Read kinyarwanda Luka 15 Bible Online

Luka 15 - kinyarwanda bible

Luka 15

¹[92] Nuko abasoresha n’abanyabyaha basanga Yezu bose, bashaka kumwumva.

²Abafarizayi n’abigishamategeko batangira kwijujuta, bavuga bati «Uyu muntu ko yakira abanyabyaha akanasangira na bo!»

³Nuko Yezu abacira uyu mugani, ati

⁴«Ni nde muri mwe wagira intama ijana, imwe muri zo yazimira, ntasige za zindi mirongo urwenda n’icyenda ku gasozi, akajya gushakashaka iyazimiye kugeza igihe ayiboneye?

⁵Iyo amaze kuyibona ayiterera ku bitugu yishimye.

⁶Yagera iwe agakoranya incuti n’abaturanyi, akababwira ati ’Nimuze twishimane, kuko nabonye intama yanjye yari yazimiye!’

⁷Ndabibabwiye: nguko uko umunyabyaha umwe wisubiraho azatera ibyishimo mu ijuru, birenze iby’intungane mirongo urwenda n’icyenda zidakeneye kwisubiraho.

⁸Cyangwa se, ni nde mugore wagira ibiceri cumi, kimwe cyatakara, ntacane itara ngo akubure inzu, ashakashake kugeza igihe akiboneye.

⁹Iyo amaze kukibona akoranya incuti n’abaturanyi, akababwira ati ’Nimuze twishimane, kuko nabonye igiceri cyanjye nari natakaje!’

¹⁰Ndabibabwiye: nguko uko abamalayika b’Imana bazishima kubera umunyabyaha umwe wisubiyeho.»

¹¹Arongera ati «Umugabo yari afite abahungu babiri.

¹²Umutoya abwira se ati ’Dawe, mpa umunani ungenewe.’ Nuko se abagabanya ibye.

¹³Hashize iminsi mike, umutoya akoranya ibye byose, ajya mu gihugu cya kure. Nuko ahatagaguriza ibye yibera mu maraha.

¹⁴Amaze kubitsemba byose, muri icyo gihugu hatera inzara ikaze, nuko aratindahara.

¹⁵Ni bwo agiye gusaba akazi umuturage w’icyo gihugu, amwohereza kuragira ingurube mu isambu ye.

¹⁶Yifuzaga kuba yahemburwa n’ibishishwa ingurube zaryaga, ariko ntihagire ubimuha.

¹⁷Bigeze aho, aribwira ati ’Nyamara se kwa data hari abakozi bangana iki barya bakanabisigaza, naho jyewe nicirwa n’inzara hano!

¹⁸Reka mpaguruke nsange data, mubwire nti: Dawe, nacumuye ku Mana no kuri wowe.

¹⁹Singikwiriye kwitwa umwana wawe, none ngira nk’umwe mu bakozi bawe.’

²⁰Nuko arahaguruka asanga se. Akiri kure, se aramurabukwa, yumva impuhwe ziramusabye. Ariruka ajya kumugwa mu nda, aramuramutsa amusomagura.

²¹Nuko umwana aramubwira ati ’Dawe, nacumuye ku Mana no kuri wowe, singikwiriye kwitwa umwana wawe.’

²²Naho se abwira abagaragu be ati ’Vuba, muzane ikanzu nziza cyane muyimwambike, mumwambike n’impeta mu rutoki n’inkweto mu birenge.

²³Muzane ikimasa cy’umushishe, mukibage, turye twishime,

²⁴kuko uyu mwana wanjye yari yarapfuye, none yazutse; yari yarazimiye, none yatahutse!’ Nuko batangira kwishima.

²⁵Icyo gihe umwana we w’imfura[93] yari mu murima. Arahinguka, ageze hafi y’urugo yumva baririmba, umudiho ari wose.

²⁶Nuko ahamagara umwe mu bagaragu, amubaza ibyo ari byo.

²⁷Undi aramusubiza ati ’Ni murumuna wawe wagarutse; none so yabaze ikimasa cy’umushishe, kuko yamubonye ari mutaraga.’

²⁸Aherako ararakara, yanga kujya mu rugo. Se arasohoka, aramuhendahenda ngo aze.

²⁹Nuko abwira se ati ’Reba imyaka yose maze ngukorera; nta n’itegeko ryawe na rimwe ndengaho, nyamara ntiwigeze umpa n’agahene ngo ngasangire n’incuti zanjye.

³⁰None uriya muhungu wawe wagarutse amaze kumarira ibintu byawe mu ndaya, ube ari we ubagishiriza ikimasa cy’umushishe!’

³¹Nuko se aramusubiza ati ’Mwana wanjye, wowe iteka tuba turi kumwe, kandi ibyanjye byose ni ibyawe.

³²Ariko byari ngombwa rwose ko dukora umunsi mukuru, tukishima, kuko uriya muvandimwe wawe ureba yari yarapfuye none yazutse, yari yarazimiye none yatahutse!’»