Read kinyarwanda Luka 18 Bible Online

Luka 18 - kinyarwanda bible

Luka 18

¹Hanyuma abacira umugani, abumvisha ko ari ngombwa gusenga iteka batarambirwa.

²Nuko aravuga ati «Mu mugi umwe hari umucamanza utatinyaga Imana, ntiyubahe n’abantu.

³Muri uwo mugi hari n’umupfakazi wazaga kumubwira ati ’Nkiranura n’uwo duhora tuburana!’

⁴Amwirengagiza igihe kirekire. Ageze aho, aribwira ati ’N’ubwo ndatinya Imana bwose, kandi singire uwo nubaha,

⁵uriya mupfakazi wandembeje ngiye kumucira urubanza rwe rurangire, areke guhora aza kumena umutwe.’»

⁶Nyagasani arongera ati «Nimwumve ibyo uwo mucamanza mubi avuga.

⁷Imana se ni Yo yarangarana intore zayo, ntizirengere kandi ziyitakambira amanywa n’ijoro?

⁸Ndabibabwiye: izabarenganura vuba. Ariko se, igihe Umwana w’umuntu azazira, azasanga hakiri ukwemera ku isi?»

⁹Yezu yongera guca uyu mugani, awucira bamwe bibwiraga ko ari intungane, bagasuzugura abandi bose.

¹⁰Nuko aravuga ati «Abantu babiri bahuriye mu Ngoro baje gusenga. Umwe yari Umufarizayi, undi ari umusoresha.

¹¹Umufarizayi aremarara, asengera mu mutima we avuga ati ’Mana, ndagushimira ko ntameze nk’abandi bantu b’ibisambo, b’abahemu, b’abasambanyi, mbese nk’uriya musoresha!

¹²Nsiba kurya kabiri mu cyumweru, ngatanga kimwe cya cumi cy’urwunguko rwanjye rwose.’

¹³Umusoresha we yihagararira kure, atinya no kubura amaso ngo ayerekeze hejuru, maze yikomanga ku gituza avuga ati ’Mana yanjye, mbabarira jyewe w’umunyabyaha!’

¹⁴Ndabibabwiye: uwo musoresha yasubiye iwe ari intungane, naho ureke undi! Kuko uwikuza wese azacishwa bugufi, naho uwicisha bugufi akazakuzwa.»

¹⁵Nuko abantu bamuzanira n’abana babo b’ibitambambuga ngo abakoreho, ariko abigishwa babibonye barabakabukira.

¹⁶Yezu arabahamagara ati «Nimureke abana bansange, mwibabuza, kuko Ingoma y’Imana ari iy’abameze nka bo.

¹⁷Ndababwira ukuri: umuntu wese utazakira Ingoma y’Imana nk’umwana, ntazayinjiramo bibaho.»

¹⁸Nuko haza umunyacyubahiro, abaza Yezu ati «Mwigisha mwiza, nkore iki kugira ngo nzabone ubugingo bw’iteka ho umurage?»

¹⁹Yezu aramubwira ati «Kuki unyita mwiza? Nta mwiza ubaho, keretse Imana yonyine.

²⁰Uzi amategeko[103]: ntuzasambane, ntuzice, ntuzibe, ntuzahamye ibinyoma, urajye wubaha so na nyoko.»

²¹Uwo mugabo aramusubiza ati «Ibyo byose nabikurikije kuva nkiri muto.»

²²Yezu abyumvise, aramubwira ati «Ubuze ikintu kimwe gusa: gurisha ibyo utunze byose, maze ubigabanye abakene, uzagira ubukire mu ijuru; hanyuma uze unkurikire.»

²³We ariko abyumvise arijima, kuko yari atunze ibintu byinshi.

²⁴Yezu abibonye atyo, aravuga ati «Mbega ukuntu kuzinjira mu Ngoma y’Imana biruhije ku bakungu!

²⁵Byoroheye ingamiya guca mu mwenge w’urushinge kurusha uko byoroheye umukungu kwinjira mu Ngoma y’Imana!»

²⁶Ababyumvise baravuga bati «Ubwo se ni nde ushobora kurokoka?»

²⁷Arabasubiza ati «Ikidashobokera abantu, Imana iragishobora.»

²⁸Nuko Petero aravuga ati «Dore, twebwe twasize ibyacu byose, turagukurikira.»

²⁹Arabasubiza ati «Ndababwira ukuri: ntawe uzaba yarasize urugo rwe, cyangwa umugore we, cyangwa abavandimwe be, cyangwa ababyeyi be, cyangwa abana be, abigirira Ingoma y’Imana,

³⁰ngo abure kwiturwa ibirenzeho[104] muri iki gihe, no mu gihe kizaza akaziturwa ubugingo bw’iteka.»

³¹Nuko Yezu yihererana ba Cumi na babiri, arababwira ati «Dore tuzamutse tujya i Yeruzalemu, maze ibyanditswe n’abahanuzi byose byerekeye Umwana w’umuntu bizabe.

³²Koko bazamugabiza abanyamahanga, akubitwe, ashinyagurirwe, avunderezwe amacandwe;

³³kandi nibamara kumukubitisha ibiboko bazamwice, maze ku munsi wa gatatu azazuke.»

³⁴Nyamara bo, birabayobera. Ayo magambo ababera urujijo; ntibumva icyo Yezu yashakaga kuvuga.

³⁵Igihe yegereye i Yeriko, hakaba hari impumyi yicaye iruhande rw’inzira, isabiriza.

³⁶Yumvise abantu benshi bahitaga, abaza ibyo ari byo.

³⁷Baramusubiza bati «Ni Yezu w’i Nazareti uhise.»

³⁸Nuko atera hejuru ati «Yezu, Mwana wa Dawudi, mbabarira!»

³⁹Abari imbere baramucyaha ngo naceceke, ariko arushaho kurangurura ijwi, ati «Mwana wa Dawudi, mbabarira!»

⁴⁰Yezu arahagarara, ategeka ko bamumuzanira. Amugeze iruhande, aramubaza ati

⁴¹«Urashaka ko ngukorera iki?» Na we, ati «Nyagasani, mpa kubona!»

⁴²Yezu aramubwira ati «Ngaho bona; ukwemera kwawe kuragukijije!»

⁴³Ako kanya arabona, maze aramukurikira, agenda asingiza Imana. Abantu bose na bo babibonye, basingiza Imana.