisita, abandi ngo uri Eliya; naho abandi ngo uri umwe mu bahanuzi.»

²⁹Ati «Mwebwe se, muvuga ko ndi nde?» Petero aramusubiza ati «Uri Kristu[28].»

³⁰Nuko Yezu arabihanangiriza ngo ntibagire uwo babibwira.

³¹Nuko atangira kubigisha ko Umwana w’umuntu agomba kuzababara cyane, agacibwa n’abakuru b’imiryango, n’abaherezabitambo bakuru, n’abigishamategeko, akicwa, ariko akazazuka nyuma y’iminsi itatu.

³²Ibyo yabibabwiye akomeje. Nuko Petero aramwihugikana, atangira kumutonganya.

³³We ariko arahindukira, maze areba abigishwa be, acyaha Petero, amubwira, ati «Hoshi, mva iruhande, Sekibi! Kuko ibitekerezo byawe bitavuye ku Mana, ahubwo ku bantu!»

³⁴Nuko ahamagara rubanda hamwe n’abigishwa be, arababwira ati «Niba hari ushaka kunkurikira, yiyibagirwe ubwe, aheke umusaraba we, maze ankurikire!

³⁵Kuko uzashaka gukiza ubugingo bwe azabubura, naho uzahara ubugingo bwe kubera jyewe n’Inkuru Nziza, azabukiza.

³⁶Umuntu watunga iby’isi yose, ariko akabura ubugingo bwe, byaba bimumariye iki?

³⁷Cyangwa se umuntu yagurana iki ubugingo bwe?

³⁸Koko rero, umuntu uzanyihakana agahinyura n’amagambo yanjye imbere ya bariya bantu b’abasambanyi kandi b’abanyabyaha, Umwana w’umuntu na we azamwihakana igihe azazira mu ikuzo rya Se, ashagawe n’abamalayika batagatifu.»