Read kinyarwanda Luka 23 Bible Online

Luka 23 - kinyarwanda bible

Luka 23

¹Hanyuma ikoraniro ryose rirahaguruka, bamujyana kwa Pilato.

²Batangira kumurega bavuga bati «Twasanze uyu mugabo agandisha igihugu cyacu, akabuza gutanga umusoro wa Kayizari kandi akiyita Kristu Umwami.»

³Pilato aramubaza ati «Koko, uri umwami w’Abayahudi?» Aramusubiza ati «Urabyivugiye!»

⁴Pilato abwira abatware b’abaherezabitambo na rubanda, ati «Nta cyaha nsanganye uyu muntu cyatuma ahanwa.»

⁵Bo rero bahatiriza bavuga bati «Agomesha abantu, ari na ko yigisha muri Yudeya yose, yatangiriye mu Galileya none ageze ino.»

⁶Pilato abyumvise, abaza niba uwo muntu ari Umunyagalileya.

⁷Amaze kumenya yuko atwarwa na Herodi, amwoherereza Herodi wari i Yeruzalemu muri iyo minsi.

⁸Herodi abonye Yezu, arishima cyane kuko yahoraga yifuza kumubona, kubera ibyo yamwumvagaho. Ndetse yizeraga kumubona akora igitangaza.

⁹Amubaza ibibazo byinshi, ariko Yezu ntiyagira icyo amusubiza.

¹⁰Abatware b’abaherezabitambo n’abigishamategeko bari aho bamurega byinshi.

¹¹Nuko Herodi, afatanyije n’abasirikare be, aramushinyagurira cyane, amuhindura urw’amenyo, hanyuma amwambika umwenda urabagirana, amusubiza atyo kwa Pilato.

¹²Herodi na Pilato bahera ubwo baruzura, kandi mbere hose baziranaga.

¹³Nuko Pilato akoranya abatware b’abaherezabitambo, abakuru b’umuryango na rubanda.

¹⁴Arababwira ati «Mwanzaniye uyu muntu muvuga ko agandisha rubanda. Namubarije imbere yanyu, sinagira icyaha musangana mu byo mumurega.

¹⁵Na Herodi ni uko, dore nguyu yamutugaruriye. Uyu muntu nta cyo yakoze gikwiye kumwicisha.

¹⁶Rero ndamuhana, ubundi mureke agende.» (17 . . . [124])

¹⁷

¹⁸Ariko bo basakuriza icyarimwe, bati «Uwo nguwo napfe! Uturekurire Barabasi!»

¹⁹Barabasi uwo akaba yari afungiwe imidugararo yadutse mu mugi no kuba yarishe umuntu.

²⁰Nuko Pilato wifuzaga kurekura Yezu, yongera kubabwira kwa kundi.

²¹Ariko barushaho gusakuza bati «Mubambe, mubambe ku musaraba!»

²²Pilato yongera kubabwira ubwa gatatu, ati «Ikibi uyu muntu yakoze ni ikihe? Nta cyo namusanganye gikwiye kumwicisha. Rero ndamuhana, ubundi mureke agende.»

²³Ariko bo barushaho gusakabaka, bamusaba ngo abambwe, maze urusaku rwabo rurushaho kwiyongera.

²⁴Nuko Pilato yemeza ko icyo bashegeye gikorwa.

²⁵Abarekurira uwo basabaga, wari warafungiwe guteza imidugararo no kwica umuntu; naho Yezu aramubagabiza.

²⁶Igihe bamushoreye, baza gufatirana uwitwa Simoni w’i Sireni, wiviraga mu mirima ye; bamuhekesha umusaraba, agenda inyuma ya Yezu awumutwaje.

²⁷Yezu yari akurikiwe n’imbaga nyamwinshi y’abantu, barimo abagore baborogaga bamuririra.

²⁸Bigeze aho Yezu arabakebuka maze arababwira ati «Bakobwa b’i Yeruzalemu, mwindirira ahubwo nimwiririre mwe n’abana banyu!

²⁹Dore hagiye kuza igihe bazavuga bati ’Hahirwa ingumba n’inda zitabyaye, n’amabere atonkeje.’

³⁰Icyo gihe bazinginga imisozi ngo ’Nimuturidukireho’ n’utununga ngo ’Nimudutwikire[125].’

³¹None se niba bagiriye batya igiti kibisi, icyumye bazakigenzereza bate?»

³²Bari bashoreye n’abandi babiri b’abagiranabi, bagira ngo babicire hamwe na we.

³³Nuko bageze ahantu hitwa ku Kibihanga, barahamubamba hamwe na ba bagiranabi, umwe iburyo undi ibumoso.

³⁴Nuko Yezu yambaza avuga ati «Dawe, bababarire, kuko batazi icyo bakora.» Hanyuma bigabanya imyambaro ye, bayikoreyeho ubufindo.

³⁵Rubanda baguma aho bamurebera, abatware bo bakamunnyega bavuga bati «Yakijije abandi, ngaho na we niyikize, niba ari Kristu Intore y’Imana!»

³⁶Abasirikare na bo bakamukwena, maze baramwegera bamuhereza divayi irura[126],

³⁷bavuga bati «Niba uri umwami w’Abayahudi, ngaho ikize ubwawe!»

³⁸Hejuru ye hari handitse itangazo ngo «Uyu ni umwami w’Abayahudi.»

³⁹Umwe mu bagiranabi bari babambanywe na we yaramutukaga, avuga ati «Harya si wowe Kristu? Ngaho ikize ubwawe, natwe udukize!»

⁴⁰Ariko mugenzi we amucyaha avuga ati «Mbese ntutinya Imana, wowe waciriwe rumwe na we!

⁴¹Twebwe turazira ukuri, turaryozwa ibibi twakoze; naho we nta kibi yakoze.»

⁴²Arongera ati «Yezu, uranyibuke, igihe uzazira kwima Ingoma yawe.»

⁴³Yezu ni ko kumusubiza ati «Ndakubwira ukuri: uyu munsi uraba uri kumwe nanjye mu ihirwe ry’Imana.»

⁴⁴Hari nko ku isaha ya gatandatu, maze ku isi yose hacura umwijima, izuba rirazima bigeza ku isaha ya cyenda.

⁴⁵Umubambiko wo mu Ngoro utanyukamo kabiri.

⁴⁶Nuko Yezu arangurura ijwi ati «Dawe, nshyize ubuzima bwanjye mu maboko yawe[127].» Amaze kuvuga atyo araca.

⁴⁷Umutware w’abasirikare abonye ibyo bibaye, asingiza Imana avuga, ati «Koko uriya muntu yari intungane.»

⁴⁸Abantu bose bari bahururiye kureba ibyabaye, babonye ibimaze kuba, bikubura bataha bikubita ku gituza.

⁴⁹Abamenyi ba Yezu bose bari bahagaze ahitaruye, hamwe na ba bagore bari baturutse mu Galileya bamuherekeje, bakomeza kubyitegereza.

⁵⁰Nuko hagoboka umugabo witwa Yozefu, umwe mu bagize Inama Nkuru, akaba umuntu w’imico myiza kandi w’intungane.

⁵¹We ntiyari yemeye imigambi mibi ya bagenzi be n’ibyo bari barakoze. Yakomokaga ahitwa Arimatiya, umugi wo muri Yudeya, kandi akaba yari ategereje kubona Ingoma y’Imana.

⁵²Nuko asanga Pilato, amusaba umurambo wa Yezu.

⁵³Awumanura ku musaraba, awuzingiraho umwenda, maze awushyingura mu mva yari yacukuwe mu rutare, itigeze igira uyihambwamo.

⁵⁴Wari umunsi w’umwiteguro wabanzirizaga isabato.

⁵⁵Abagore bari bavanye na Yezu mu Galileya, bakurikira Yozefu; bitegereza imva n’ukuntu bari bashyizemo umurambo we.

⁵⁶Nuko barataha bajya gutegura imibavu n’ibindi bihumura. Maze ku isabato bararuhuka nk’uko byari bitegetswe.