Read kinyarwanda Yohani 16 Bible Online

Yohani 16 - kinyarwanda bible

Yohani 16

¹Mbibabwiye ngira ngo ejo mudatsitara.

²Bazabaca mu masengero; ndetse n’igihe kirageze, maze uzabica wese azibwire ko yubashye Imana.

³Ibyo bazabibagirira, babitewe n’uko batamenye Data nanjye ntibamenye.

⁴Ibyo mbibabwiye ngira ngo igihe cyabyo nikigera, muzibuke ko nababuriye. Sinabibabwiye ngitangira, kuko twari kumwe.

⁵Ubu rero nsanze Uwantumye, none muri mwe nta we umbaza ati ’Ugiye he?’

⁶Ubwo mbabwiye ibyo, umutima wanyu wuzuye ishavu.

⁷Ariko mbabwire ukuri, ngiye byabagirira akamaro; kuko ntagiye, Umuvugizi ntiyabazamo, ariko ningenda nzamuboherereza.

⁸Kandi namara kuza, azereka ab’isi[105] aho icyaha cyabo kiri, n’aho ubutungane buri, n’urubanza uko ruteye.

⁹Azabereka icyaha cyabo, kuko batanyemeye;

¹⁰azabereka aho ubutungane buri, kuko ngiye kwa Data, kandi mukaba mutakimbonye;

¹¹azabereka uko urubanza ruteye kuko Umutware w’iyi si yaciriwe urubanza.

¹²Ndacyafite byinshi nababwira, ariko ubu ntimwashobora kubyakira.

¹³Ariko Roho Nyir’ukuri uwo naza, azabayobora mu kuri kose, kuko atazavuga yitumirije, ahubwo azavuga ibyo yumvise byose, kandi akazabahanurira n’ibizaza.

¹⁴Azampesha ikuzo, kuko azahabwa ku byanjye akabibamenyesha.

¹⁵Ibyo Data atunze byose ni ibyanjye; ni cyo kinteye kuvuga ko azafata ku byanjye maze akabibamenyesha.

¹⁶Hasigaye akanya gato, ntimwongere kumbona, ariko mu kandi kanya mukambona[106].»

¹⁷Nuko bamwe mu bigishwa be batangira kubwirana bati «Buriya se aratubwira iki, ngo: ni akanya gato ntimumbone, mu kandi kanya mukambona, kandi ngo ngiye kwa Data?»

¹⁸Baravuga bati «Iby’aka kanya gato bivuga iki? Ntituzi icyo ashaka kuvuga.»

¹⁹Yezu amenya ko bashaka kugira icyo bamubaza, arababwira ati «Murabazanya ibyo mvuze nti ’Mu kanya gato ntimuzambona, mu kandi kanya mukazambona.’

²⁰Ndababwira ukuri koko: mwe muzarira ndetse muganye, ariko isi yo izishima. Mwe muzagira ishavu, ariko ishavu ryanyu rizabaviramo ibyishimo.

²¹Umugore iyo agiye kubyara, arababara, kuko igihe cye kiba kigeze, ariko yamara kubyara umwana, ntabe akibuka bwa bubabare, kubera ibyishimo by’uko havutse umuntu ku isi.

²²Namwe ubu koko mufite ishavu, ariko nzongera mbabone, maze imitima yanyu inezerwe; kandi ibyishimo byanyu he kugira ubibavutsa.

²³Uwo munsi[107] kandi ntimuzongera kugira icyo mumbaza. Ndababwira ukuri koko: nimugira icyo musaba Data mu izina ryanjye, azakibaha.

²⁴Kugeza ubu nta cyo mwigeze musaba mu izina ryanjye. Nimusabe muzahabwa, maze ibyishimo byanyu bisendere.

²⁵Ibyo nabibabwiye mu bigereranyo; igihe kirageze noneho simbe nkibabwiza ibigereranyo, maze mbabwire neruye ibyerekeye Data.

²⁶Icyo gihe muzasaba mu izina ryanjye, simbabwiye ngo ni jye uzagira icyo mbasabira Data,

²⁷kuko Data abakundira ko mwankunze, kandi mukemera ko nkomoka ku Mana.

²⁸Nakomotse kuri Data, maze nza mu nsi; none mvuye mu nsi nsanga Data.»

²⁹Abigishwa be baramubwira bati «Erega noneho uravuga weruye, ntukivugira mu bigereranyo.

³⁰Ubu tumenye ko uzi byose, kandi ntukeneye ko hari uwakwirirwa agira icyo akubaza; ngicyo n’igituma twemera ko ukomoka ku Mana.»

³¹Yezu arabasubiza ati «Noneho muremeye?

³²Dore igihe kiregereje, ndetse cyageze, maze mugatatana, umwe ukwe undi ukwe; mukansiga jyenyine. Mumenye ariko ko ntari jyenyine, kuko Data ari kumwe nanjye.

³³Ibi mbibabwiye ngira ngo muhore munkesha amahoro. Hano mu nsi muzahagirira amakuba, ariko nimukomere: isi narayitsinze.»