Read kinyarwanda Ibyakozwe 19 Bible Online

Ibyakozwe 19 - kinyarwanda bible

Ibyakozwe 19

¹Igihe Apolo yari i Korinti, Pawulo na we agera i Efezi, aturutse mu bihugu by’amajyaruguru. Ahasanga abigishwa bamwe,

²ni ko kubabaza ati «Mbese igihe mwemeye, mwaba mwarahawe Roho Mutagatifu?» Baramusubiza bati «Haba ngo twigeze no kumva ko Roho Mutagatifu abaho!»

³Pawulo ni ko kubabaza ati «None se mwahawe iyihe batisimu?» Baramusubiza bati «Batisimu ya Yohani.»

⁴Nuko Pawulo aravuga ati «Yohani yatangaga batisimu yo kwisubiraho, agasaba rubanda kwemera Uwari ugiye kuza nyuma ye, ari we Yezu.»

⁵Bamaze kubyumva, babatizwa mu izina rya Nyagasani Yezu.

⁶Nuko Pawulo abaramburiraho ibiganza, maze Roho Mutagatifu abamanukiraho; bavuga mu ndimi kandi barahanura.

⁷Bose hamwe bari bageze nko ku bantu cumi na babiri.

⁸Mu mezi atatu yose, Pawulo yajyaga mu isengero akavuga ashize amanga, akagerageza kwemeza abamwumvaga ibyerekeye Ingoma y’Imana.

⁹Ariko bamwe bakomeje kunangira umutima banga kwemera, bagatuka inzira ya Nyagasani mu ruhame. Pawulo ni ko gutandukana na bo, ajyana n’abigishwa akabigishiriza buri munsi mu ishuri ry’umuntu witwa Tirano.

¹⁰Amara imyaka ibiri abigenza atyo, kugeza ubwo abaturage bose ba Aziya, Abayahudi kimwe n’Abagereki, bumva ijambo rya Nyagasani.

¹¹Imana yakoreshaga Pawulo ibitangaza bidasanzwe,

¹²kugeza ubwo bafataga ibitambaro cyangwa imyenda yakoze ku mubiri we, bakabikoza ku barwayi bagakira indwara zabo, na za roho mbi zikabavamo.

¹³Hari Abayahudi bamwe bazereraga ibihugu birukana roho mbi mu bantu, na bo bagerageza kuzirukana bitwaje izina rya Nyagasani Yezu, bavuga bati «Ndabirukanye mu izina rya Yezu uwo Pawulo yamamaza.»

¹⁴Abakoraga ibyo, ni abahungu barindwi b’Umuyahudi witwaga Seba, akaba n’umuherezabitambo mukuru.

¹⁵Nyamara roho mbi irabasubiza iti «Yezu ndamuzi, na Pawulo nkamumenya, ariko se mwe muri bande?»

¹⁶Nuko uwo muntu wari wahanzweho na roho mbi arabasimbukira, abarusha amaboko bose maze abagirira nabi, kugeza ubwo baturumbuka mu nzu bagahunga bambaye ubusa kandi ari inkomere.

¹⁷Abaturage bose b’i Efezi, Abayahudi kimwe n’Abagereki, ngo babimenye bashya ubwoba, basingiza izina rya Nyagasani Yezu.

¹⁸Abenshi mu bari baremeye baraza, bakiregera mu ruhame ibikorwa bibi bakoze.

¹⁹Abakoraga iby’ubupfumu, na bo batari bake, bakoranya ibitabo byabo[65] babitwikira mu ruhame. Ngo babarure agaciro k’ikiguzi cyabyo, basanga bihwanye n’ibiceri bya feza ibihumbi mirongo itanu.

²⁰Bityo ku bw’imbaraga za Nyagasani, ijambo ry’Imana rikomeza kwamamara no gushinga imizi ihamye.

²¹Nyuma y’ibyo, Pawulo abwirijwe na Roho Mutagatifu, yiyemeza kujya i Yeruzalemu anyuze muri Masedoniya no muri Akaya. Yaravugaga ati «Nimara kugerayo, bizaba ngombwa no kujya i Roma.»

²²Nuko atuma babiri mu bafasha be i Masedoniya, Timote na Erasito, naho we asigara igihe gito muri Aziya.

²³Icyo gihe ni bwo habyutse impagarara zikomeye mu mugi, zerekeye inzira ya Nyagasani.

²⁴Hakaba rero umucuzi witwaga Demetiriyo, wacuraga mu muringa udushushanyo tw’ingoro z’ikigirwamana cyitwa Aritemisi[66], bikaba byaramuzaniraga we n’abo bakoranaga inyungu zitangaje.

²⁵Nuko akoranya abo bakoranaga n’abandi banyamyuga bari begeranye, arababwira ati «Ncuti zanjye, muzi ko umunezero wacu tuwukesha uyu murimo.

²⁶None rero, nk’uko mubyirebera kandi mukabyiyumvira, Pawulo uwo aroshya rubanda rwose, atari Efezi honyine, ahubwo no muri Aziya yose, ababwira ko imana dukora atari zo.

²⁷Si ugutinya gusa ko umwuga wahinyuka, ahubwo n’ingoro y’imanakazi nkuru Aritemisi ishobora guta agaciro, igasuzugurika kandi ari yo isengwa n’Abanyaziya, ndetse n’abantu b’isi yose.»

²⁸Abantu ngo babyumve bararakara cyane, ni ko gutera hejuru bati «Aritemisi y’Abanyefezi ni igihangange!»

²⁹Nuko umugi wose uravurungana, icyo kivunge cy’abantu kiroha mu kibuga cy’amakoraniro, basumira abantu babiri bo muri Masedoniya, Gayo na Arisitariko, bagendanaga na Pawulo.

³⁰Pawulo yari yiyemeje gusanganira icyo kivunge cy’abantu, ariko abigishwa ntibamukundira.

³¹Ndetse na bamwe mu bategetsi ba Aziya bari incuti ze bamutumaho, bamwinginga bamusaba kutigaragaza mu kibuga.

³²Ikoraniro ryose riravurungana, bagasakuza bose, umwe avuga ibye undi ibye, ndetse abenshi muri bo ntibari bazi n’impamvu yabakoranyije.

³³Abantu batekerereza byose uwitwa Alegisanderi, ari we Abayahudi bari bashyize imbere. Nuko ashyira ukuboko ejuru ngo baceceke, ashaka kugira icyo abwira rubanda.

³⁴Ariko ngo bamenye ko ari Umuyahudi, basakuriza icyarimwe bimara amasaha abiri, bavuga bati «Aritemisi y’Abanyefezi ni igihangange!»

³⁵Umunyamabanga w’umugi amaze kubacecekesha, abwira rubanda ati «Banyefezi, ni nde utazi ko umurwa wacu wa Efezi ari umugi weguriwe Aritemisi w’igihangange, ukarinda n’ishusho rye ryamanutse mu ijuru?

³⁶Ubwo rero nta we ubihakana, mugomba gutuza mukareka guhubuka.

³⁷Byongeye, mwazanye hano abantu batigeze basuzugura cyangwa ngo batuke imanakazi yacu!

³⁸Niba rero Demetiriyo na bagenzi be bafite uwo bagira icyo barega, inkiko ziriho n’abacamanza barahari; aho ni ho bagomba kuburanira.

³⁹Niba kandi hari ikindi mushaka kubaza, kizakiranurwa n’ikoraniro ryemewe n’amategeko.

⁴⁰Ndetse n’iri teraniro rishobora kutuviramo kuregwa ubugome, kuko ari nta ngingo twakwifashisha kugira ngo dusobanure impamvu zaryo.» Amaze kuvuga ayo magambo, asezerera rubanda.