Read kinyarwanda Ivugururamategeko 17 Bible Online

Ivugururamategeko 17 - kinyarwanda bible

Ivugururamategeko 17

¹Ntuzatambire Uhoraho Imana yawe inka cyangwa intama ifite ubusembwa cyangwa indi nenge yavukanye, kuko ari ishyano Uhoraho Imana yanyu yanga urunuka.

²Niba iwawe cyangwa muri umwe mu migi Uhoraho Imana yanyu aguhaye hari umugabo cyangwa umugore ukora ibintu bidatunganiye amaso y’Uhoraho Imana yawe, agaca ku Isezerano rye,

³maze akajya kuyoboka izindi mana, akazipfukama imbere, agasenga izuba, ukwezi cyangwa ikindi kintu cyose mu biri ku ijuru, kandi narabibujije,

⁴hanyuma bakamukuregera cyangwa ukagira ukundi wumva babivuga, uzaperereze ubyitondeye; maze nubona hari ibyemezo by’uko iryo shyano rikorwa muri Israheli,

⁵uzasohore uwo mugabo cyangwa uwo mugore ukora iryo shyano, umujyane ku irembo ry’umugi wawe, maze uwo mugabo cyangwa uwo mugore uzabatere amabuye, kugeza igihe bapfira.

⁶Ntihazagire ucirwa bene urwo rubanza rwo gupfa hatabonetse abagabo babiri cyangwa batatu bamushinja; naho nashinjwa n’umuntu umwe gusa, ntibazamwice.

⁷Abagabo bamushinja bazabe ari bo bafata iya mbere mu kumwica, hanyuma habone gukurikiraho rubanda rwose. Uzakure ishyano hagati yanyu.

⁸Nihaboneka urubanza rukunaniye rwerekeye icyaha cy’ubwicanyi, amahane cyangwa gukomeretsa undiibyo biburanishirizwa mu rukiko rw’umugi wawe — uzashyire nzira ujye ahantu Uhoraho Imana yawe azaba yihitiyemo;

⁹maze usange abaherezabitambo b’Abalevi hamwe n’umucamanza uzaba ariho icyo gihe, ubasobanuze: na bo bazakumenyesha uko baciye urubanza rwawe.

¹⁰Nawe rero uzakurikize icyemezo bazaba bakubwiriye aho hantu Uhoraho azaba yarihitiyemo, wihatire gukora ukurikije ibisobanuro byabo byose.

¹¹Uko ibisobanuro baguhaye biteye n’uko urubanza rwawe baruciye, azabe ari ko ugenza, nta gutanira iburyo cyangwa ibumoso bw’icyemezo cy’urubanza bazaba bakumenyesheje.

¹²Nihagira umuntu ugira ihinyu ntiyumvire umuherezabitambo ubereyeho gukora imirimo mitagatifu y’Uhoraho Imana yawe, cyangwa ntiyumvire umucamanza, uwo muntu agomba kwicwa. Uzakure ishyano muri Israheli.

¹³Rubanda rwose bazabimenya, batinye, maze habure uwongera kuba umunyahinyu.

¹⁴Numara kugera mu gihugu Uhoraho Imana yawe aguhaye, ukakigarurira, ukagituramo, maze ukibwira uti «Ndashaka umwami untegeka nk’uko ayandi mahanga yose ankikije ameze»,

¹⁵umwami uzimika ngo agutegeke agomba kuba ari uwo Uhoraho Imana yawe yitoreye ubwe. Umwami uzimika ngo agutegeke, uzamushake mu bavandimwe bawe; uramenye ntuzimike umunyamahanga[51] utari umuvandimwe wawe.

¹⁶Ariko rero, azirinde gutunga amafarasi menshi, cyangwa gusubiza rubanda mu Misiri kugira ngo abone uko agwiza umubare w’amafarasi; kuko Uhoraho yababwiye ati «Oya, ntimuzasubize ukundi muri iyo nzira!»

¹⁷Ikindi kandi, ntagomba kugira abagore benshi cyane: ibyo byatuma umutima uteshuka inzira nziza. Ku byerekeye ifeza na zahabu, ntazashake gutunga ibirenze urugero.

¹⁸Kandi namara kwima ingoma, aziyandukurire mu gitabo aya mategeko, ayashyikirijwe n’abaherezabitambo b’Abalevi.

¹⁹Ayo mategeko azamugume hafi, ajye ayasoma iminsi yose y’ukubaho kwe, kugira ngo yige gutinya Uhoraho Imana ye, yitondera amagambo yose y’iri Tegeko n’amabwiriza arimo, kugira ngo abikurikize.

²⁰Bityo, azirinda kwirata imbere y’abavandimwe, no gutanira ibumoso cyangwa iburyo bw’ayo mategeko; maze azarambe ku ngoma, we n’urubyaro rwe, muri Israheli.