Read kinyarwanda Ivugururamategeko 32 Bible Online

Ivugururamategeko 32 - kinyarwanda bible

Ivugururamategeko 32

¹Ati «Juru, tega amatwi, maze mvuge; isi nawe, wumve ijambo rimva mu kanwa.

²Inyigisho zanjye nizisuke nk’imvura, amagambo yanjye niyisese nk’urume, nk’imvura y’umurindi igwa ku bwatsi butoto, nk’ibitonyanga bigwa mu kanyatsi!

³Kuko ngiye kwamamaza izina ry’Uhoraho. Nimwemere ko Imana yacu ari indahangarwa.

⁴Ni urutare, ibyo akora biba bitunganye rwose, uburyo bwe bwose buraboneye. Ni Imana izira guhemuka, kandi itarenganya, ni intabera n’intagorama.

⁵Bo bariyononnye, kubera ubusembwa bisize, ntibakiri abana be, bahindutse inyoko yandavuye kandi yatannye.

⁶Mbe bwoko bw’ibipfapfa, mbe bwoko bw’abanyabwenge buke! Uko ni ko mwitura Uhoraho? Si we so wakubyaye, si we wakuremye, akagukomeza intege?

⁷Ibuka ibihe bya kera, uzirikane imyaka yagiye isimburana, kuva mu gisekuru ukagera mu kindi. Baza so, azabigutekerereza, baza abakuru bo muri mwe, bazabikubwira:

⁸Igihe Musumbabyose yahaga amahanga iminani agenewe, igihe yatandukanyaga amoko y’abantu, yashingiye imbago imiryango akurikije umubare w’abana ba Israheli.

⁹Koko rero, ingarigari y’Uhoraho ni uwo muryango we, bene Yakobo bakaba umunani yegukanye.

¹⁰Uwo muryango we babonaniye mu gihugu cy’ubutayu, ku gasi kaganjemo imyoromo ikanganye: yarawukikiye, arawurera.

¹¹Yagenje nka kagoma ikangura ibyana byayo igatambatamba hejuru y’icyari cyayo, ikabamba amababa yayo uko yakabaye, maze ikabiterura ikabigurukana ibihetse.

¹²Uhoraho ni we wenyine wayoboye umuryango we, ari nta mana y’inyamahanga bafatanyije,

¹³awutoza gukwira imisozi y’igihugu, kugira ngo utungwe n’umwero w’imirima; awubwiriza kunyunyuza ubuki bwaretse mu binogo by’amabuye, awuha amavuta yaretse ku bitare by’intamenwa.

¹⁴Awuha kandi ikivuguto n’amatamatama, n’ikinure cy’abana b’intama n’icy’amapfizi y’intama y’i Bashani, n’icy’amasekurume y’ihene, hamwe n’inkongote y’impeke z’ingano; umutobe w’umutuku uturutse mu mbuto z’imizabibu uwunywa ubanje kuba inzoga ihiye.

¹⁵Nuko Yeshuruni[79] arashisha, maze ashinga ijosi — warashishe, urabyibuha, uba ingogo — ahararukwa Imana yamuremye, asuzugura Urutare rwamukijije.

¹⁶Barayiharika, bayoboka imana z’inyamahanga, bayibabaza bakora amahano,

¹⁷batura ibitambo ibishitani bitari Imana nyakuri, batura ibitambo imana zindi batari bazi, imana nshya zadutse vuba, izo abasokuruza banyu batatinyaga.

¹⁸Urutare ukesha kubona izuba ntukirwitaho, wibagiwe Imana yakubyaye.

¹⁹Ibyo Uhoraho yiboneye byamuteye kuzinukwa: abahungu be n’abakobwa be baramurakaje.

²⁰Nuko aravuga ati «Ngiye kubahisha amaso, nzarebe iherezo ryabo uko rizamera, kuko ari inyoko yandavuye, abana umuntu atashobora kwizera.

²¹Bambangikanyije n’ibitari Imana nyakuri, barandakaza bayoboka ibigirwamana by’amanjwe bishakiye. Nanjye nzababangikanya n’ikitari umuryango nyakuri, mbagirire nabi nkoresheje ihanga ritagira ubwenge!

²²Ni koko, umuriro uzagurumana mu mazuru yanjye, utwike byose kugeza hasi ikuzimu iwabo w’abapfuye, woreke isi hamwe n’ibyo yeze, uhindure ivu imizi y’imisozi.

²³Nzabacunshumuriraho amakuba, mbamarireho imyambi yanjye.

²⁴Nibamara kwicwa n’inzara, no kurimburwa n’inkuba, hamwe n’amacumu yanjye afite uburozi, nzabagabiza amenyo y’inyamaswa, n’uburozi bw’ibisimba bikuruza inda mu mukungugu.

²⁵Hanze, inkota izavuga ibamareho abana, no mu mazu yabo haganze ubukangarane. Umuhungu w’umusore azapfa rumwe n’umukobwa w’inkumi, umwana uri ku ibere apfe rumwe n’umugabo umeze imvi.

²⁶Naravuze nti ’Mba mbajanjaguye nkabahindura ubushingwe, nkazimangatanya icyatuma bibukwa mu bantu,

²⁷iyo ndatinya ko ababisha banyigambaho.’ Abanzi babo ntibajye aho ngo bibeshye, bavuga ngo ’Ni twe twabarushije amaboko turabatsinda, ngo nta bwo ari Uhoraho wakoze ibyo byose!’

²⁸Kuko iryo ari ihanga ritareba kure, ry’abantu b’ibicucu.

²⁹Iyo baba abanyabwenge bari gusobanukirwa na byo, bakamenya ibibafitiye akamaro mu gihe kiri imbere:

³⁰’Umuntu umwe gusa yabasha ate kwirukana abantu igihumbi, abantu babiri gusa babasha bate kwirukana abantu ibihumbi cumi, atari uko Urutare rwabo ruba rwabarekuye, maze Uhoraho akabatanga?

³¹Koko rero Urutare rurinda ababisha bacu si kimwe n’Urutare ruturinda twebwe: ababisha bacu ubwabo ni bo baca urwo rubanza.

³²Ingemwe z’imizabibu yabo zikomoka i Sodoma no mu mirima y’i Gomora; imbuto z’imizabibu yabo zirimo uburozi, imisogwe yazo irakarishye.

³³Divayi yabo ni nk’ubumara bw’ikiyoka, ni ubumara bukaze nk’ubw’impiri.

³⁴Ibyo si byo mbitse iwanjye, si ibyo mpfundikiye mu bubiko bwanjye?

³⁵Kumara inzigo no gutanga inyiturano ni jye nyirabyo, nkabizigamira igihe ibirenge byabo bizateshuka inzira; koko rero umunsi w’ibyago uri bugufi, ibihano byabateganyirijwe ntibigitinze.»

³⁶Uhoraho agiye gucira urubanza umuryango we, akazagirira ibambe abayoboke be, nabona yuko intege zabo zishize, kandi ko nta mucakara cyangwa umuntu wigenga usigaye.

³⁷Icyo gihe azabaza ati «Za mana zabo ziri hehe, n’urutare bahungiragaho?

³⁸Ziri hehe za mana zaryaga urugimbu rw’ibitambo byabo, zikanywa divayi y’ibitambo byabo biseswa? Ngaho se nizihaguruke zibatabare, zibabonere ahantu mwakwikinga!

³⁹Noneho rero ubu nimurebe: Ni jyewe ubwanjye, nta wundi. Nta yindi mana indi iruhande! Ni jye wica kandi nkabeshaho, uwo mfashe ntanyikura.

⁴⁰Kandi koko, manika ukuboko nkwerekeza ku ijuru, maze nkavuga nti ’Ndi muzima iteka ryose!’

⁴¹Nintyaza inkota yanjye irabagirana, ukuboko kwanjye kugatigisa iteka naciye, nzamara inzigo mfitanye n’ababisha banjye, mpe inyiturano abanyanga.

⁴²Inkota yanjye izavubata inyama, imyambi yanjye nyuhire amaraso iyasinde, amaraso y’abishwe n’ay’abafashwe mpiri, hamwe n’ibihanga by’ababisha bitendeza imisatsi.»

⁴³Mahanga, nimukomere yombi imbaga ye, kuko agiye guhorera amaraso y’abayoboke be, akamara inzigo afitanye n’ababisha be, maze agakiza ubwandu igihugu cye n’imbaga ye.»

⁴⁴Musa rero wari uherekejwe na Yozuwe mwene Nuni, yaraje avuga amagambo yose y’iyi ndirimbo, rubanda bateze amatwi.

⁴⁵Musa arangije kubwira Abayisraheli bose aya magambo,

⁴⁶yungamo ati «Mushyire ku mutima aya magambo yose, ari na yo ntanzeho none gihamya izabashinja, kandi muzabwirize abana banyu kwihatira gukurikiza amagambo yose agize iri Tegeko.

⁴⁷Koko rero nta bwo ari ijambo rikwiye kugira agaciro gake kuri mwe; ahubwo iri jambo ni ryo bugingo bwanyu, ni ryo muzakesha kumara iminsi mu gihugu mugiye kwigarurira mumaze kwambuka Yorudani.»

⁴⁸Uwo munsi nyine Uhoraho abwira Musa ati

⁴⁹«Zamuka uriya musozi wa Nebo uri mu bisi by’Avarimu, mu gihugu cya Mowabu, ahateganye na Yeriko, maze witegereze igihugu cya Kanahani mpayeho ubukonde abana ba Israheli.

⁵⁰Hanyuma upfire kuri uwo musozi uzamutse, usange bene wanyu — bimere nk’uko Aroni mwene so na we yapfiriye ku musozi wa Hori, agasanga bene wabo —

⁵¹kubera ko mwancumuriye mukambera abahemu hagati y’Abayisraheli, cya gihe mwari ku mazi y’i Meriba h’i Kadeshi, mu butayu bwa Sini, ubwo mwangaga kwerekanira ubutagatifu bwanjye hagati y’Abayisraheli.

⁵²Igihugu cya Kanahani uzakireba uri hakurya yacyo gusa, ariko nta bwo uzagikandagiramo, icyo gihugu mpaye abana ba Israheli.»