Read kinyarwanda Luka 3 Bible Online

Luka 3 - kinyarwanda bible

Luka 3

¹Nuko mu mwaka wa cumi n’itanu w’ingoma ya Tiberi[27] Kayizari, igihe Ponsiyo Pilato yatwaraga Yudeya, Herodi na we atwara Galileya, murumuna we Filipo atwara igihugu cya Itureya n’icya Tirakoniti, na Lizaniya atwara Abileni,

²Ana na Kayifa[28] ari abaherezabitambo bakuru, ijambo ry’Imana ribwirwa Yohani mwene Zakariya ari mu butayu.

³Aherako agenda akarere kose ka Yorudani, yigisha ko abantu bagomba kwisubiraho bakabatizwa kugira ngo bagirirwe imbabazi z’ibyaha byabo,

⁴nk’uko byanditswe mu gitabo cy’ibyavuzwe na Izayi umuhanuzi[29] ngo «Ni ijwi ry’uvugira mu butayu aranguruye ati ’Nimutegure inzira ya Nyagasani, muringanize aho azanyura!

⁵Imanga yose yuzuzwe, umusozi wose n’akanunga bisizwe, ahantu hagoramye hagororwe, n’inzira z’urubuye zitungane.

⁶Maze umuntu wese azabone umukiro uturutse ku Mana.’»

⁷Yohani yabwiraga abantu bamusangaga bagira ngo ababatize, ati «Mwa nyoko z’impiri mwe, ni nde wababwirije guhunga uburakari bwegereje?

⁸Noneho nimugaragaze imigenzereze ikwiranye n’ukwisubiraho nyako! Kandi ntimwitwaze ngo ’Abrahamu[30] ni we mubyeyi wacu!’ Ndetse mbiberurire, aya mabuye muruzi, Imana ishobora kuyabyutsamo abana ba Abrahamu!

⁹Dore intorezo irambitse ku mizi y’ibiti; noneho igiti cyose kitera imbuto nziza kigiye gutemwa maze gicanwe.»

¹⁰Inteko y’abantu ikabaza Yohani iti «Tubigenze dute?»

¹¹Na we akabasubiza ati «Ufite amakanzu abiri agabane n’utayafite, n’ufite icyo kurya, na we agenze atyo.»

¹²Abasoresha na bo bazaga kwibatirisha bakamubaza bati «Mwigisha, dukore iki?»

¹³Arabasubiza ati «Ntimugasoreshe ibirenze ibyategetswe.»

¹⁴Abasirikare na bo baramubaza bati «Twebwe se, dukore iki?» Arabasubiza ati «Ntimukagire uwo murenganya n’uwo mubeshyera, kandi munyurwe n’igihembo cyanyu.»

¹⁵Kuko rubanda rwari rutegereje, kandi bose bibaza mu mutima wabo niba Yohani atari we Kristu,

¹⁶Yohani ni ko guterura abwira bose ati «Jyewe mbabatirisha amazi, ariko haje undi undusha ububasha, sinkwiriye ndetse no gupfundura udushumi tw’inkweto ze; we azababatiriza muri Roho Mutagatifu n’umuriro.

¹⁷Afite urutaro mu ntoki, kandi agiye gukubura imbuga ye: hanyuma azahunika ingano mu kigega cye, naho imishishi ayitwikishe umuriro utazima.»

¹⁸Nguko uko Yohani yahuguraga rubanda mu nyigisho nyinshi, abagezaho Inkuru Nziza.

¹⁹Icyo gihe kandi Yohani yacyashye umutware Herodi kubera Herodiya, umugore wa murumuna we yari yaracyuye, no kubera ibindi bibi yakoraga.

²⁰Nyamara Herodi we arushaho kugira nabi, afungisha Yohani.

²¹Nuko rubanda rwose rumaze kubatizwa, mu gihe Yezu na we amaze kubatizwa asenga, ijuru rirakinguka,

²²maze Roho Mutagatifu amumanukiraho bamubona ameze nk’inuma. Nuko ijwi rituruka mu ijuru riti «Uri Umwana wanjye, nakwibyariye none.»

²³[31] Igihe Yezu atangiye kwigisha, yari afite nk’imyaka mirongo itatu, kandi uko abantu bibwiraga, yari mwene Yozefu wa Heli,

²⁴wa Matati, wa Levi, wa Meliki, wa Yanayi, wa Yozefu,

²⁵wa Matatiyasi, wa Amosi, wa Nawumu, wa Esili, wa Nagayi,

²⁶wa Mahati, wa Matatiyasi, wa Semeyini, wa Yozefu, wa Yoda,

²⁷wa Yohanani, wa Resa, wa Zorobabeli, wa Salatiyeli, wa Neri,

²⁸wa Meliki, wa Adi, wa Kozamu, wa Elimadamu, wa Eri,

²⁹wa Yezu, wa Eliyezeri, wa Yorimi, wa Matati, wa Levi,

³⁰wa Simewoni, wa Yuda, wa Yozefu, wa Yonamu, wa Eliyakimi,

³¹wa Meleya, wa Mena, wa Matata, wa Natami, wa Dawudi,

³²wa Yese, wa Yobedi, wa Bowozi, wa Sala, wa Nasoni,

³³wa Aminadabu, wa Adimini, wa Arini, wa Esiromi, wa Faresi, wa Yuda,

³⁴wa Yakobo, wa Izaki, wa Abrahamu, wa Tara, wa Nakori,

³⁵wa Serugi, wa Ragawu, wa Faleki, wa Heberi, wa Sala,

³⁶wa Kayinamu, wa Arufagasadi, wa Semu, wa Nowa, wa Lameki,

³⁷wa Matusala, wa Henoki, wa Yareti, wa Maleleyeli, wa Kayinamu,

³⁸wa Enoshi, wa Seti, wa Adamu, w’Imana.