Read kinyarwanda Luka 8 Bible Online

Luka 8 - kinyarwanda bible

Luka 8

¹Nuko Yezu ashyira nzira, azenguruka imigi n’insisiro, yamamaza Inkuru Nziza y’Ingoma y’Imana. Ba Cumi na babiri bari kumwe na we.

²Hari kandi n’abagore bamwe bari bakijijwe roho mbi n’izindi ndwara; barimo Mariya bise Madalena, wari wameneshejwemo roho mbi ndwi[50];

³hari na Yohana muka Shuza, umunyabintu wa Herodi, na Suzana n’abandi benshi babafashishaga ibintu bari bafite.

⁴Nuko abantu benshi bamaze guterana, baturutse mu migi yose bamusanga, Yezu ababwiza uyu mugani ati

⁵«Umubibyi yavuye iwe ajya kubiba imbuto ye. Igihe abiba, imbuto zimwe zigwa iruhande rw’inzira; barazikandagira, n’inyoni zo mu kirere zirazirya zose.

⁶Izindi zigwa mu mabuye; zimaze kumera ziruma, kuko zabuze amazi.

⁷N’izindi zigwa mu mahwa; amahwa arakura, arazipfukirana.

⁸Izindi zigwa mu butaka bwiza; ziramera, zera imbuto karijana.» Amaze kuvuga atyo, atera hejuru, ati «Ufite amatwi yo kumva, niyumve!»

⁹Abigishwa be bamubaza icyo uwo mugani ushaka kuvuga.

¹⁰Arabasubiza ati «Mwebweho mwahawe kumenya amabanga y’Ingoma y’Imana; naho abandi bakabwirwa mu migani, ’kugira ngo barebe boye kubona, bumve boye gusobanukirwa[51].’

¹¹Dore rero icyo uwo mugani uvuga: imbuto ibibwa ni ijambo ry’Imana.

¹²Abameze nk’imbuto zaguye iruhande rw’inzira ni abumva iryo jambo, hanyuma Sekibi akaza, akarikura mu mutima wabo, agira ngo batemera, bagakira.

¹³Abameze nk’imbuto zaguye mu mabuye, ni abumva iryo jambo bakaryakirana ibyishimo, nyamara ntiribacengeremo ngo ribashingemo imizi. Ni abemera by’akanya gato; ibishuko byaza, bagahita bacika intege.

¹⁴Abameze nk’imbuto zaguye mu mahwa, ni abumva ijambo, ariko imihihibikano n’ubukungu n’amaraha y’isi bikabapfukirana, bikababuza kwera imbuto.

¹⁵Abameze nk’imbuto zaguye mu butaka bwiza, ni abumva ijambo, bakaryakirana umutima ukeye kandi mwiza, maze bakera imbuto nziza babikesha ubudacogora bwabo.

¹⁶Nta muntu ucana itara ngo arishyire mu nsi y’ikibindi, cyangwa mu nsi y’urutara, ahubwo arishyira ku gitereko, agira ngo rimurikire abinjira bose.

¹⁷Koko rero, nta cyahishwe kitazahishurwa, nta n’ibanga rizahera ritamenyekanye.

¹⁸Mwitondere rero uburyo mwumva aya magambo. Kuko ufite byinshi, ari we uzongererwa; naho udafite, n’icyo yibwiraga ko afite bazakimwaka.»

¹⁹Nuko nyina wa Yezu n’abavandimwe be baza bamusanga, ariko babura uko bamugeraho kubera abantu benshi bari bamukikije.

²⁰Babimenyesha Yezu bati «Nyoko n’abavandimwe bawe bari hanze barifuza ko mubonana.»

²¹Arabasubiza ati «Mama n’abavandimwe banjye, ni abumva ijambo ry’Imana, bakarikurikiza.»

²²Umunsi umwe, Yezu ajya mu bwato ari kumwe n’abigishwa be. Arababwira ati «Twambuke ikiyaga, dufate hakurya.» Nuko bagana amazi magari.

²³Mu gihe bambuka, Yezu arasinzira. Nuko haza umuhengeri, ubwato buravoma, benda kurohama.

²⁴Baramwegera baramukangura, bavuga bati «Mwigisha, Mwigisha, turashize!» Nuko arakanguka, akangara umuyaga n’umuvumba w’amazi. Birahosha haza ituze.

²⁵Arababwira ati «Ukwemera kwanyu kuri he?» Bagira ubwoba, baratangara, bakabazanya bati «Uyu ni muntu ki, ugeza aho gutegeka imiyaga n’imivumba bikamwumvira!»

²⁶Bakukira mu gihugu cy’Abanyageraza giteganye n’icya Galileya.

²⁷Yezu ageze imusozi, asanganirwa n’umuntu uturutse mu mugi, wahanzweho na roho mbi. Yari amaze igihe kirekire atikoza imyambaro, nta n’inzu yabagamo, ahubwo yiberaga mu marimbi.

²⁸Abonye Yezu, amwikubita imbere, maze atera hejuru cyane, ati «Uranshakaho iki, Yezu mwana w’Imana Isumbabyose? Ndakwinginze, winyica urubozo.»

²⁹Roho mbi yavuze ibyo kubera ko Yezu yari yatangiye kuyitegeka ngo ive muri uwo muntu. Koko rero, roho mbi yamuhangagaho kenshi; bakamubohesha iminyururu amaboko n’amaguru bagira ngo adacika, ariko akarenga agaca ingoyi, maze roho mbi ikamujyana kwangara ku gahinga.

³⁰Yezu aramubaza ati «Izina ryawe ni irihe?» Aramusubiza ati «Nitwa Gitero.» Kumusubiza atyo yabitewe n’uko roho mbi nyinshi zari zaramwaritsemo.

³¹Nuko zimwingingira kutazitegeka gusubira mu nyenga[52].

³²Ubwo aho ngaho hakaba umukumbi w’ingurube zarishaga kuri uwo musozi. Roho mbi zinginga Yezu ngo azireke zigire muri izo ngurube, arazemerera.

³³Nuko roho mbi ziva muri uwo muntu, zijya mu ngurube, maze uwo mukumbi ukonkoboka mu manga n’umuriri mwinshi, wiroha mu kiyaga, urarohama.

³⁴Abashumba babibonye barahunga, bajya kubimenyesha abari mu mugi n’abari mu cyaro.

³⁵Abantu b’aho barahurura, baza kureba ibyabaye. Bageze iruhande rwa Yezu, basanga wa muntu roho mbi zari zavuyemo yicaye imbere ye[53], yambaye, kandi yagaruye ubwenge. Nuko bagira ubwoba.

³⁶Abari babibonye, babatekerereza ukuntu uwo muntu wari wahanzweho na roho mbi yakize.

³⁷Nuko abaturage bose bo mu gihugu cy’Abanyageraza basaba Yezu ngo abavire aho, kuko bari bafite ubwoba bwinshi. Yezu yurira ubwato aragenda.

³⁸Nuko uwo muntu roho mbi zari zavuyemo, aramusaba ngo bibanire. We rero amusezerera, amubwira ati

³⁹«Ahubwo taha, maze utekerereze abandi ubuntu Imana yakugiriye.» Uwo muntu aragenda, atangaza mu mugi wose ibyo Yezu yari yamugiriye.

⁴⁰Yezu agarutse, abantu baramwakira, kuko bose bari bamutegereje.

⁴¹Nuko haza umuntu witwa Yayiro, akaba umutware w’isengero. Apfukamira Yezu, aramwinginga ngo aze iwe,

⁴²kuko umukobwa we wari ufite nk’imyaka cumi n’ibiri yendaga gupfa. Mu gihe aganayo, rubanda bamubyiganaho.

⁴³Ubwo rero hakaba umugore wari umaze imyaka cumi n’ibiri ava amaraso, ntihagira n’umwe ushobora kumukiza.

⁴⁴Amuturuka inyuma, akora ku ncunda z’igishura cye; ako kanya amaraso arakira.

⁴⁵Nuko Yezu arabaza ati «Ni nde unkozeho?» Bose barahakana. Petero aramusubiza ati «Mwigisha, ni aba bantu bagukikije, bakubyiga!»

⁴⁶Yezu asubiramo ati «Hari umuntu unkozeho, kuko numvise ububasha bumvamo.»

⁴⁷Umugore abonye ko yamenyekanye, aza ahinda umushyitsi, maze apfukama imbere ya Yezu, avugira mu ruhame icyatumye amukoraho, n’uko yahereyeko akira ako kanya.

⁴⁸We rero aramubwira ati «Mwana wanjye, ukwemera kwawe kuragukijije, genda amahoro.»

⁴⁹Mu gihe akivuga ibyo, haza umuntu uvuye kwa wa mutware w’isengero, aramubwira ati «Umukobwa wawe amaze guca; reka kurushya Umwigisha.»

⁵⁰Yezu abyumvise abwira Yayiro ati «Witinya! Upfa kwemera gusa, arakira.»

⁵¹Ageze mu rugo, ntiyatuma hari uwinjirana na we mu nzu, kereka Petero na Yakobo na Yohani, hamwe na se na nyina b’umwana.

⁵²Bose baramuririraga, kandi bashavujwe na we. Yezu aravuga ati «Mwirira: umukobwa ntiyapfuye, ahubwo arasinziriye[54].»

⁵³Baramuseka, kuko bari bazi neza ko umwana yapfuye.

⁵⁴Naho we amufata ukuboko, aramuhamagara ati «Mwana, kanguka.»

⁵⁵Umukobwa agarura akuka, ako kanya arahaguruka. Nuko Yezu ategeka ko bamugaburira.

⁵⁶Ababyeyi be baratangara cyane, ariko ababuza kugira uwo babwira[55] ibimaze kuba.