Read kinyarwanda Luka 2 Bible Online

Luka 2 - kinyarwanda bible

Luka 2

¹Muri iyo minsi, Kayizari[19] Ogusito yaciye iteka ryo kubarura abantu bo mu bihugu byose yategekaga.

²Iryo barura rya mbere ryabaye igihe Kwirini yari umutware wa Siriya[20].

³Bose bajyaga kwiyandikisha, buri muntu mu mugi we.

⁴Yozefu na we ava mu mugi wa Nazareti ho mu Galileya, ajya mu mugi wa Dawudi witwaga Betelehemu yo mu Yudeya, kuko yari uwo mu muryango wa Dawudi,

⁵agira ngo abarwe, we n’umugore we Mariya wari utwite.

⁶Nuko bagezeyo, umunsi wo kubyara uragera.

⁷Abyara umuhungu we w’imfura[21], amworosa utwenda, amuryamisha mu kavure, kuko nta wundi mwanya[22] ukwiye bari babonye aho bacumbika.

⁸Muri ako karere hari abashumba barariraga amatungo yabo ku gasozi.

⁹Nuko Umumalayika wa Nyagasani abahagarara iruhande, ikuzo rya Nyagasani ribasesekazaho urumuri, maze bashya ubwoba.

¹⁰Malayika arababwira ati «Mwigira ubwoba, kuko mbazaniye inkuru ikomeye cyane, izashimisha umuryango wose.

¹¹None, mu mugi wa Dawudi, mwavukishije Umukiza ari we Kristu Nyagasani.

¹²Dore ikimenyetso kimubabwira: murasanga uruhinja rworoshe utwenda, ruryamye mu kavure.»

¹³Nuko ako kanya, inteko y’ingabo zo mu ijuru yifatanya na wa Mumalayika, basingiza Imana bavuga bati

¹⁴«Imana nikuzwe mu bushorishori bw’ijuru, kandi mu nsi abo ikunda bahorane amahoro.»

¹⁵Abamalayika babasiga aho, basubira mu ijuru. Nuko abashumba bajya inama bati «Nimucyo tujye i Betelehemu, turebe ibyabaye Nyagasani atumenyesheje.»

¹⁶Nuko bagenda bihuta, basanga Mariya na Yozefu, n’uruhinja ruryamye mu kavure.

¹⁷Bamaze kureba bamenyesha hose ibyo bari babwiwe kuri uwo Mwana.

¹⁸Maze ababumvaga bose, batangazwa n’ibyo abashumba bavugaga.

¹⁹Mariya we yashyinguraga mu mutima we ibyabaye byose, akabizirikana.

²⁰Nuko abashumba bataha bakuza Imana kandi bayisingiza, babitewe n’ibyo bari babonye kandi bumvise bihuje n’uko bari babibwiwe.

²¹Hashize iminsi munani, igihe cyo kugenya Umwana kiragera; bamwita izina rya Yezu, Malayika yari yamwise atarasamwa.

²²Umunsi w’isukurwa[23] ryabo wategetswe na Musa uragera, bamujyana i Yeruzalemu kumutura Nyagasani,

²³nk’uko byanditse mu itegeko rya Nyagasani, ngo «Umuhungu wese w’imfura azaba intore y’umwihariko wa Nyagasani.»

²⁴Bari bajyanywe kandi no gutura igitambo cy’intungura ebyiri cyangwa inuma ebyiri bakurikije itegeko rya Nyagasani.

²⁵Icyo gihe, i Yeruzalemu hari umuntu witwaga Simewoni ; yari intungane kandi yubaha Imana. Yari ategereje ihumure rya Israheli, kandi Roho Mutagatifu yari amurimo.

²⁶Byongeye Roho Mutagatifu yari yaramuhishuriye ko atazapfa atabonye Kristu wa Nyagasani[24].

²⁷Nuko Simewoni aza mu Ngoro y'Imana abibwirijwe na Roho Mutagatifu. Igihe Ababyeyi b’Umwana Yezu bamuzanye ngo bamurangirizeho ibyategetswe,

²⁸na we amwakira mu biganza bye, ashimira Imana avuga ati

²⁹«Nyagasani, noneho sezerera umugaragu wawe mu mahoro nk’uko wabivuze;

³⁰kuko amaso yanjye yabonye agakiza kawe,

³¹wageneye imiryango yose[25].

³²Ni we rumuri ruboneshereza amahanga, akaba n’ikuzo ry’umuryango wawe Israheli !»

³³Se na nyina batangazwaga n’ibyo bamuvugagaho.

³⁴Nuko Simewoni arabashima, maze abwira Mariya, nyina wa Yezu, ati «Dore uyu nguyu yashyiriweho kubera benshi muri Israheli impamvu yo korama cyangwa gukira, azaba n’ikimenyetso bazagiriraho impaka.

³⁵Nawe kandi inkota izakwahuranya umutima. Bityo ibitekerezo biri mu mitima ya benshi bigaragare.»

³⁶Hakaba n’umuhanuzikazi Ana, umukobwa wa Fanuweli wo mu muryango wa Azeri; yari ageze mu zabukuru. Nyuma y’ubusugi bwe, yamaranye n’umugabo we imyaka irindwi,

³⁷hanyuma aba umupfakazi kugeza mu kigero cy’imyaka mirongo inani n’ine. Ntiyavaga mu Ngoro, agakorera Imana umunsi n’ijoro, asiba kurya kandi asenga.

³⁸Nuko uwo mwanya na we arahagoboka, atangira gusingiza Imana, no gutekerereza iby’uwo mwana abari bategereje ugukira kwa Yeruzalemu.

³⁹Bamaze gutunganya ibyategetswe na Nyagasani, basubira mu Galileya mu mugi wabo wa Nazareti.

⁴⁰Nuko umwana arakura, arakomera, abyirukana ubwenge, yuzuye ubwitonzi, afite n’ubutoni ku Mana.

⁴¹Uko umwaka utashye ababyeyi be bajyaga i Yeruzalemu guhimbaza umunsi mukuru wa Pasika.

⁴²Nuko umwana amaze imyaka cumi n’ibiri, bajyanayo uko babimenyereye ku munsi mukuru.

⁴³Iminsi mikuru irangiye barataha, umwana Yezu asigara i Yeruzalemu ababyeyi be batabizi.

⁴⁴Bagenda urugendo rw’umunsi wose, bakeka ko ari mu bo bagendanaga. Hanyuma bamushakira muri bene wabo no mu bamenyi.

⁴⁵Bamubuze, basubira i Yeruzalemu bamushaka.

⁴⁶Hashize iminsi itatu bamusanga mu Ngoro y'Imana, yicaye hagati y’abigisha, abateze amatwi kandi abasiganuza.

⁴⁷Abamwumvaga bose batangariraga ubwenge bwe n’amagambo yabasubizaga.

⁴⁸Ababyeyi be bamubonye barumirwa, maze nyina aramubwira ati «Mwana wanjye, watugenje ute? Jye na so twagushakanye umutima uhagaze.»

⁴⁹Arabasubiza ati «Mwanshakiraga iki? Muyobewe ko ngomba kuba mu Nzu[26] ya Data?»

⁵⁰Bo ariko ntibasobanukirwa n’ibyo ababwiye.

⁵¹Nuko ajyana na bo i Nazareti, agahora abumvira. Nyina abika ibyo byose mu mutima we.

⁵²Uko Yezu yakuraga, ni ko yungukaga ubwenge n’igihagararo, anyuze Imana n’abantu.