Read kinyarwanda Yohani 7 Bible Online

Yohani 7 - kinyarwanda bible

Yohani 7

¹Ibyo birangiye, Yezu akomeza kuzenguruka muri Galileya; ntiyashakaga kujya mu Yudeya, kuko Abayahudi bamuhigaga ngo bamwice.

²Umunsi mukuru w’Abayahudi witwa uw’Ingando[40] ukaba wegereje.

³Abavandimwe be[41] baramubwira bati «Haguruka, ujye mu Yudeya, abigishwa bawe[42] na bo babone ibikorwa ukora.

⁴Nta we ukorera ibintu ahihishe ashaka kuba ahagaragara; ubwo ukora bene ibyo, igaragarize isi.»

⁵Koko rero n’abavandimwe be ntibamwemeraga.

⁶Nuko Yezu arababwira ati «Igihe cyanjye ntikiragera, igihe cyanyu cyo gihora kiboneye.

⁷Isi ntishobora kubanga, ariko jye iranyanga, kuko mpamya ko ibyo ikora ari bibi.

⁸Mwe nimugende, mujye mu munsi mukuru; jye sinjya muri uwo munsi mukuru, kuko igihe cyanjye kitaruzuzwa.»

⁹Amaze kubabwira atyo, yihamira mu Galileya.

¹⁰Abavandimwe be bamaze kugenda bajya mu munsi mukuru, na we ajyayo, atari ku mugaragaro ahubwo nka rwihishwa.

¹¹Abayahudi bamushakiraga mu munsi mukuru, babaririza bati «Mbese wa wundi ari hehe?»

¹²Rubanda bahwihwisaga byinshi bimwerekeyeho, bamwe bati «Ni umuntu mwiza», abandi bati «Oya, ahubwo arayobya rubanda.»

¹³Nta muntu watinyukaga kuvuga ibimwerekeyeho yeruye, kuko batinyaga Abayahudi[43].

¹⁴Umunsi mukuru ugeze hagati, Yezu ajya mu Ngoro y'Imana, arigisha.

¹⁵Abayahudi baratangara, baravuga bati «Uyu ashobora ate kumenya Ibyanditswe, atarigeze yiga[44]?»

¹⁶Yezu arabasubiza ati «Inyigisho mvuga, si izanjye, ahubwo ni iz’Uwantumye.

¹⁷Ukereye gukora icyo Imana ishaka, amenyeraho ko inyigisho mvuga ari iz’Imana, cyangwa se ko ari izo nihimbira ubwanjye.

¹⁸Uvuga ibye bwite, aba ashaka kwihesha ikuzo, naho ushaka ikuzo ry’Uwamutumye, uwo ni umunyakuri, kandi nta kinyoma kimurangwaho.

¹⁹Mbese nta mategeko Musa yabahaye? Nyamara nta n’umwe muri mwe uyakurikiza.

²⁰Kuki mushaka kunyica?» Rubanda baramusubiza bati «Aho ntuhanzweho na roho mbi? Ni nde ushaka kukwica?»

²¹Yezu arabasubiza ati «Nakoze igikorwa kimwe[45], mwese muratangara.

²²Musa yabahaye umuhango wo kugenya kandi utamuturutseho, ahubwo yarawukuye kuri ba sogokuruza, maze mukagenya umuntu ku isabato.

²³Niba umuntu agenywa ku munsi w’isabato, ntibyice itegeko rya Musa, mutewe n’iki kundakarira kuko nakijije umuntu ku munsi w’isabato?

²⁴Ntimugace urubanza mukurikije ibigaragara, ahubwo mujye muruca mukurikije ubutabera.»

²⁵Bamwe mu batuye i Yeruzalemu baravuga bati «Uriya si wa wundi bahigaga bashaka kumwica?

²⁶Nyamara dore aravugira mu ruhame, nta cyo bavuga. Aho abategetsi bacu ntibamenye by’ukuri ko ari we Kristu?

²⁷Ariko uyu tuzi aho akomoka, naho Kristu naza, nta we uzamenya aho aturuka[46].»

²⁸Yezu yigishiriza mu Ngoro y'Imana aranguruye ijwi, ati «Ni koko muranzi kandi muzi n’aho nkomoka! Icyakora sinaje ku bwanjye; Uwantumye ni We Munyakuri, Uwo mwe ntimumuzi.

²⁹Jye ndamuzi, kuko ari We nkomokaho, kandi akaba ari We wantumye.»

³⁰Ni bwo bashatse kumufata, ariko ntihagira n’umwe umukozaho n’urutoki, kuko igihe cye cyari kitaragera.

³¹Icyakora benshi muri rubanda baramwemera, baravuga bati «Kristu naza, aho azakora ibimenyetso biruta ibyo uyu akora ?»

³²Abafarizayi bumvise ko rubanda rukomeza guhwihwisa ibyo byose, bo n’abatware b’abaherezabitambo bohereza abagaragu babo ngo bamufate.

³³Yezu aravuga ati «Ndacyari kumwe namwe igihe gito, nyuma ngasanga Uwantumye.

³⁴Muzanshaka mumbure, kandi ntimuteze kugera aho nzaba ndi.»

³⁵Abayahudi batangira kubazanya bati «Agiye kuzajya he, tutazamusanga? Azabe agiye gusanga Abayahudi batataniye mu banyamahanga, maze akigisha abanyamahanga?

³⁶Aya magambo avuze arashaka kuvuga iki, ngo ’Muzanshaka mumbure, kandi ntimuteze kugera aho nzaba ndi’?»

³⁷Ku munsi usoza iminsi mikuru, ari na wo uyirusha ibirori, Yezu arahagarara, arangurura ijwi ati «Ufite inyota nansange anywe.

³⁸Unyemera, nk’uko byanditswe[47], imigezi y’amazi atanga ubugingo izamuvubukamo.»

³⁹Ibyo yabivuze abyerekeje kuri Roho uzahabwa abamwemera. Kugeza icyo gihe, Roho yari ataratangwa, kuko Yezu yari atarahabwa ikuzo rye.

⁴⁰Benshi muri rubanda bumvise ayo magambo, bati «Uyu ni we wa Muhanuzi[48] koko.»

⁴¹Abandi bati «Ni Kristu.» Abandi na bo bati «Kristu azaturuke se mu Galileya?

⁴²Ibyanditswe ntibivuga ko Kristu[49] ari uwo mu nkomoko ya Dawudi, ko azaturuka ku musozi wa Betelehemu, aho Dawudi yavukiye[50]?»

⁴³Ibyo bituma rubanda bicamo ibice kubera we.

⁴⁴Bamwe muri bo bashakaga kumufata, ariko ntihagira umukozaho n’urutoki.

⁴⁵Nuko abagaragu baragaruka basanga abatware b’abaherezabitambo n’Abafarizayi; barababaza bati «Ko mutamuzanye ni iki?»

⁴⁶Abagaragu barabasubiza bati «Nta muntu wigeze avuga nk’uwo muntu.»

⁴⁷Abafarizayi bati «Ese namwe mwashukitse?

⁴⁸Hari n’umwe mu Bategetsi cyangwa se mu Bafarizayi wamwemeye?

⁴⁹Si rubanda ruriya rutazi amategeko? Ni ibivume.»

⁵⁰Umwe muri bo, Nikodemu, wigeze gusanga Yezu mbere, arababwira ati

⁵¹«Harya amategeko yacu apfa gucira umuntu urubanza, batabanje kumwumva ngo bamenye icyo yakoze?»

⁵²Baramusubiza bati «Mbese nawe uri Umunyagalileya? Uzashishoze, uzasanga ari nta muhanuzi uvuka mu Galileya!»

⁵³Nuko bose barikubura barataha, umwe iwe, undi iwe.