Read kinyarwanda Yohani 11 Bible Online

Yohani 11 - kinyarwanda bible

Yohani 11

¹I Betaniya, ku musozi Mariya na mwene nyina Marita bari batuyeho, hari umurwayi witwa Lazaro.

²Mariya ni we wari wasize[74] Nyagasani umubavu, umusatsi we akawuhanaguza ibirenge bye. Lazaro wari urwaye yari musaza we.

³Nuko bashiki be batuma kuri Yezu, bati «Mwigisha, uwo ukunda ararwaye.»

⁴Yezu abyumvise, aravuga ati «Iyo ndwara si iyo kumwica, ahubwo ni iyo kugaragaza ikuzo ry’Imana, ndetse igahesha ikuzo Umwana w’Imana.»

⁵Yezu yakundaga cyane Marita na mwene nyina na Lazaro.

⁶Yumvise ko Lazaro arwaye, amara iminsi ibiri aho yari ari.

⁷Hanyuma abwira abigishwa be ati «Nimuze dusubire mu Yudeya.»

⁸Abigishwa baramubwira bati «Mwigisha, vuba aha Abayahudi bashakaga kugutera amabuye, none usubiyeyo!»

⁹Yezu arabasubiza ati «Mbese umunsi ntufite amasaha cumi n’abiri? Iyo umuntu agenda ku manywa ntatsitara, kuko aba abona urumuri rw’iyi si.

¹⁰Ariko umuntu ugenda nijoro aratsitara, kuko aba adafite urumuri.»

¹¹Amaze kubabwira ibyo, yungamo, ati «Incuti yacu Lazaro arasinziriye, ngiye kumukangura.»

¹²Abigishwa be baramubwira bati «Mwigisha, niba asinziriye azakira.»

¹³Yezu yashakaga kuvuga ko yapfuye, bo bumva ko yaheranywe n’ibitotsi.

¹⁴Yezu noneho araberurira, ati «Lazaro yarapfuye.

¹⁵Mutumye nishimira ko ntahabaye, kugira ngo mwemere. Ariko nimuze tumusange.»

¹⁶Nuko Tomasi witwaga Didimi abwira abandi bigishwa, ati «Reka tujyane, natwe tuzapfane na we.»

¹⁷Yezu agezeyo, asanga Lazaro amaze iminsi ine mu mva.

¹⁸Kuva i Betaniya kugera i Yeruzalemu, hari nk’intera y’amasitadi cumi n’atanu[75].

¹⁹Hari haje Abayahudi benshi kwa Marita na Mariya kubahoza urupfu rwa musaza wabo.

²⁰Marita yumvise ko Yezu aje, ajya kumusanganira, Mariya we asigara imuhira.

²¹Marita abwira Yezu, ati «Mwigisha, iyo uba hano musaza wanjye ntaba yarapfuye.

²²Ariko n’ubu ngubu, nzi ko icyo wasaba Imana cyose, Imana yakiguha.»

²³Yezu ati «Musaza wawe azazuka.»

²⁴Marita arasubiza ati «Nzi ko azazuka igihe cy’izuka ku munsi w’imperuka.»

²⁵Yezu aramubwira ati «Ni jye zuka n’ubugingo; unyemera, n’aho yaba yarapfuye[76], azabaho.

²⁶Byongeye umuntu wese uriho kandi akanyemera, ntateze gupfa. Ibyo urabyemera?»

²⁷Marita ati «Yego, Nyagasani, nemera ko uri Kristu Umwana w’Imana waje muri iyi si.»

²⁸Amaze kuvuga atyo, ajya guhamagara mwene nyina Mariya. Aramwongorera ati «Umwigisha ari hano kandi araguhamagara.»

²⁹Mariya abyumvise, aherako arabaduka, aramusanga.

³⁰Ubwo Yezu yari ataragera aho atuye, yari agihagaze aho Marita yari yamusanganiriye.

³¹Nuko Abayahudi bari kumwe na Mariya mu nzu baje kumuhoza, babonye abadutse agenda, baramukurikira bibwira ko agiye kuririra ku mva.

³²Mariya ageze aho Yezu yari ari, ngo amukubite amaso aramupfukamira, ati «Nyagasani, iyo uba hano, musaza wanjye ntaba yarapfuye.»

³³Yezu amubonye arira, n’Abayahudi bamuherekeje na bo barira, ashenguka umutima maze avugana ikiniga,

³⁴ati «Mwamushyinguye hehe?» Baramubwira bati «Nyagasani, ngwino urebe.»

³⁵Nuko Yezu asuka amarira.

³⁶Abayahudi baravuga bati «Nimurebe ukuntu yamukundaga.»

³⁷Ariko bamwe muri bo baravuga bati «Uwashoboye guhumura ya mpumyi, yari ananiwe kubuza uyu gupfa?»

³⁸Yezu yongera gushenguka umutima maze ajya ku mva; iyo mva yari ubuvumo bari bakingishije ibuye.

³⁹Yezu ati «Nimukureho ibuye.» Marita, mushiki w’uwapfuye, aravuga ati «Nyagasani ubu aranuka: uyu munsi ni uwa kane.»

⁴⁰Yezu aramubwira ati «Sinakubwiye ko niwemera uri bubone ikuzo ry’Imana?»

⁴¹Nuko ibuye barikuraho. Yezu yubura amaso ayerekeza hejuru, avuga ati «Dawe, ndagushimira kuko wanyumvise.

⁴²Jye nari nsanzwe nzi ko unyumva, none mbivugiye aba bantu bankikije, ngira ngo bemere ko ari wowe wantumye.»

⁴³Amaze kuvuga atyo, arangurura ijwi rihanitse, ati «Lazaro, ngwino, sohoka.»

⁴⁴Uwari warapfuye arasohoka, aza ibiganza n’ibirenge bigihambiriye, no mu maso hagipfukishije ibitambaro. Yezu arababwira ati «Nimumuhambure, maze mumureke agende.»

⁴⁵Benshi mu Bayahudi bari baje kwa Mariya, bamaze kubona ibyo Yezu akoze, baramwemera.

⁴⁶Abandi muri bo basanga Abafarizayi, babatekerereza ibyo Yezu yakoze.

⁴⁷Nuko abatware b’abaherezabitambo n’Abafarizayi bakoranya inama nkuru, baravuga bati «Turabigenza dute, ko uriya muntu akomeza gukora ibitangaza byinshi?

⁴⁸Nitumureka agakomeza kuriya, bose bazamwemera, maze Abanyaroma baze badusenyere Ingoro kandi barimbure abaturage.»

⁴⁹Umwe muri bo witwaga Kayifa, wari umuherezabitambo mukuru uwo mwaka, arababwira ati «Nta cyo mubyumvamo!

⁵⁰Ntimubona ko ikiruta ari uko umuntu umwe yapfa mu kigwi cy’imbaga, aho kugira ngo igihugu cyose kirimbuke!»

⁵¹Ibyo ntiyabivuze ku bwe; yabitewe no kuba umuherezabitambo mukuru w’uwo mwaka bimuha guhanura[77], avuga ko Yezu yari agiye gupfira rubanda.

⁵²Bitari no gupfira rubanda gusa, ndetse no gukoranya abana b’Imana batatanye, akababumbira hamwe.

⁵³Nuko guhera uwo munsi bashaka uko bamwicisha.

⁵⁴Yezu na we ntiyongera kujya agaragara hagati y’Abayahudi, ahubwo ajya ahantu hafi y’ubutayu, mu mugi witwa Efurayimu[78], agumayo kumwe n’abigishwa be.

⁵⁵Icyo gihe, Pasika y’Abayahudi yari yegereje; maze abantu bo mu misozi bajya i Yeruzalemu gukora imihango yo kwisukura, mbere ya Pasika.

⁵⁶Bakomeza gushaka Yezu, maze uko bagahagaze mu Ngoro y'Imana, bamwe bati «Kuba ataje mu munsi mukuru mubitekerezaho iki?»

⁵⁷Koko abatware b’abaherezabitambo n’Abafarizayi bari bategetse ko, nihagira umenya aho aherereye, ahavuga kugira ngo baze kumufata.