Read kinyarwanda Yohani 3 Bible Online

Yohani 3 - kinyarwanda bible

Yohani 3

¹Mu Bafarizayi, hari umugabo witwaga Nikodemu[12], akaba umwe mu Bayahudi b’abategetsi.

²Nuko aza nijoro asanga Yezu, aramubwira ati «Rabbi, tuzi ko uri umwigisha waturutse ku Mana; kuko nta muntu washobora gutanga ibimenyetso nk’ibyo werekana, atari kumwe n’Imana.»

³Yezu aramusubiza ati «Ndakubwira ukuri koko: nta muntu n’umwe ushobora kubona Ingoma y’Imana, atavutse ubwa kabiri[13].»

⁴Nikodemu aramubwira ati «Umuntu ashobora ate kuvuka, kandi ashaje? Yashobora se gusubira mu nda ya nyina ngo yongere avuke?»

⁵Yezu aramusubiza ati «Ndakubwira ukuri koko: umuntu atavutse ku bw’amazi no ku bwa Roho, ntashobora kwinjira mu Ngoma y’Imana.

⁶Icyavutse ku mubiri kiba ari umubiri, n’icyavutse kuri Roho kikaba roho.

⁷Ntutangazwe n’uko nkubwiye ngo ugomba kongera kuvuka ubwa kabiri.

⁸Umuyaga[14] uhuha werekeza aho ushaka, ukawumva uhuha, ariko ntumenye aho uturuka cyangwa aho werekeza; nguko uko bimerera umuntu wese wavutse kuri Roho.»

⁹Nikodemu aramubaza ati «Ese ibyo bishobora kubaho bite?»

¹⁰Yezu aramusubiza ati «Ukaba umwigisha muri Israheli, maze ibyo ntubimenye?

¹¹Ndakubwira ukuri koko: tuvuga ibyo tuzi, tugahamya n’ibyo twabonye, ariko ntimwemere ibyo duhamya.

¹²Niba mutemera mbabwira ibintu byo mu isi, muzemera mute nimbabwira ibyo mu ijuru?

¹³Nta wigeze azamuka ajya mu ijuru, uretse Umwana w’umuntu wamanutse aturutse mu ijuru.

¹⁴Mbese nk’uko Musa yamanitse inzoka mu butayu[15], ni ko n’Umwana w’umuntu azagomba kumanikwa,

¹⁵kugira ngo umwemera wese agire ubugingo bw’iteka.»

¹⁶Koko Imana yakunze isi cyane, bigeza aho itanga Umwana wayo w’ikinege, igira ngo umwemera wese atazacibwa, ahubwo agire ubugingo bw’iteka.

¹⁷Icyakora, Imana ntiyohereje Umwana wayo ku isi ngo ayicire urubanza, ahubwo yagira ngo akize isi.

¹⁸Umwemera wese ntacirwa urubanza, ariko utemera aba yaciriwe urubanza, kuko atemera izina ry’Umwana w’ikinege w’Imana.

¹⁹Dore urwo rubanza urwo ari rwo: ni uko urumuri rwaje mu isi, abantu bakikundira umwijima kuruta urumuri, kuko ibikorwa byabo byari bibi.

²⁰Koko rero ukora ibibi wese, yanga urumuri kandi ntarwegere, agira ngo ibyo akora bitagaragara.

²¹Naho rero ukora iby’ukuri, ajya ahabona, agira ngo agaragaze ko ibyo akora biba bikorewe Imana.

²²Ibyo birangiye, Yezu ajyana n’abigishwa be mu gihugu cya Yudeya, agumanayo na bo, kandi arabatiza.

²³Yohani na we yabatirizaga ahitwa Enoni, hafi ya Salimu, kuko hari amazi menshi, abantu bakaza kuhabatirizwa.

²⁴Icyo gihe, Yohani yari atarafungwa.

²⁵Nuko abigishwa ba Yohani bajya impaka n’Abayahudi bapfa umuhango wo kwiyuhagira.

²⁶Basanga Yohani, baramubwira bati «Mwigisha, wa muntu mwari kumwe hakurya ya Yorudani, ugatanga ubuhamya bumwerekeyeho, dore na we arabatiza, kandi bose baramusanga.»

²⁷Yohani arabasubiza ati «Nta muntu ugira icyo atunga atagihawe no mu ijuru.

²⁸Ni mwe ntanzeho abagabo b’uko navuze ko ntari Kristu, ahubwo ko natumwe kumuteguriza.

²⁹Umukwe ni we nyir’umugeni, naho umuherekeza w’umukwe aba iruhande rwe, akamutega amatwi, agahimbazwa no kumva ijwi rye; ngibyo ibyishimo binsabye.

³⁰Koko ni we ugomba gukura, naho jye ngaca bugufi.»

³¹Uza aturutse hejuru, aba asumbye bose; naho uza aturutse mu isi, aba ari uw’isi, kandi avuga iby’isi. Uza aturutse mu ijuru aza asumbye bose;

³²ahamya ibyo yabonye n’ibyo yumvise, nyamara nta muntu n’umwe wakira ibyo ahamya.

³³Uwakira ibyo ahamya, aba yemeza ko Imana ari Inyakuri.

³⁴Uwo Imana yatumye, avuga amagambo y’Imana, kuko Imana itamuha Roho wayo imugerera.

³⁵Imana Data ikunda Mwana, kandi ibintu byose yabishyize mu maboko ye.

³⁶Uwemera Mwana agira ubugingo bw’iteka, uwanga kwemera Mwana ntazagira ubugingo, ahubwo uburakari bw’Imana bumuhoraho.