Read kinyarwanda Luka 19 Bible Online

Luka 19 - kinyarwanda bible

Luka 19

¹Yezu ageze i Yeriko, yahuranya umugi.

²Nuko haza umugabo witwa Zakewusi, yari umutware w’abasoresha, akaba umukungu.

³Agerageza kubona Yezu uwo ari we ariko ntiyabishobora, kubera imbaga y’abantu, kandi akaba yari mugufi.

⁴Arirukanka, abacaho maze yurira igiti cy’umuvumu[105], agira ngo abone Yezu wari ugiye kunyura aho.

⁵Yezu ahageze yubura amaso, aramubwira ati «Zakewusi, manuka vuba kuko ngomba gucumbika iwawe uyu munsi.»

⁶Nuko amanuka bwangu, amwakirana ibyishimo.

⁷Ababibonye bose barijujuta, baravuga bati «Yagiye gucumbika ku munyabyaha!»

⁸Nuko Zakewusi yegera Nyagasani, aramubwira ati «Rwose, Mwigisha, kimwe cya kabiri cy’ibyo ntunze, ngihaye abakene; niba kandi hari uwo nahuguje, ndamusubiza ibye incuro enye.»

⁹Yezu ni ko kuvuga ati «Uyu munsi umukiro watashye muri iyi nzu, kuko uyu na we ari umwana wa Abrahamu[106].

¹⁰Koko rero, Umwana w’umuntu yazanywe no gushaka no kurokora ibyazimiye.»

¹¹Mu gihe abantu bari bamuteze amatwi, Yezu yongera kubacira umugani, kuko yari ageze hafi ya Yeruzalemu, kandi hakaba hari abibwiraga ko Ingoma y’Imana igiye kwigaragaza ako kanya.

¹²Nuko aravuga ati «Umuntu w’igikomangoma yagiye mu gihugu cya kure ajyanywe no kwimikwa, byarangira akagaruka.

¹³Nuko ahamagara icumi mu bagaragu be, abaha ibiceri cumi bya feza, arababwira ati ’Muzabikoreshe neza bizunguke kugeza igihe nzagarukira.’

¹⁴Ariko abaturage be baramwangaga, maze bamukurikiza intumwa zo kuvuga ngo ’Ntidushaka ko uriya atubera umwami!’

¹⁵Amaze rero kwimikwa, aragaruka, ahamagaza abagaragu yari yarahaye feza ze, kugira ngo amenye icyo buri muntu yungutse.

¹⁶Uwa mbere araza, aravuga ati ’Nyagasani, ifeza yawe yungutse izindi cumi.’

¹⁷Umwami aramubwira ati ’Ni uko, ni uko, mugaragu mwiza! Kubera ko wabaye inyangamugayo mu bintu bike, uzatwara imigi cumi.’

¹⁸N’uwa kabiri araza, ati ’Nyagasani, ifeza yawe yungutse izindi eshanu.’

¹⁹N’uwo nguwo umwami aramubwira ati ’Nawe uzatwara imigi itanu.’

²⁰Undi na we araza, ati ’Nyagasani, dore ifeza yawe, nayibitse neza mu gitambaro.

²¹Koko naragutinye, kuko uri umunyamwaga: utwara ibyo utabitse, ugasarura aho utabibye.’

²²Umwami aramusubiza ati ’Amagambo yawe umaze kwivugira ni yo ngiye kukuziza, wa mugaragu mubi we! Wari uzi ko ndi umunyamwaga, ntwara ibyo ntabitse, ngasarura ibyo ntabibye.

²³Wabujijwe n’iki gushyira feza yanjye mu isanduku y’ububiko, ngo ningaruka uyimpane n’inyungu yayo?’

²⁴Nuko abwira abari aho, ati ’Nimumwake ifeza ye, maze muyihe uzifite ari icumi.’

²⁵Baramubwira bati ’Nyagasani, ko afite se nyine icumi!’

²⁶Umwami arabasubiza ati ’Ndabibabwiye: ufite wese bazamwongerera, naho ufite ubusa bazamwambura n’utwo yari atunze.

²⁷Naho abanzi banjye banze ko mbabera umwami, nimubazane hano mubicire imbere yanjye.’»

²⁸Yezu amaze kuvuga ibyo abarangaza imbere, azamuka agana i Yeruzalemu.

²⁹Nuko agiye kugera i Betifage n’i Betaniya, hafi y’umusozi witwaga uw’Imizeti, yohereza babiri mu bigishwa be.

³⁰Arababwira ati «Nimujye mu ngo ziri imbere yanyu. Nimuhagera, murahasanga icyana cy’indogobe kiziritse, kitigeze kigira uwo giheka. Mukiziture, mukinzanire.

³¹Nihagira ubabaza ati ’Murakiziturira iki?’ mumusubize muti ’Nyagasani aragikeneye.’»

³²Intumwa ziragenda, zisanga bimeze uko Yezu yabibabwiye.

³³Igihe bakikizitura, ba nyiracyo barababaza bati «Icyo cyana cy’indogobe murakiziturira iki?»

³⁴Baravuga bati «Nyagasani aragikeneye.»

³⁵Nuko bakizanira Yezu. Bagereka ibishura byabo kuri cya cyana cy’indogobe, maze bicazaho Yezu.

³⁶Uko yagendaga, ni ko baramburaga imyambaro yabo mu nzira.

³⁷Ageze ahamanuka ku musozi w’Imizeti, abigishwa bose basagwa n’ibyishimo, batangira gusingiza Imana mu ijwi riranguruye kubera ibitangaza byose babonye.

³⁸Nuko batera hejuru bati «Nahabwe impundu Umwami uje mu izina rya Nyagasani[107]! Amahoro mu ijuru, n’ikuzo mu bushorishori bwaryo!»

³⁹Bamwe mu Bafarizayi bari muri rubanda, baravuga bati «Mwigisha, cecekesha abigishwa bawe!»

⁴⁰Yezu arabasubiza ati «Ndabibabwiye: n’iyo aba baceceka, amabuye yo yasakuza!»

⁴¹Amaze kwegera umugi no kuwitegereza, arawuririra,

⁴²avuga ati «Ubonye uyu munsi iyo ugera waramenye icyaguhesha amahoro! Noneho rero byarakwihishe.

⁴³N’iminsi iragusatiriye, maze abanzi bawe bazakugote, bagutangatange, bakwagirize impande zose.

⁴⁴Bazakurimburana n’abana bawe bazaba bakurimo, kandi ntibazagusigira n’ibuye rigeretse ku rindi, kuko utamenye igihe Imana yakugendereyeho[108].»

⁴⁵Hanyuma Yezu yinjira mu Ngoro y’Imana, atangira kuyirukanamo abacuruzi.

⁴⁶Arababwira ati «Haranditswe ngo: Inzu yanjye izaba inzu yo gusengeramo; naho mwebwe mwayigize ubuvumo bw’abambuzi[109].»

⁴⁷Buri munsi yigishirizaga mu Ngoro y'Imana. Abatware b’abaherezabitambo n’abigishamategeko, kimwe n’abakuru b’umuryango, bashaka ukuntu bamwicisha.

⁴⁸Nyamara ntibabona aho bamuturuka, kuko rubanda rwose bari bamuteze amatwi, bitaye cyane ku byo yavugaga.