Read kinyarwanda Ivugururamategeko 1 Bible Online

Ivugururamategeko 1 - kinyarwanda bible

Ivugururamategeko 1

¹Dore amagambo Musa yabwiriye Israheli yose hakurya ya Yorudani[1], mu butayu, muri Araba, ahateganye na Sufu, hagati ya Parani, Tofeli, Lavani, Haseroti na Di-Zahavu.

²Kuva kuri Horebu kugera i Kadeshi-Barineya unyuze ku musozi wa Seyiri, hari urugendo rw’iminsi cumi n’umwe.

³Ku munsi wa mbere w’ukwezi kwa cumi na kumwe k’umwaka wa mirongo ine kuva bimutse mu Misiri, Musa ageza ku Bayisraheli ibyo Uhoraho yari yamutegetse kubabwira byose.

⁴Ubwo yari amaze gutsinda Sihoni umwami w’Abahemori wari utuye i Heshiboni, no gutsindira ahitwa Edereyi Ogi umwami wa Bashani wari utuye ahitwa Ashitaroti.

⁵Nuko, bari hakurya ya Yorudani mu gihugu cya Mowabu, Musa aterura abasobanurira Amategeko ku buryo buteye butya:

⁶Turi ku musozi wa Horebu, Uhoraho Imana yacu yaravuze ati «Mumaze igihe kirekire bihagije kuri uyu musozi;

⁷none nimuhaguruke, mujye mu misozi y’Abahemori no mu tutere twose tuhegereye, mukwire muri Araba, no ku Misozi, no mu Bisiza, no muri Negevu no ku nkombe y’Inyanja, mu gihugu cya Kanahani no muri Libani, kugera ku Ruzi runini rwa Efurati.

⁸Ngicyo igihugu mbagabiye. Nimukijyemo, kibe icyanyu; ni cyo Uhoraho yarahiye[2] kuzaha abakurambere banyu Abrahamu, Izaki na Yakobo, kimwe n’abazabakomokaho.»

⁹[3] Icyo gihe narababwiye nti «Sinabasha kubatwara jyenyine!

¹⁰Uhoraho Imana yanyu yarabagwije, none dore muhwanyije ubwinshi n’inyenyeri zo mu kirere.

¹¹Uhoraho Imana y’abakurambere banyu arabahe kororoka, murute incuro igihumbi uko mungana ubu ngubu, arabahe n’umugisha nk’uko yabibasezeranyije.

¹²Ubu se nabasha gutwara jyenyine intimba zanyu, intonganya n’imanza zanyu?

¹³Nimushake mu miryango yanyu abantu bitonda, b’abanyabwenge kandi b’inararibonye, maze mbagire abatware banyu.»

¹⁴Namwe mwaranshubije muti «Ibyo utubwiye gukora ni byiza.»

¹⁵Ni bwo rero ntoranyije abakuru b’imiryango yanyu, abantu b’impuguke kandi b’inararibonye, maze mbagira abatware b’imiryango yanyu: bamwe bagatwara abantu igihumbi, abandi ijana, abandi mirongo itanu, abandi icumi; nongeraho n’abashinzwe kubahiriza amategeko.

¹⁶Icyo gihe nahaye abacamanza banyu amabwiriza ngira nti «Muzajye mwumva ibibazo by’abavandimwe banyu, mucire urubanza rw’intabera umuntu wese ufitanye akantu n’umuvandimwe we cyangwa n’umusuhuke ucumbitse iwe.

¹⁷Mu guca imanza ntimuzagire aho mubogamira, abaciye bugufi n’abakomeye mujye mubumva kimwe; ntimuzagire uwo mutinya, kuko ubucamanza ari ubw’Imana. Nihagira ikibazo kibagora cyane, muzakinshyikirize, nzagikemura.»

¹⁸Icyo gihe rero, mbaha amategeko ku byo mwagombaga gukora byose.

¹⁹[4] Hanyuma twahagurutse i Horebu, twambukiranya bwa butayu bugari kandi buteye ubwoba mwiboneye; dukurikira inzira igana mu misozi y’Abahemori, nk’uko Uhoraho Imana yacu yari yabidutegetse; nuko tugera i Kadeshi-Barineya.

²⁰Ndababwira nti «Mugeze mu misozi y’Abahemori[5] Uhoraho Imana yacu aduhaye.

²¹Dore Uhoraho Imana yawe akweguriye igihugu. Zamuka, ukigire icyawe nk’uko Uhoraho Imana y’abakurambere bawe yabigusezeranyije. Ntutinye, ngo ucike intege!»

²²Icyo gihe mwese mwaranyegereye, murambwira muti «Reka dutume abatasi batubanzirize, badutatire icyo gihugu, batumenyeshe neza inzira tugomba kuzazamukiramo, n’imigi tuzageramo.»

²³Ibyo narabishimye; maze ntoranya muri mwe abagabo cumi na babiri, umwe umwe muri buri muryango.

²⁴Bashyira nzira, baterera iyo misozi. Bageze mu bikombe bya Eshikoli, barahatata.

²⁵Basoroma ku mbuto z’icyo gihugu, bahindukiye baraziduha. Badutekerereza n’iby’aho, bagira bati «Igihugu Uhoraho Imana yacu aduhaye ni igihugu cyiza!»

²⁶Nyamara mwe mwanga kukijyamo, musuzugura ijwi ry’Uhoraho Imana yanyu,

²⁷mwitotombera mu mahema yanyu muvuga, ngo «Kuba Uhoraho atwanga ni cyo cyatumye atuvana mu gihugu cya Misiri! Ngo kwari ukugira ngo atugabize Abahemori maze baturimbure!

²⁸Muti ese turazamuka tujya he? Bene wacu baduciye intege batubwira yuko abantu baho badusumbya kure igihagararo n’imbaraga, ko bafite imigi minini kandi ikomeye, izengurutswe n’inkuta z’amabuye zikabakaba ku ijuru; ndetse twabonyeyo n’Abanaki[6]!»

²⁹Narababwiye nti «Mwihinda umushyitsi ngo mubatinye!

³⁰Uhoraho Imana yanyu ubagenda imbere azabarwanirira ubwe, nk’uko yabigenjeje mu Misiri mubyirebera,

³¹kandi nk’uko yabigenjeje no mu butayu. Ese nta bwo wiboneye uko Uhoraho Imana yawe yaguhetse nk’uko umuntu aheka umwana we, mu rugendo rwose mwakoze kurinda mugera ino?»

³²Ibyo mwabirenzeho ntimwemera Uhoraho Imana yanyu,

³³kandi ari we wabagendaga imbere akabashakira aho mushinga ingando: nijoro akagenda mu nkingi y’umuriro ngo abereke inzira mucamo, ku manywa akagenda mu gicu.

³⁴Uhoraho yumvise amagambo mwavugaga, biramurakaza, bituma arahira ati

³⁵«Ni ukuri, nta n’umwe muri aba bantu, nta n’umwe muri iyi nyoko mbi uzabona igihugu cyiza narahiriye kuzaha abakurambere banyu,

³⁶keretse Kalebu[7] mwene Yefune: uwo we azakibona, kandi we n’urubyaro rwe nzabaha ubutaka yakandagiyeho, kuko igihe cyose yakurikiye Uhoraho ubudahwema.»

³⁷Nanjye mwatumye Uhoraho andakarira[8]; maze aravuga ati «Nawe ntuzinjiramo!

³⁸Yozuwe mwene Nuni umufasha wawe, ni we uzinjiramo: uramutere ubugabo umukomeze, kuko ari we uzatuma Abayisraheli bigarurira icyo gihugu.

³⁹Byongeye, abana banyu mwavugaga ko bazaba ingaruzwamuheto, abana banyu b’ibitambambuga bataramenya gutandukanya icyiza n’ikibi, bo bazakinjiramo. Ni bo nzagiha, ni bo bazagifata.

⁴⁰Naho mwebwe nimuhindukire musubire mu butayu, mugende mwerekeza ku Nyanja y’Urufunzo.»

⁴¹Mwaranshubije muti «Twacumuriye Uhoraho! Noneho tugiye kuzamuka, turwane nk’uko Uhoraho Imana yacu yabidutegetse.» Ni bwo rero buri wese muri mwe afashe intwaro ze, mwibwira ko guterera ya misozi byoroshye.

⁴²Ubwo Uhoraho yarantumye ati «Babwire uti ’Ntimuzamuke kandi ntimurwane, kuko tutari kumwe! Nimusigeho, hato mutaneshwa n’abanzi banyu!’»

⁴³Ibyo narabibabwiye, ariko ntimwumva, musuzugura ijwi ry’Uhoraho; maze kubera kwiyemera, mwiha guterera iyo misozi.

⁴⁴Ni bwo Abahemori batuye iyo misozi babasanganije intwaro, babomaho nk’irumbo ry’inzuki; maze barabacocagura, kuva i Seyiri kugera i Horima.

⁴⁵Mugarutse, mujya kuririra imbere y’Uhoraho; nyamara Uhoraho ntiyabitaho ngo abatege amatwi.

⁴⁶Nuko muguma i Kadeshi igihe kirekire, gihwanye n’icyo mwari mwarahamaze mbere.