Read kinyarwanda Ivugururamategeko 31 Bible Online

Ivugururamategeko 31 - kinyarwanda bible

Ivugururamategeko 31

¹Nuko Musa araza nanone abwira Abayisraheli bose aya magambo. Aterura avuga ati

²«Ubu ngubu maze imyaka ijana na makumyabiri mvutse; sinkibasha gukubita hirya no hino, kandi Uhoraho yaranyibwiriye ati 'Nta bwo uzambuka Yorudani iyi ureba!’

³Uhoraho Imana yanyu ubwe ni we uzambuka akurangaje imbere, ni we uzatsemba ariya mahanga akuri imbere, ayanyage ibyo atunze. Kandi Yozuwe ni we uzambuka akurangaje imbere nk’uko Uhoraho yabivuze.

⁴Uhoraho azagirira ayo mahanga ibyo yagiriye Sihoni na Ogi, abami b’Abahemori, hamwe n’ibihugu byabo: yarabirimbuye!

⁵Uhoraho azayabarekurira, namwe muzayagirire bya bindi nabategetse byose.

⁶Nimukomere kandi mube intwari, ntimuzashye ubwoba ngo muhinde umushyitsi imbere yabo, kuko Uhoraho Imana yawe ubwe agendana nawe. Ntazaguharurukwa, ntazagutererana.»

⁷Hanyuma Musa ahamagara Yozuwe, amubwirira imbere y’Abayisraheli bose ati «Komera kandi ube intwari, kuko ari wowe uzinjirana n’aba bantu mu gihugu Uhoraho yarahiye abasokuruza babo ko azakibaha; ni wowe uzatuma bigarurira icyo gihugu.

⁸Uhoraho ubwe ni we ukugenda imbere, azaba ari kumwe nawe; ntazaguharurukwa, ntazagutererana. Wigira ubwoba, ntucike intege.»

⁹Musa yandika iri Tegeko, maze arishinga abaherezabitambo, bene Levi baheka ubushyinguro bw’Isezerano ry’Uhoraho; arishinga kandi n’abakuru b’imiryango ya Israheli bose.

¹⁰Nuko Musa abaha aya mabwiriza, agira ati «Uko imyaka irindwi ishize, mu gihe cyagenwe mu mwaka wo guhara imyenda, ku munsi mukuru w’Amahema,

¹¹igihe Abayisraheli bose bazaza ahantu Uhoraho Imana yawe azaba yihitiyemo kugira ngo barebe uruhanga rwe, uzajye usomera iri Tegeko imbere y’Abayisraheli bose, baryumve.

¹²Uzakoranye rubanda, abagabo n’abagore, abana n’umusuhuke w’umunyamahanga uri mu migi yawe, kugira ngo bose baryumve, baryige, batinye Uhoraho Imana yanyu, kandi bitondere gukurikiza amagambo yose ari muri iri Tegeko.

¹³N’abana babo batari barizi, bazaryumve, bige gutinya Uhoraho Imana yanyu iminsi yose muzabaho mu gihugu mugiye kwigarurira mumaze kwambuka Yorudani.»

¹⁴Nuko Uhoraho abwira Musa, ati «Dore igihe cyawe cyo gupfa kiregereje. None hamagara Yozuwe, mujyane ku ihema ry’ibonaniro, maze muhe amabwiriza yanjye.» Musa na Yozuwe baragenda, bahagarara ku ihema ry’ibonaniro.

¹⁵Uhoraho abonekera muri iryo hema, ari mu nkingi y’agacu; iyo nkingi y’agacu yari ihagaze ku muryango w’ihema.

¹⁶Nuko Uhoraho abwira Musa ati «Dore wowe ugiye gupfa, usange abasogokuruza bawe. Uyu muryango uzatangira ube ihabara, wohoke ku mana z’abanyamahanga bari mu gihugu ugiye kwinjiramo; uzampararukwa umene igihango cy’Isezerano nagiranye na wo.

¹⁷Icyo gihe uburakari bwanjye buzawugurumanira, mbatererane, mbahishe amaso, bapfe bashire, ibyago n’imibabaro myinshi bibibasire. Nuko icyo gihe bazavuge bibaza bati ’Igituma ibi byago byadusaritse, aho si uko Imana yacu itakiri muri twe?’

¹⁸Ariko jyeweho icyo gihe nzakomeza mbahishe amaso, mbahora ibyaha byose bazaba bakora bayoboka imana zindi.

¹⁹Noneho ngaho nimwandike iyi ndirimbo muzajya muririmba; uzayigishe Abayisraheli, uyibatoze, kugira ngo iyo ndirimbo izambere gihamya ishinja Abayisraheli.

²⁰Koko rero, nzinjiza iyi mbaga mu gihugu gitemba amata n’ubuki nasezeranyije abasekuruza babo ko nzakibaha, nkabirahirira; bazarya barengwe, babyibuhe; hanyuma bayoboke imana zindi, bazihakweho, jyeweho bansuzugure, maze bice Isezerano nagiranye na bo.

²¹Nuko nibamara kuzahazwa n’ibyago byinshi hamwe n’imibabaro myinshi, iyo ndirimbo izabe gihamwa ibashinja, kuko urubyaro rwabo rutazibagirwa na gato kuyisubiramo. Koko rero, nta bwo nyobewe imigambi bahimbahimba ubu ngubu, na mbere y’uko mbinjiza mu gihugu nasezeranye nkabirahira.»

²²Uwo munsi rero Musa yandika iyo ndirimbo, ayigisha Abayisraheli.

²³Maze Uhoraho yihanangiriza Yozuwe mwene Nuni, ati «Komera kandi ube intwari, kuko ari wowe uzinjirana n’Abayisraheli mu gihugu nabasezeranyije, nkabibarahira; nanjye kandi ndi kumwe namwe.»

²⁴Musa amaze kwandika amagambo yose y’ayo mategeko mu gitabo,

²⁵aha aya mabwiriza Abalevi bashinzwe guheka ubushyinguro bw’Isezerano ry’Uhoraho, ati

²⁶«Nimwende iki gitabo cy’amategeko, mugishyire iruhande rw’ubushyinguro bw’Isezerano ry’Uhoraho Imana yanyu; kizagume aho, kibe gihamya ibashinja.

²⁷Kuko nzi amatwara yawe yo kwigomeka no kugira ijosi rishingaraye. Ubwo muri iki gihe mugomera Uhoraho, kandi nkiriho ndi kumwe namwe, hazacura iki nimara gupfa?

²⁸Nimunkoranyirize abakuru b’imiryago yanyu bose, hamwe n’abashinzwe kubahiriza amategeko, baze iruhande rwanjye; maze mvugire ayo magambo mu matwi yabo, ntanga ijuru n’isi ho abagabo bazabashinja.

²⁹Kuko nzi yuko nimara gupfa, muziyonona rwose, mugateshuka inzira nababwirije; maze mu minsi izaza mukazakubitana n’ibyago, ku mpamvu y’uko muzaba mwakoze ibitanogera amaso y’Uhoraho, kugeza aho kumubabaza mu migenzereze yanyu.»

³⁰Nuko imbere y’ikoraniro ryose ry’Abayisraheli rimuteze amatwi, Musa ahavugira amagambo yose y’iyi ndirimbo, arayarangiza.