Read kinyarwanda Yohani 9 Bible Online

Yohani 9 - kinyarwanda bible

Yohani 9

¹Yihitira abona umuntu wavutse ari impumyi.

²Maze abigishwa be baramubaza bati «Mwigisha, uwacumuye ni nde, ari uyu muntu, ari n’ababyeyi be, kugira ngo avuke ari impumyi[61]?»

³Yezu arabasubiza ati «Ari we, ari n’ababyeyi be, nta wacumuye, ahubwo ni ukugira ngo ibyo Imana ikora bimugaragarireho.

⁴Ni ngombwa gukora imirimo y’Uwantumye hakibona; ijoro riraje, kandi muri ryo nta wagira icyo akora.

⁵Igihe nkiri ku isi, ndi urumuri rw’isi.»

⁶Amaze kuvuga atyo, acira hasi, amacandwe[62] ye ayatobesha akondo, agasiga ku maso y’impumyi.

⁷Maze arayibwira ati «Jya kwiyuhagira mu cyuzi cya Silowe» (bivuga ngo: uwatumwe[63]). Nuko impumyi iragenda, iriyuhagira, ihindukira ibona.

⁸Bituma abaturanyi n’abandi bari barabonye asabiriza bavuga bati «Uriya si wa wundi wajyaga yirirwa yicaye asabiriza?»

⁹Bamwe bati «Ni we», abandi bati «Si we, ahubwo ni usa na we.» Arababwira ati «Ni jye.»

¹⁰Ni bwo bamubwiye bati «Amaso yawe yahumutse ate?»

¹¹Arabasubiza ati «Ni wa muntu bita Yezu: yatobye akondo, akansiga ku maso, maze arambwira ati ’Jya mu cyuzi cya Silowe maze wiyuhagire.’ Nuko njyayo, ndiyuhagira, none ndabona.»

¹²Baramubwira bati «Uwo muntu ari hehe?» Arabasubiza ati «Simpazi.»

¹³Nuko uwahoze ari impumyi bamushyira Abafarizayi.

¹⁴Hari ku munsi w’isabato[64] igihe Yezu atobye akondo, agahumura amaso ye.

¹⁵Abafarizayi na bo bongera kumubaza uko yahumutse. Arababwira ati «Yansize akondo ku maso, ndiyuhagira, none ndabona.»

¹⁶Bamwe mu Bafarizayi baravuga bati «Uwo muntu ntakomoka ku Mana, kuko atubahiriza isabato.» Ariko abandi bati «Bishoboka bite ko umunyabyaha yakora ibitangaza nk’ibi?» Ni bwo biciyemo ibice.

¹⁷Barongera babwira impumyi bati «Wowe se, uwaguhumuye umuvugaho iki?» Arababwira ati «Ni umuhanuzi.»

¹⁸Abayahudi banga kwemera ko yari impumyi n’uko yahumutse, bigeza igihe bahamagaje ababyeyi be.

¹⁹Barababaza bati «Uyu koko ni umwana wanyu muvuga ko yavutse ari impumyi? Ubu se ahumutse ate?»

²⁰Ababyeyi be barasubiza bati «Icyo tuzi, ni uko uyu ari umwana wacu kandi ko yavutse ari impumyi.

²¹Uko byagenze kugira ngo abone ntitubizi, n’uwamuhumuye amaso ntitumuzi. Nimumwibarize, ni mukuru, niyivugire ubwe».

²²Ababyeyi be bavuze batyo babitewe no gutinya Abayahudi, kuko Abayahudi bari babyumvikanyeho ko umuntu wese uzemera ko Yezu ari Kristu, bazamuca mu isengero[65].

²³Ni cyo cyateye ababyeyi be kuvuga bati «Arakuze, nimumwibarize.»

²⁴Abayahudi bongera guhamagara ubwa kabiri uwo muntu wahoze ari impumyi, baramubwira bati «Singiza Imana[66], twe tuzi ko uwo muntu ari umunyabyaha.»

²⁵Arababwira ati «Niba ari umunyabyaha, ibyo simbizi; icyo nzi ni kimwe: ni uko nari impumyi none nkaba mbona!»

²⁶Bongera kumubaza bati «Yakugenjereje ate? Yaguhumuye amaso ate?»

²⁷Arabasubiza ati «Nabibabwiye kandi ntimwabyumva, murashaka kongera kubyumvira iki? Namwe se murashaka kuba abigishwa be?»

²⁸Nuko bamuhunda ibitutsi, bati «Urakaba umwigishwa we, twe turi abigishwa ba Musa.

²⁹Tuzi ko Imana yavuganye na Musa, ariko we ntituzi aho aturuka.»

³⁰Wa muntu arabasubiza ati «Ibyo biratangaje, kuba mutazi aho aturuka kandi yampumuye amaso.

³¹Tuzi neza ko Imana itumva abanyabyaha, tukamenya ko uwubaha Imana, agakora icyo ishaka, imwumva.

³²Kuva na kera kose nta wigeze yumva bavuga ko hari uwahumuye uwavutse ari impumyi.

³³Uwo muntu iyo adaturuka ku Mana, nta cyo aba yashoboye gukora.»

³⁴Baramusubiza bati «Wazikamye wese mu byaha ukivuka, none ni wowe ugiye kutwigisha?» Nuko bamusuka hanze.

³⁵Yezu aza kumva ko bamuroshye hanze. Bahuye, Yezu aramubaza ati «Wemera Umwana w’umuntu[67]?»

³⁶We arasubiza ati «Nyakubahwa, ni nde ngo mwemere?»

³⁷Yezu aramubwira ati «Wamubonye, kandi ni We muvugana.»

³⁸Ni bwo avuze ati «Ndemera, Nyagasani.» Nuko arapfukama aramuramya.

³⁹Yezu aramubwira ati «Naje mu nsi nje guca urubanza, kugira ngo abatabona bahumuke, maze ababona babe impumyi.»

⁴⁰Bamwe mu Bafarizayi bari kumwe na we babyumvise, baramubwira bati «Natwe se turi impumyi?»

⁴¹Yezu arabasubiza ati «Iyo muba impumyi, nta cyaha mwajyaga kugira. None ubwo mugize ngo ’Turabona’, icyaha cyanyu kigumyeho.