Read kinyarwanda Ivugururamategeko 6 Bible Online

Ivugururamategeko 6 - kinyarwanda bible

Ivugururamategeko 6

¹Ngaya amategeko, amabwiriza n’imigenzo Uhoraho Imana yanyu yantegetse kubigisha, ngo muzajye mubikurikiza mu gihugu mugiye kujyamo ngo mukigarurire;

²bityo utinye Uhoraho Imana yawe, ari wowe, ari umwana wawe, ari n’umwuzukuru wawe, ubigire wubahiriza igihe cyose amategeko n’amabwiriza nguhaye, kugira ngo uzabone kuramba.

³Israheli, tega amatwi kandi uzihatire kubikurikiza, bityo uzagira amahirwe kandi ni bwo muzagwira mube benshi cyane mu gihugu gitemba amata n’ubuki, nk’uko Uhoraho Imana y’abasokuruza bawe yabigusezeranyije.

⁴Israheli, tega amatwi! Uhoraho Imana yacu ni we Nyagasani wenyine.

⁵Urakunde Uhoraho Imana yawe n’umutima wawe wose, n’amagara yawe yose, n’imbaraga zawe zose[21].

⁶Amategeko nguhaye uyu munsi araguhore ku mutima.

⁷Uzayatoze abana bawe; uzayababwire igihe wicaye iwawe n’igihe ugenda mu nzira, igihe uryamye n’igihe ubyutse.

⁸Uzayagire ikimenyetso kidasibangana mu kiganza cyawe, uyatamirize mu ruhanga hagati y’amaso yawe.

⁹Uzayandike ku nkomanizo z’umuryango w’inzu yawe no ku marembo y’umugi wawe.

¹⁰Uhoraho Imana yawe namara kukwinjiza mu gihugu yarahiriye abasokuruza bawe, Abrahamu, na Izaki na Yakobo ko azakiguha, uzahasanga imigi minini kandi myiza utubatse,

¹¹amazu yuzuye ubwoko bwose bw’ibintu byiza utahunitsemo, amariba ahora yuzuye utafukuye, imizabibu n’imizeti utateye;

¹²numara rero kurya ugahaga, uzirinde rwose kwibagirwa Uhoraho wagukuye mu gihugu cya Misiri, mu nzu y’ubucakara.

¹³Uzatinye Uhoraho Imana yawe, abe ari we uyoboka, izina rye abe ari ryo urahira.

¹⁴Ntimuzohoke ku zindi mana mu zo muzasangana amahanga abakikije,

¹⁵kuko Uhoraho Imana yawe mubana ari Imana ifuha. Uritonde, uburakari bw’Uhoraho Imana yawe butazakugurumaniraho, maze akakurimbura ku isi.

¹⁶Ntimuzagerageze Uhoraho Imana yanyu, nk’uko mwabikoreye i Massa[22].

¹⁷Muzahore mukurikiza amategeko, amateka n’amabwiriza by’Uhoraho Imana yanyu, nk’uko yabigutegetse.

¹⁸Uzajye ukora ibitunganye n’ibiboneye mu maso y’Uhoraho, kugira ngo uzagire amahirwe kandi wigarurire igihugu cyiza Uhoraho yasezeranyije abasokuruza bawe abigirishije indahiro,

¹⁹maze umeneshe abanzi bawe bose nk’uko Uhoraho yabisezeranye.

²⁰Ikindi gihe umwana wawe nakubaza ati «Aya mateka, n’aya mategeko n’iyi migenzo Uhoraho Imana yabahaye ni iby’iki?»

²¹uzasubize uwo mwana wawe uti «Twari abacakara ba Farawo mu Misiri, nuko Uhoraho adukuza mu Misiri imbaraga z’ukuboko kwe;

²²Uhoraho yerekanira mu maso yacu ibimenyetso n’ibitangaza bihambaye, bigirira nabi Misiri, Farawo n’abe bose;

²³naho twebwe adukurayo, kugira ngo atujyane mu gihugu yasezeranyije abasokuruza bacu abigirishije indahiro ko azakiduha.

²⁴Nuko Uhoraho adutegeka gukurikiza aya mabwiriza yose no gutinya Uhoraho Imana yacu, kugira ngo tugire amahirwe iminsi yose, kandi atubesheho nk’uko tumeze ubu ngubu.

²⁵Tuzaba rero intungane niba twihatiye gukurikiza aya mategeko yose, turangamiye Uhoraho Imana yacu, nk’uko yabitubwirije.»