Read kinyarwanda Luka 24 Bible Online

Luka 24 - kinyarwanda bible

Luka 24

¹Ku wa mbere ukurikira isabato, mu museso wa kare, abagore bajya ku mva bajyanye imibavu bari bateguye.

²Basanga ibuye ryakingaga imva rihirikiye ku ruhande.

³Ariko binjiye, ntibabona umurambo wa Nyagasani Yezu.

⁴Barumirwa, bayoberwa ibyo ari byo; nuko abagabo[128] babiri babahagarara imbere, bambaye imyenda ibengerana.

⁵Abo bagore bashya ubwoba bubika amaso; ba bagabo ni ko kubabwira bati «Ni kuki mushakira umuzima mu bapfuye?

⁶Ntari hano, ahubwo yazutse. Nimwibuke uko yababwiye akiri mu Galileya,

⁷ngo ’Umwana w’umuntu agomba kugabizwa amaboko y’abanyabyaha, akabambwa kandi akazuka ku munsi wa gatatu.’»

⁸Nuko abagore bibuka ayo magambo ye.

⁹Bavuye ku mva, bajya kubitekerereza ba Cumi n’umwe n’abandi bose.

¹⁰Hari Mariya Madalena, na Yohana, na Mariya nyina wa Yakobo. N’abandi bagore bari kumwe na bo, ni ko babwiraga intumwa.

¹¹Ariko amagambo yabo bayita uburondogozi, ntibabemera.

¹²Nyamara Petero[129] we arahaguruka, yiruka ajya ku mva. Yunamye, abona udutambaro twonyine. Nuko asubira imuhira, atangazwa cyane n’ibyari byabaye.

¹³Kuri uwo munsi nyine, babiri mu bigishwa bajyaga mu rusisiro rwitwa Emawusi; kuva i Yeruzalemu kugerayo hari urugendo rw’amasaha nk’abiri.

¹⁴Bagendaga baganira ibyari bimaze kuba byose.

¹⁵Igihe rero bakibivugana kandi babyibazaho, Yezu ubwe arabegera ajyana na bo.

¹⁶Ariko amaso yabo yari ameze nk’ahumye, ntibamumenya[130].

¹⁷Yezu arababwira ati «Ese ibyo mugenda muvugana ni ibiki?» Baherako barahagarara, ariko bijimye mu maso.

¹⁸Umwe muri bo witwaga Kiliyofasi, aramubaza ati «Ni wowe wenyine uba i Yeruzalemu utazi ibyahabaye muri iyi minsi?»

¹⁹Arababaza ati «Ni ibiki se?» Baramusubiza bati «Ni ibyabaye kuri Yezu w’i Nazareti, wari waragaragaje mu bikorwa no mu magambo ko ari umuhanuzi ukomeye imbere y’Imana n’imbere ya rubanda.

²⁰Twavuganaga n’ukuntu abatware b’abaherezabitambo n’abakuru bacu bamutanze ngo apfe, maze bakamubamba ku musaraba.

²¹Twebweho, twari twizeye ko ari we uzarokora Israheli; none dore uyu munsi ubaye uwa gatatu ibyo byose bibaye.

²²Icyakora bamwe mu bagore b’iwacu badutangaje. Mu gitondo cya kare bagiye ku mva,

²³maze ntibahasanga umurambo we, nuko bagaruka bavuga ko abamalayika bababonekeye, bakababwira ko ari muzima.

²⁴Ubundi kandi bamwe muri twe bagiye ku mva babisanga uko abagore bari babivuze, ariko we ntibamubona.»

²⁵Nuko Yezu arababwira ati «Mwa biburabwenge mwe, mutinda kwemera ibyo Abahanuzi bavuze!

²⁶None se Kristu ntiyagombaga kubabara atyo ngo abone kwinjira mu ikuzo rye?»

²⁷Nuko ahera kuri Musa n’Abahanuzi bose, maze abasobanurira ibimwerekeyeho biri mu Bitabo bitagatifu.

²⁸Bageze hafi y’urusisiro bajyagamo, Yezu asa n’uwikomereza urugendo.

²⁹Ariko bo baramwinginga bati «Gumana[131] natwe kuko bugorobye, umunsi ukaba uciye ikibu.» Nuko arinjira, kugira ngo agumane na bo.

³⁰Igihe rero yari ku meza hamwe na bo, afata umugati, ashimira Imana, arawumanyura, arawubahereza[132].

³¹Nuko amaso yabo arahumuka noneho baramumenya. Hanyuma agira atya arazimira, ntibongera kumubona.

³²Basigara babwirana bati «Mbega ukuntu imitima yacu yari yuzuye ibinezaneza igihe yatuganirizaga mu nzira, adusobanurira Ibyanditswe!»

³³Ako kanya barahaguruka basubira i Yeruzalemu. Bahasanga ba Cumi n’umwe bateranye, bari kumwe na bagenzi babo bandi,

³⁴bavuga bati «Ni koko! Nyagasani yazutse kandi yabonekeye Simoni!»

³⁵Na bo rero babatekerereza uko byagenze mu nzira, n’uburyo bamumenye amanyura umugati.

³⁶Igihe bakivuga ibyo, Yezu ubwe aba nguyu ahagaze hagati yabo, arababwira ati «Nimugire amahoro.»

³⁷Barakangarana, bashya ubwoba, bakeka ko babonye umuzimu.

³⁸Nuko arababwira ati «Ubwo bwoba bwose mufite ni ubw’iki? Kandi mutewe n’iki gushidikanya mu mitima yanyu?

³⁹Nimurebe ibiganza n’ibirenge byanjye: ni jyewe ubwanjye. Nimunkoreho, maze mumenye ko umuzimu atagira umubiri cyangwa amagufwa nk’uko muruzi mbifite.»

⁴⁰Avuga ibyo abereka ibiganza n’ibirenge bye.

⁴¹Uko bakamazwe n’ibyishimo ntibanyurwa, baba abo gutangara gusa; noneho arababwira ati «Hari icyo kurya mufite hano?»

⁴²Bamuhereza igice cy’ifi yokeje;

⁴³aracyakira, akirira imbere yabo.

⁴⁴Nuko arababwira ati «Ibyo ni byo nababwiraga nkiri kumwe namwe, nti ’Ni ngombwa ko huzuzwa ibinyerekeyeho byose byanditswe mu mategeko ya Musa, mu bitabo by’Abahanuzi no muri Zaburi.’»

⁴⁵Aherako ahugura ubwenge bwabo ngo bajye bumva Ibyanditswe.

⁴⁶Maze arababwira ati «Handitswe ko Kristu agomba kubabara, maze ku munsi wa gatatu akazuka mu bapfuye,

⁴⁷kandi ko uhereye i Yeruzalemu abantu bo mu mahanga yose bagomba kwigishwa, mu izina rye, ibyerekeye ukwisubiraho n’ibabarirwa ry’ibyaha.

⁴⁸Ibyo ni mwe bagabo bashinzwe kubihamya.

⁴⁹Jyeweho ngiye kuboherereza icyo Data yasezeranye. Mwebwe rero, nimube mugumye mu murwa kugeza igihe muzasenderezwa imbaraga zivuye mu ijuru.»

⁵⁰Hanyuma abajyana ahagana i Betaniya, maze arambura amaboko abaha umugisha.

⁵¹Igihe akibaha umugisha, atandukana na bo ajyanwa mu ijuru.

⁵²Bamaze kumupfukamira, bagarukana ibyishimo byinshi i Yeruzalemu.

⁵³Nuko bagahora mu Ngoro basingiza Imana.