Read kinyarwanda Luka 10 Bible Online

Luka 10 - kinyarwanda bible

Luka 10

¹Nyuma y’ibyo Nyagasani ahitamo n’abandi mirongo irindwi na babiri, maze abohereza imbere ye babiri babiri, mu migi yose n’ahandi hose yajyaga kunyura.

²Arababwira ati «Imirima yeze ni myinshi, ariko abasaruzi ni bake ; nimusabe rero Nyirimyaka yohereze abasaruzi mu mirima ye.

³Ngaho nimugende; dore mbohereje nk’abana b’intama mu birura.

⁴Ntimugire icyo mujyana, kaba agasaho k’ibiceri, waba umufuka, zaba inkweto; kandi mwirinde guhera mu nzira muramukanya.

⁵Urugo rwose mwinjiyemo, mubanze muvuge muti ’Amahoro abe muri uru rugo !’

⁶Nihaba umuntu w’amahoro, amahoro yanyu azamusakaraho; nahabura azabagarukira.

⁷Mugume muri iyo nzu, munywe kandi murye icyo babahaye, kuko umukozi akwiriye igihembo cye. Ntimukave mu nzu mujya mu yindi.

⁸Umugi wose muzinjiramo bakabakira, muzarye ibyo babahereje.

⁹Mukize n’abarwayi muhasanze, kandi mubabwire muti ’Ingoma y’Imana ibari hafi!’

¹⁰Naho rero umugi wose muzinjiramo ntibabakire, muzajye mu materaniro yabo, muvuge muti

¹¹’Dore n’umukungugu w’umugi wanyu wadufashe ku birenge, turawukunguse kandi turawubasigiye! Icyakora mubimenye neza, Ingoma y’Imana iri hafi.’

¹²Ndabibabwiye: kuri wa munsi w’urubanza, Sodoma[61] izababarirwa kurusha uwo mugi.

¹³Iyimbire, Korazini! Iyimbire, Betsayida! Kuko ibitangaza byabakorewemo, iyo bikorerwa muri Tiri no muri Sidoni, kuva kera baba barisubiyeho, bakambara ibigunira bakisiga ivu.

¹⁴Nyamara ku munsi w’urubanza muzahanwa kurusha Tiri na Sidoni.

¹⁵Naho wowe, Kafarinawumu, ubona ko uzakuzwa kugera mu bicu? Uzarohwa mu kuzimu!

¹⁶Ubumva, ni jye aba yumva; ubahinyura, ni jye aba ahinyura, kandi umpinyuye aba ahinyuye n’Uwantumye.»

¹⁷Ba bigishwa uko bari mirongo irindwi na babiri, bagaruka bishimye cyane, bavuga bati «Mwigisha, na roho mbi ziratwumvira kubera izina ryawe.»

¹⁸Arababwira ati «Koko nabonaga Sekibi ahanuka ku ijuru nk’umurabyo.

¹⁹Dore mbahaye ububasha bwo kuribata inzoka na za manyenga, n’ubwo gutsinda umwanzi wese kandi nta kizashobora kubahuganya.

²⁰Nyamara, ntimwishimire ko roho mbi zibumvira, ahubwo nimwishimire ko amazina yanyu yanditse mu ijuru.»

²¹Ako kanya, Yezu ahimbazwa na Roho Mutagatifu, maze aravuga ati «Dawe, Mutegetsi w’ijuru n’isi, ngushimiye ko ibyo wabihishe abanyabwenge n’abahanga, ukabihishurira abaciye bugufi. Koko, Dawe, ni ko wabyishakiye.

²²Byose nabyeguriwe na Data, kandi nta we uzi Mwana uwo ari we keretse Data, nta n’uzi Data uwo ari we keretse Mwana n’uwo Mwana ashatse kubihishurira.»

²³Hanyuma ahindukirira abigishwa be, ababwirira ukwabo ati «Hahirwa amaso abona ibyo muruzi!

²⁴Ndababwira ukuri: abahanuzi benshi n’abami benshi bifuje kubona ibyo muruzi ntibabibona, no kumva ibyo mwumva ntibabyumva.»

²⁵Nuko umwigishamategeko arahaguruka, amubaza amwinja ati «Mwigisha, ngomba gukora iki kugira ngo ndonke ubugingo bw’iteka?»

²⁶Yezu aramubwira ati «Mu Mategeko handitsemo iki? Usomamo iki?»

²⁷Undi aramusubiza ati «Uzakunde Nyagasani Imana yawe, n’umutima wawe wose, n’amagara yawe yose, n’imbaraga zawe zose, n’ubwenge bwawe bwose, kandi uzakunde mugenzi wawe nk’uko wikunda[62].»

²⁸Yezu aramubwira ati «Ushubije neza; ubigenze utyo, uzagira ubugingo.»

²⁹Nyamara we, kugira ngo yikure mu isoni[63], abwira Yezu ati «Ariko se mugenzi[64] wanjye ni nde?»

³⁰Yezu araterura ati «Umuntu yamanutse i Yeruzalemu ajya i Yeriko[65], maze agwa mu gico cy’abajura, baramwambura, baramuhondagura maze bamusiga ari intere.

³¹Umuherezabitambo[66] aza kumanuka muri iyo nzira, aramubona arihitira.

³²Haza n’umulevi, na we aramubona arihitira.

³³Nuko Umunyasamariya wari mu rugendo amugeze iruhande, aramubona amugirira impuhwe.

³⁴Aramwegera, apfuka ibikomere bye amaze kubyomoza amavuta na divayi[67]. Hanyuma amwuriza indogobe ye, amujyana ku icumbi, amwitaho.

³⁵Bukeye afata amadenari abiri, ayaha nyir’icumbi, aramubwira ati ’Umwiteho maze ibindi uzamutangaho, nzabikwishyura ngarutse.’

³⁶Muri abo uko ari batatu, uwo ukeka ko ari mugenzi w’uwaguye mu gico cy’abajura ni uwuhe?»

³⁷Umwigishamategeko arasubiza ati «Ni uwamugiriye impuhwe.» Yezu aramubwira ati «Genda, nawe ugenze utyo.»

³⁸Yezu akomeza urugendo n’abigishwa be, agera mu rusisiro, maze umugore witwa Marita[68] aramwakira.

³⁹Yari afite mwene nyina witwa Mariya, akaba yicaye iruhande rw’ibirenge bya Nyagasani, yumva amagambo ye.

⁴⁰Marita we yari ahugiye mu byo gushaka amazimano. Ageze aho, araza abwira Yezu ati «Mwigisha, nta cyo bikubwiye kubona murumuna wanjye amparira imirimo yose? Mubwire aze amfashe!»

⁴¹Ariko Nyagasani aramusubiza ati «Marita, Marita, uhagaritse umutima kandi urahihibikanywa na byinshi;

⁴²nyamara ibya ngombwa ni bike, ndetse ni kimwe[69] gusa. Mariya rero yahisemo umugabane mwiza, udateze kuzamwamburwa.»