Read kinyarwanda Yohani 10 Bible Online

Yohani 10 - kinyarwanda bible

Yohani 10

¹Ndababwira ukuri koko: umuntu utinjirira mu irembo ry’urugo rw’intama, ahubwo akuririra ahandi, aba ari umujura n’igisambo.

²Unyura mu irembo we, aba ari umushumba w’intama.

³Uwugarira irembo, aramwugururira, n’intama zikumva ijwi rye; maze agahamagara intama ze mu mazina yazo, nuko akazahura.

⁴Intama ze zose iyo amaze kuzikura mu rugo, azijya imbere, zikamukurikira, kuko ziba zisanzwe zizi ijwi rye.

⁵Ntizikurikira uw’ahandi, ahubwo ziramuhunga, kuko ziba zitazi ijwi ry’ab’ahandi.»

⁶Yezu yabahaye icyo kigereranyo, ariko bo ntibamenya icyo yashakaga kubabwira.

⁷Nuko Yezu ati «Ndababwira ukuri koko: ni jye rembo ry’intama.

⁸Abandi bose baje mbere yanjye, ni abajura n’ibisambo, n’intama zanze kubumva.

⁹Ni jye rembo; uzanyuraho yinjira azakizwa, azishyira yizane kandi abone urwuri.

¹⁰Umujura agenzwa no kwiba, no kwica, no kurimbura. Jye rero nazanywe no kugira ngo intama zigire ubugingo, kandi zibugire busagambye.

¹¹Ni jye mushumba mwiza. Umushumba mwiza yigurana intama ze.

¹²Naho umucanshuro utari umushumba, ntabe na nyir’intama, abona ikirura kije, agatererana intama agahunga; ikirura kikaziraramo kikazitatanya.

¹³Agenza atyo abitewe n’uko aba ari umucanshuro, maze intama ntizibe zimushishikaje.

¹⁴Ni jye mushumba mwiza; nzi intama zanjye, na zo zikamenya,

¹⁵mbese nk’uko Data anzi, nanjye kandi nkamenya Data. Ndetse nemera guhara ubugingo bwanjye, nkabutangira intama zanjye.

¹⁶Mfite n’izindi ntama[68] zitari muri uru rugo, na zo ngomba kuzizana zikazumva ijwi ryanjye, maze hakaba igikumba kimwe n’umushumba umwe.

¹⁷Ngicyo igitera Data kunkunda, kuko ntanga ubuzima bwanjye kugira ngo mbusubirane[69].

¹⁸Nta we ubunyaga, ahubwo ni jye ubwanjye ubutanga. Mfite ububasha bwo kubutanga nkagira n’ububasha bwo kubwisubiza. Iryo ni itegeko nahawe na Data.»

¹⁹Abayahudi bongera kwicamo ibice babitewe n’ayo magambo.

²⁰Benshi muri bo bati «Yahanzweho na roho mbi, ndetse yasaze; mumuteze amatwi mushaka iki?»

²¹Abandi ariko bati «Aya magambo si ay’uwahanzweho na roho mbi; roho mbi yashobora ite guhumura amaso y’impumyi?»

²²I Yeruzalemu bahimbazaga umunsi mukuru wo gutaha Ingoro[70] y’Imana. Hari mu itumba.

²³Yezu yagendagendaga mu Ngoro yImana mu nsi y’Ibaraza rya Salomoni[71].

²⁴Abayahudi baramukikiza, maze baramubaza, bati «Uzakomeza kuturerega na ryari? Niba uri Kristu bitwerurire, ubitubwire.»

²⁵Yezu arabasubiza ati «Ndababwira mukanga kwemera; ibikorwa nkora mu izina rya Data, ni byo bihamya ibyanjye.

²⁶Mwe ntimwemera, kuko mutari abo mu ntama zanjye.

²⁷Intama zanjye zumva ijwi ryanjye, ndazizi, na zo zikankurikira.

²⁸Nziha ubugingo bw’iteka, kandi ntiziteze gupfa bibaho; byongeye kandi nta n’uzazinkura mu kiganza.

²⁹Data wazimpaye, aruta byose, kandi nta wagira icyo ashikuza mu kiganza cya Data.

³⁰Jye na Data turi umwe[72].»

³¹Abayahudi bongera gufata amabuye yo kumutera.

³²Ni bwo Yezu ababwiye ati «Naberetse ibikorwa byiza byinshi bituruka kuri Data, none muri ibyo bikorwa icyo munterera amabuye ni ikihe?»

³³Abayahudi baramusubiza bati «Si igikorwa cyiza gituma tugutera amabuye; turakuziza igitutsi ututse Imana, kuko uri umuntu maze ukigira Imana.»

³⁴Yezu arabasubiza ati «Mu Mategeko yanyu ntihanditse ngo ’Naravuze nti: muri imana[73]’?

³⁵Ubwo Amategeko yita imana ababwiwe ijambo ry’Imana, kandi Ibyanditswe bidashobora kuvuguruzwa,

³⁶mushobora mute kubwira uwo Data yatagatifuje akamutuma mu nsi, ngo ’Uratuka Imana’, ari uko ngize nti ’Ndi Umwana w’Imana’?

³⁷Niba koko ndakora ibikorwa bya Data, nimureke kunyemera.

³⁸Ariko niba mbikora, maze mukanga kunyemera, nimwemere byibura ibikorwa nkora kugira ngo mumenye kandi mwemere ko Data andimo nanjye nkaba muri Data.»

³⁹Nuko bongera gushaka kumufata, abaca mu myanya y’intoki.

⁴⁰Asubira hakurya ya Yorudani, aho Yohani yajyaga abatiriza mbere, agumayo.

⁴¹Abantu benshi barahamusanga bavuga bati «Nta gitangaza na kimwe Yohani yigeze akora, ariko ibyo yamuvuzeho byari ukuri.»

⁴²Abari aho benshi baramwemera.