Read kinyarwanda Yohani 4 Bible Online

Yohani 4 - kinyarwanda bible

Yohani 4

¹Yezu amaze kumenya ko Abafarizayi bari bumvise ko afite abigishwa benshi, ko yabatizaga kurusha Yohani,

²— mu by’ukuri si Yezu wabatizaga, ahubwo ni abigishwa be —

³ni bwo avuye mu Yudeya, asubira mu Galileya;

⁵Agera mu mugi wo muri Samariya witwaga Sikari, wari hafi y’umurima[16] Yakobo yari yarahaye umuhungu we Yozefu.

⁶Aho hantu hari iriba rya Yakobo[17]. Yezu ahagera yananijwe n’urugendo, maze yicara iruhande rw’iriba. Hari nk’isaha ya gatandatu.

⁷Nuko umugore wo kuri Samariya aza kuvoma amazi. Yezu aramubwira ati «Mpa amazi yo kunywa.»

⁸Icyo gihe abigishwa be bari bagiye mu mugi kugura ibyo kurya.

⁹Umunyasamariyakazi abwira Yezu, ati «Bishoboka bite kugira ngo wowe w’Umuyahudi unsabe amazi yo kunywa, kandi ndi Umunyasamariyakazi?» Koko rero Abayahudi ntibasangiraga[18] n’Abanyasamariya.

¹⁰Yezu aramusubiza ati «Iyaba wari uzi ingabire y’Imana, ukamenya n’ukubwira ati ’Mpa amazi yo kunywa’, wajyaga kuyamusaba ari wowe, maze akaguha amazi atanga ubugingo.»

¹¹Umugore aramubwira ati «Nyakubahwa, ntufite n’icyo uvomesha, byongeye kandi iriba ni rirerire cyane; ayo mazi atanga ubugingo[19] wayakura he?

¹²Uzabe uruta umubyeyi wacu Yakobo waduhaye iri riba, akarinyweraho, we n’abana be n’amatungo ye?»

¹³Yezu aramusubiza ati «Unywa aya mazi wese azongera agire inyota;

¹⁴ariko uzanywa amazi nzamuha, ntazagira inyota ukundi, ahubwo amazi nzamuha, azamubamo ari isoko idudubiza kugera mu bugingo bw’iteka.»

¹⁵Umugore aramubwira, ati «Nyakubahwa, mpa kuri ayo mazi n’ejo ntazongera kugira inyota, nkagaruka hano nje kuvoma.»

¹⁶Yezu aramubwira ati «Jya guhamagara umugabo wawe, maze ugaruke hano.»

¹⁷Umugore aramusubiza ati «Nta mugabo mfite.» Yezu ati «Uvuze neza, wowe ugize uti ’Nta mugabo mfite’;

¹⁸kuko wagize abagabo batanu, n’ugutunze ubu akaba atari umugabo wawe. Ubivuze ukuri.»

¹⁹Umugore abwira Yezu ati «Nyakubahwa, mbonye ko uri umuhanuzi.

²⁰Ba sogokuruza bacu basengeraga kuri uyu musozi[20], naho mwebwe Abayahudi mukavuga ko i Yeruzalemu ari ho abantu bagomba gusengera.»

²¹Yezu aramubwira ati «Mugore, nyemera: dore igihe kiregereje ntimube mugisengera Imana Data kuri uyu musozi, cyangwa se i Yeruzalemu.

²²Mwebwe musenga Uwo mutazi, naho twe tugasenga Uwo tuzi, kuko umukiro uturuka mu Bayahudi.

²³Igihe kiregereje, ndetse ngiki cyageze, maze abasenga by’ukuri bakazasengana Imana Data umutima utaryarya, kuko abayisenga batyo ari bo Imana Data yikundira.

²⁴Imana ni Roho, bityo abasenga bajye bayisenga by’ukuri, bayobowe na Roho.»

²⁵Umugore abwira Yezu ati «Nzi ko Umukiza, ari we Kristu, agiye kuza; namara kuza azatwigisha byose.»

²⁶Yezu aramubwira ati «Ni jye uvugana nawe.»

²⁷Abigishwa be baba barahindukiye, maze batangazwa n’uko yaganiraga n’umugore. Ariko ntihagira ugira ati «Urashaka iki?» cyangwa ngo «Mwavuganaga iki?»

²⁸Nuko umugore asiga ikibindi aho, ajya mu mugi, maze abwira abantu ati

²⁹«Nimuze murebe umuntu wambwiye ibyo nakoze byose. Aho none ntiyaba ari we Kristu?»

³⁰Ni bwo bavuye mu mugi, nuko basanga Yezu.

³¹Hagati aho, abigishwa be basigara bamwinginga ngo arye, bati «Mwigisha, fungura.»

³²Yezu arababwira ati «Mfite ibyo kurya mwebwe mutazi.»

³³Nuko abigishwa batangira kubazanya bati «Ese hari uwamuzaniye ibyo kurya?»

³⁴Yezu arababwira ati «Ibyo kurya bintunga, ni ugukora icyo Uwantumye ashaka, no kurangiza umurimo we.

³⁵Si mwe musanzwe muvuga ngo hasigaye amezi ane, bagasarura? Reka rero mbabwire: ngaho nimwubure amaso maze mwitegereze, imirima ireze, ni iyo gusarurwa[21].

³⁶Usarura wese aba abonye igihembo, maze agahunika imbuto z’ubugingo bw’iteka, kugira ngo ari ubiba ari n’usarura, bombi basangire ibyishimo.

³⁷Ubwo ibyo bikagaragaza ukuri kw’ibivugwa ngo: ubiba si we usarura[22].

³⁸Nabohereje gusarura ibyo mutaruhiye; abandi bararushye, none mwe muhawe ibyo baruhiye.»

³⁹Nuko Abanyasamariya benshi b’uwo mugi bemera Yezu, babitewe n’ijambo umugore yari yavuze ahamya ati «Yambwiye ibyo nakoze byose.»

⁴⁰Abanyasamariya baramusanga, baramwinginga ngo aze agumane na bo, maze aguma aho iminsi ibiri.

⁴¹Nuko abantu benshi cyane baremera, babitewe n’ibyo yababwiraga.

⁴²Babwira wa mugore, bati «Ntitucyemezwa n’ibyo watubwiye; natwe twamwiyumviye, kandi tumenye ko ari we Mucunguzi w’isi koko.»

⁴³Iyo minsi ibiri irangiye, Yezu ava aho, ajya mu Galileya.

⁴⁴Yari yigeze kwemera ubwe ko ari nta muhanuzi wubahwa mu gihugu avukamo.

⁴⁵Nuko agera mu Galileya, Abanyagalileya bamwakira neza, kuko bari babonye ibyo yari yakoreye i Yeruzalemu byose ku munsi mukuru[23]; na bo bari bagiye mu munsi mukuru.

⁴⁶Yezu agaruka rero i Kana ka Galileya, aho yari yahinduye amazi divayi. I Kafarinawumu hari umutware w’ibwami wari urwaje umwana.

⁴⁷Yumvise ko Yezu yavuye mu Yudeya akaza mu Galileya, aramusanganira, aramwinginga ngo aze amukirize umwana kuko yari agiye gupfa.

⁴⁸Yezu aramubwira ati «Iyo mutabonye ibimenyetso n’ibitangaza, ntimwemera.»

⁴⁹Umutware aramubwira ati «Nyagasani, banguka umwana wanjye atarahwera.»

⁵⁰Yezu aramusubiza ati «Genda, umwana wawe ni mutaraga.» Uwo muntu yemera ijambo Yezu amubwiye, aragenda.

⁵¹Abaye agitirimuka, abagaragu be baramusanganira, bamubwira ko umwana we ari muzima.

⁵²Ababaza igihe yoroherewe, baramusubiza bati «Ni ejo ku isaha ya karindwi, ni bwo umuriro wamuvuyemo.»

⁵³Se w’umwana amenya ko kuri iyo saha, ari bwo Yezu yamubwiraga ko umwana we ari mutaraga. Nuko aremera hamwe n’urugo rwe rwose.

⁵⁴Icyo kiba ikimenyetso cya kabiri. Yezu yagikoze avuye mu Yudeya, agarutse mu Galileya.