Read kinyarwanda Mariko 9 Bible Online

Mariko 9 - kinyarwanda bible

Mariko 9

¹Nuko yungamo ati «Ndababwira ukuri: mu bari hano, harimo abatazapfa batabonye Ingoma y’Imana ije mu bubasha[29].»

²Hashize iminsi itandatu, Yezu ajyana na Petero, na Yakobo, na Yohani ukwabo mu mpinga y’umusozi muremure. Nuko yihindura ukundi mu maso yabo.

³Imyambaro ye irererana, irabengerana bitambutse kure uburyo umumeshi wo ku isi yashobora kuyeza.

⁴Ubwo Eliya arababonekera hamwe na Musa, baganira na Yezu.

⁵Petero ni ko guterura abwira Yezu ati «Mwigisha, kwibera hano nta ko bisa; reka tuhace ibiraro bitatu, kimwe cyawe, ikindi cya Musa, n’ikindi cya Eliya.»

⁶Yari yabuze icyo avuga, kuko bari bahiye ubwoba.

⁷Nuko igicu kirabatwikira, maze muri icyo gicu haturukamo ijwi riti «Uyu ni umwana wanjye nkunda cyane, nimumwumve!»

⁸Ako kanya, barebye hirya no hino, ntibagira undi wundi bongera kubona, uretse Yezu wenyine wari kumwe na bo.

⁹Mu gihe bamanukaga umusozi, Yezu abategeka kutazagira uwo batekerereza ibyo bari bamaze kubona, kugera igihe Umwana w’umuntu azaba amaze kuzuka mu bapfuye.

¹⁰Bakomeza kuzirikana iryo jambo, ariko banabazanya bati «Kuzuka mu bapfuye bivuga iki?»

¹¹Abigishwa babaza Yezu bati «Ni kuki abigishamategeko bavuga ko Eliya ari we ugomba kubanza kuza?»

¹²Arabasubiza ati «Koko Eliya azabanza aze atunganye byose. Nyamara se kuki byanditswe ngo Umwana w’umuntu azababazwa ku buryo bwinshi kandi asuzugurwe?

¹³Reka rero mbibabwire: Eliya yaraje, kandi bamugiriye uko bishakiye, nk’uko Ibyanditswe bimuvuga.»

¹⁴Igihe rero bazaga basanga abigishwa be, babona ikivunge cy’abantu kibakikije n’abigishamategeko bajyaga impaka na bo.

¹⁵Rubanda rwose bakimurabukwa, barahomboka, maze biruka bajya kumusuhuza.

¹⁶Arababaza ati «Icyo mujyaho impaka na bo ni iki?»

¹⁷Umwe muri rubanda aramusubiza ati «Mwigisha, nakuzaniye umwana wanjye wahanzweho na roho mbi y’ikiragi.

¹⁸Iyo imweguye, imutura hasi, maze akazana urufuro, agahekenya amenyo, kandi akagagara. Nasabye abigishwa bawe kuyirukana, ntibabishobora.»

¹⁹Arababwira ati «Yemwe bantu b’iki gihe mutemera! Nzabana namwe kugeza ryari? Nzabiyumanganya mpereze hehe? Nimunzanire uwo mwana.»

²⁰Baramumuzanira. Roho mbi ikibona Yezu, icugusa umwana cyane, yikubita hasi, arigaragura azana urufuro.

²¹Yezu abaza se ati «Hashize igihe kingana iki agirwa atya?» Se aramusubiza ati «Kuva mu bwana bwe.

²²Incuro nyinshi yamuroshye mu muriro no mu mazi kugira ngo imwice; ariko niba hari icyo ushobora, tubabarire udutabare!»

²³Yezu aramubwira ati «Ngo niba hari icyo ushobora . . . ? Erega byose bishobokera uwemera!»

²⁴Ako kanya se w’umwana arangurura ijwi ati «Ndemera! Ariko komeza ukwemera kwanjye guke!»

²⁵Yezu abonye abantu baza banigana, akabukira roho mbi avuga ati «Wowe roho mbi, umubuza kuvuga no kumva, ndagutegetse: va muri uwo mwana, kandi ntukamugarukemo ukundi.»

²⁶Roho mbi ivuza induru, icugusa umwana cyane, imusohokamo. Nuko uwo mwana amera nk’uwapfuye, ndetse bituma abantu benshi bavuga ngo «Yapfuye!»

²⁷Naho Yezu amaze kumufata ukuboko, aramuhagurutsa, umwana arahagarara.

²⁸Yezu yinjiye mu nzu, abigishwa be bamubariza ahiherereye bati «Kuki twebwe tutashoboye kuyirukana?»

²⁹Arabasubiza ati «Buriya bwoko bwa roho mbi, nta kindi gishobora kubwirukana, usibye isengesho.»

³⁰Bavuye aho ngaho, bambukiranya Galileya, ariko Yezu ntiyashakaga ko babimenya.

³¹Yigishaga abigishwa be, ababwira ati «Umwana w’umuntu agiye gushyirwa mu maboko y’abantu, bakazamwica, ariko yamara gupfa, akazazuka ku munsi wa gatatu.»

³²Iryo jambo ariko ntibaryumva, batinya no kumubaza.

³³Nuko bagera i Kafarinawumu. Bari mu nzu, Yezu arababaza ati «Mu nzira mwajyaga impaka z’iki?»

³⁴Baraceceka, kuko mu nzira bari bagiye impaka zo kumenya umukuru muri bo.

³⁵Amaze kwicara, ahamagara ba Cumi na babiri, arababwira ati «Ushaka kuba uwa mbere, azigire uwa nyuma muri bose, abe n’umugaragu wa bose.»

³⁶Nuko afata umwana, amuhagarika hagati yabo, aramuhobera, arababwira ati

³⁷«Umuntu wese wakira umwana nk’uyu nguyu, ari jye abigirira, ni jye aba yakiriye. Kandi unyakira wese, si jyewe aba yakiriye, ahubwo aba yakiriye Uwantumye.»

³⁸Yohani aramubwira ati «Mwigisha, twabonye umuntu wirukana roho mbi mu izina ryawe kandi atadukurikira; turabimubuza kuko atadukurikira.»

³⁹Yezu ati «Mwibimubuza, kuko nta muntu ushobora gukora igitangaza mu izina ryanjye, maze ngo ahindukire amvuge nabi.

⁴⁰Utaturwanya wese ari kumwe natwe.

⁴¹Umuntu wese uzabaha ikirahuri cy’amazi yo kunywa abitewe n’uko muri aba Kristu, ndababwira ukuri, ntazabura igihembo cye.

⁴²Ariko nihagira ugusha mu cyaha umwe muri aba bato bemera, ikimukwiye ni uko bamuhambira ku ijosi urusyo rusheshwa[30] n’indogobe, bakamuroha mu nyanja.

⁴³Niba ikiganza cyawe kigutera gukora icyaha, ugice, kuko ikiruta ari ukwinjirana akanimfu mu bugingo[31],

⁴⁴aho kujyana ibiganza byawe byombi mu nyenga y’umuriro utazima.

⁴⁵Niba ikirenge cyawe kigutera gukora icyaha, ugice, kuko ikiruta ari ukwinjira mu bugingo ucumbagira,

⁴⁶aho kurohwa mu nyenga ufite ibirenge byawe byombi.

⁴⁷Niba ijisho ryawe rigutera gukora icyaha, rinoboremo; kuko ikiruta ari uko wakwinjirana rimwe mu Ngoma y’Imana, aho kwinjirana yombi mu nyenga,

⁴⁸aho urunyo rudapfa, n’umuriro ntuzime.

⁴⁹Ahubwo buri wese ajye asukurwa n’umunyu n’umuriro[32].

⁵⁰Umunyu ufite akamaro; ariko iyo ukayutse; mwawusubiza mute uburyohe bwawo? Nimwigiremo umunyu kandi mubane mu mahoro.»