Read kinyarwanda Yohani 6 Bible Online

Yohani 6 - kinyarwanda bible

Yohani 6

¹Ibyo birangiye, Yezu ajya hakurya y’inyanja ya Galileya ari yo Tiberiya.

²Abantu benshi baramukurikira, bitewe n’uko babonaga ibimenyetso yerekanaga akiza abarwayi.

³Nuko Yezu aterera umusozi, ageze mu mpinga aricara ari kumwe n’abigishwa be.

⁴Ubwo Pasika[29], umunsi mukuru w’Abayahudi, yari yegereje.

⁵Yezu arambura amaso, abona cya kivunge cy’abantu kije kimugana. Ni ko kubaza Filipo, ati «Turagura he imigati yo kugaburira bariya bantu?»

⁶Ibyo yabimubwiye amwinja, kuko yari azi icyo ari bukore.

⁷Filipo aramusubiza ati «N’uwagura imigati y’amadenari[30] magana abiri, umuntu ntiyabonaho na kanzinya.»

⁸Umwe mu bigishwa be witwaga Andereya, mwene nyina wa Simoni Petero, aramubwira ati

⁹«Hano hari agahungu gafite imigati itanu y’ingano za bushoki n’amafi abiri, ariko se byamarira iki abantu bangana batya?»

¹⁰Yezu ati «Nimwicaze abantu.» Aho hantu hari ibyatsi byinshi. Nuko baricara, abagabo bari nk’ibihumbi bitanu.

¹¹Maze Yezu afata imigati, arashimira, ayigaburira abari bicaye aho, abaha n’ifi, uko bazishakaga.

¹²Bamaze guhaga, Yezu abwira abigishwa be, ati «Nimurundarunde ibimanyu bisigaye, ntihagire ibipfa ubusa.»

¹³Babishyira hamwe, maze buzuza inkangara cumi n’ebyiri z’ibimanyu kuri ya migati itanu y’ingano za bushoki byashigajwe n’abari bariye.

¹⁴Abo bantu babonye ikimenyetso Yezu amaze gukora, baravuga bati «Koko ni ukuri, uyu ni wa Muhanuzi[31] ugomba kuza mu isi.»

¹⁵Yezu rero amenya ko bagiye kuza kumujyana ku mbaraga, bakamwimika[32], arongera ahungira ku musozi ari wenyine.

¹⁶Bugorobye, abigishwa be baramanuka no ku nkombe y’inyanja.

¹⁷Bajya mu bwato, berekeza hakurya y’inyanja, ahagana i Kafarinawumu, nuko bubiriraho kandi Yezu atarabageraho.

¹⁸Hahuha umuyaga mwinshi, inyanja yitera hejuru.

¹⁹Bamaze kugashya ahantu h’amasitadi[33] makumyabiri n’atanu cyangwa mirongo itatu, babona Yezu agenda ku nyanja, ageze hafi y’ubwato. Ubwoba burabataha.

²⁰Ni bwo Yezu ababwiye ati «Nimuhumure, ni jye.»

²¹Bashatse kumushyira mu bwato, babona ubwato bugeze ku mwaro aho bajyaga.

²²Bukeye, ya mbaga y’abantu bari basigaye hakurya y’inyanja babona ko nta bundi bwato bwari buhari, uretse bumwe gusa, bari bazi kandi ko Yezu atari yabugiyemo hamwe n’abigishwa be, ahubwo ko abigishwa bari bagiye bonyine.

²³Icyakora andi mato yari yaturutse i Tiberiya, hafi y’aho bari baririye imigati.

²⁴Ya mbaga y’abantu ibonye ko Yezu n’abigishwa be batagihari, bajya mu mato bagana i Kafarinawumu kuhashakira Yezu.

²⁵Bamusanze hakurya y’inyanja, baramubaza bati «Mwigisha, wageze hano ryari?»

²⁶Yezu arabasubiza ati «Ndababwira ukuri koko: ntimunshakira ko mwabonye ibimenyetso, ahubwo muranshakira ko mwariye imigati mugahaga.

²⁷Nimujye mukora mudaharanira ibiribwa bishira, ahubwo nimuharanire ibiribwa bihoraho mu bugingo bw’iteka, ibyo Umwana w’umuntu azabaha, kuko ari we Imana Data yashyizeho ikimenyetso.»

²⁸Baramubaza bati «Twagenza dute kugira ngo dukore ibyo Imana ishima?»

²⁹Yezu arabasubiza ati «Igikorwa Imana ishima, ni uko mwakwemera uwo yatumye.»

³⁰Nuko baramubwira bati «Ikimenyetso utanze ni ikihe, ngo tukibone maze tukwemere? Ukoze iki?

³¹Mu butayu, ba sogokuruza bacu bariye ’manu[34]’, nk’uko byanditswe ngo ’Yabagaburiye umugati uturutse mu ijuru.’»

³²Nuko Yezu arabasubiza ati «Ndababwira ukuri koko: Musa si we wabahaye umugati wo mu ijuru, ahubwo ni Data ubaha umugati w’ukuri wo mu ijuru.

³³Kuko umugati Imana itanga ari umanuka mu ijuru, kandi ukazanira isi ubugingo.»

³⁴Nuko baramubwira bati «Mwigisha, jya uhora uduha uwo mugati utubwiye.»

³⁵Yezu arababwira ati «Ni jyewe mugati utanga ubugingo. Unsanga wese ntazasonza bibaho, n’unyemera ntazagira inyota[35] bibaho.

³⁶Nyamara narabibabwiye: murambona ariko mukanga kwemera.

³⁷Uwo Data ampa wese angeraho, kandi uza ansanga sinzamujugunya hanze.

³⁸Namanutse mu ijuru ntazanywe no gukora ibyo nshaka, ahubwo nje gukora ibyo Uwantumye ashaka.

³⁹Icyo Uwantumye ashaka ni ukutagira n’umwe nzimiza mu bo yampaye, ahubwo nkazamuzura ku munsi w’imperuka.

⁴⁰Icyo Data ashaka, ni uko ubona Mwana wese akamwemera, yagira ubugingo bw’iteka, maze nkazamuzura ku munsi w’imperuka.»

⁴¹Nuko Abayahudi barijujuta, bitewe n’uko yari yavuze ati «Ndi umugati wamanutse mu ijuru.»

⁴²Maze baravuga bati «Uriya si Yezu, mwene Yozefu? Se na nyina ntitubazi? Ubu ashobora ate kuvuga ati ’Namanutse mu ijuru’?»

⁴³Yezu arabasubiza ati «Nimureke kuvugana mwijujuta.

⁴⁴Nta we ushobora kungeraho atabihawe na Data wanyohereje, nanjye nkazamuzura ku munsi w’imperuka.

⁴⁵Mu gitabo cy’Abahanuzi[36] haranditse ngo ’Bose baziyigishirizwa n’Imana.’ Umuntu wese wumvise Data akigishwa, aransanga.

⁴⁶Nta wigeze abona Data, uretse uwaturutse[37] ku Mana; uwo nguwo ni we wabonye Data.

⁴⁷Ndababwira ukuri koko: uwemera agira ubugingo bw’iteka.

⁴⁸Ni jye mugati w’ubugingo.

⁴⁹Ba sogokuruza banyu baririye manu mu butayu, maze bararenga barapfa.

⁵⁰Nguyu umugati wamanutse mu ijuru, kugira ngo uwuriye wese ye kuzapfa.

⁵¹Ni jye mugati muzima wamanutse mu ijuru. Urya uwo mugati azabaho iteka; kandi umugati nzatanga, ni umubiri wanjye[38], kugira ngo isi igire ubugingo.»

⁵²Ni bwo Abayahudi batangiye kujya impaka ubwabo, bati «Ashobora ate kuduha umubiri we ngo uribwe?»

⁵³Yezu arabasubiza ati «Ndababwira ukuri koko: nimutarya umubiri w’Umwana w’umuntu, ntimunywe n’amaraso ye, ntimuzagira ubugingo muri mwe.

⁵⁴Naho urya umubiri wanjye, akanywa n’amaraso yanjye, agira ubugingo bw’iteka, kandi nzamuzura ku munsi w’imperuka.

⁵⁵Kuko umubiri wanjye ari ikiribwa koko, n’amaraso yanjye akaba ikinyobwa koko.

⁵⁶Urya umubiri wanjye kandi akanywa amaraso yanjye, angumamo nanjye nkamugumamo.

⁵⁷Mbese nk’uko Data wantumye ariho, nanjye nkabaho ku bwa Data, bityo undya, na we azabaho ku bwanjye.

⁵⁸Nguyu umugati wamanutse mu ijuru: si nk’uwo ba sogokuruza banyu bariye bakarenga bagapfa; urya uyu mugati azabaho iteka ryose.»

⁵⁹Ibyo yabivuze igihe yigishirizaga mu isengero ry’i Kafarinawumu.

⁶⁰Abenshi mu bigishwa be bamaze kumwumva, baravuga bati «Aya magambo arahambaye, ni nde washobora kuyatega amatwi?»

⁶¹Yezu amenya ko abigishwa be bijujutiye ayo magambo, arababwira ati «Mbese ibyo birabatsitaje?

⁶²Noneho ubwo hacura iki mubonye Umwana w’umuntu azamutse ajya aho yahoze mbere hose?

⁶³Roho ni we ubeshaho, umubiri nta kavuro. Amagambo nababwiye aturuka kuri Roho, kandi agatanga ubugingo.

⁶⁴Ariko muri mwe harimo abatemera.» Koko Yezu yari azi mbere hose abatemera, ndetse yari azi n’uzamugambanira.

⁶⁵Arongera ati «Ngiyo impamvu yatumye mbabwira ko ari nta we ushobora kunsanga atabihawe na Data.»

⁶⁶Kuva ubwo, benshi mu bigishwa be bavanamo akabo karenge, ntibongera kugendana na we ukundi.

⁶⁷Nuko Yezu abwira ba Cumi na babiri, ati «Namwe se murashaka kwigendera?»

⁶⁸Simoni Petero aramusubiza ati «Nyagasani, twasanga nde wundi, ko ari wowe ufite amagambo y’ubugingo bw’iteka.

⁶⁹Twe twaremeye, kandi tuzi ko uri Intungane y’Imana[39].»

⁷⁰Yezu arababwira ati «Si jye wabatoye uko muri Cumi na babiri? Nyamara umwe muri mwe ni uwa Sekibi.»

⁷¹Uwo ni Yuda, mwene Simoni Isikariyoti, Yezu yavugaga. Kuko ari we wari ugiye kumugambanira, n’ubwo yari umwe muri ba Cumi na babiri.