Read kinyarwanda Ibyakozwe 8 Bible Online

Ibyakozwe 8 - kinyarwanda bible

Ibyakozwe 8

¹Sawuli na we yari mu bemeye ubwo bwicanyi. Uwo munsi haduka itotezwa rikomeye muri Kiliziya y’i Yeruzalemu, maze bose uretse Intumwa, batatanira mu turere twa Yudeya na Samariya.

²Abantu bubaha Imana bahamba Sitefano, baramuririra cyane.

³Naho Sawuli we agumya kuyogoza Kiliziya, akinjira mu mazu, agafata abagabo n’abagore, akabashyira mu buroko.

⁴Abari batatanye bagendaga hose, bamamaza Inkuru Nziza y’ijambo ry’Imana.

⁵Filipo na we aramanuka ajya mu mugi wa Samariya, yigisha abahatuye ibya Kristu.

⁶Rubanda bashishikariraga n’umutima umwe inyigisho za Filipo, kuko bari barumvise ibitangaza yakoraga kandi bakanabibona.

⁷Koko rero, roho mbi zasohokaga mu bari bahanzweho zisakuza, ibimuga byinshi n’ibirema bigakira.

⁸Nuko muri uwo mugi haba ibyishimo byinshi.

⁹Muri uwo mugi hakaba umugabo witwa Simoni, wari umupfumu, maze agatangaza Abanyasamariya, yiyita akataraboneka.

¹⁰Abantu bose kuva ku muto kugera ku mukuru bakamwihambiraho, bavuga bati «Uyu muntu arimo Ububasha bw’Imana, ubwo bita Ubuhangange.»

¹¹Icyatumaga bamwihambiraho batyo, ni uko yari amaze igihe kirekire yarabararuye n’ubwo bupfumu bwe.

¹²Ariko aho bamariye kwemera Filipo wabamenyeshaga Inkuru Nziza y’Ingoma y’Imana n’izina rya Yezu Kristu, abagabo n’abagore barabatizwa.

¹³Nuko na Simoni ubwe aremera, arabatizwa, maze yihambira kuri Filipo; yabona ibimenyetso bikomeye n’ibitangaza byakorwaga, akumirwa.

¹⁴Intumwa zari i Yeruzalemu zimenye ko muri Samariya bakiriye ijambo ry’Imana, ziboherereza Petero na Yohani.

¹⁵Bagezeyo, basabira Abanyasamariya kugira ngo bahabwe Roho Mutagatifu,

¹⁶kuko ari nta n’umwe muri bo yari yaramanukiyeho; bakaba bari barabatijwe gusa mu izina rya Nyagasani Yezu.

¹⁷Nuko Petero na Yohani babaramburiraho ibiganza[41], maze bahabwa Roho Mutagatifu.

¹⁸Simoni rero ngo abone ko Roho Mutagatifu atangwa no kuramburirwaho ibiganza n’Intumwa, azizanira amafaranga, azibwira ati

¹⁹«Nimumpe nanjye ubwo bubasha, kugira ngo uwo nzaramburiraho ibiganza ajye ahabwa Roho Mutagatifu.»

²⁰Petero aramusubiza ati «Uragapfana n’amafaranga yawe, kuko watekereje ko ingabire y’Imana igurwa amafaranga!

²¹Nta mugabane, nta n’umurage ufite muri ibi, kuko umutima wawe udatunganiye Imana.

²²Ngaho rero ihane ubwo bugome bwawe, kandi utakambire Nyagasani; wenda yakubabarira icyo gitekerezo cyinjiye mu mutima wawe,

²³kuko mbona uri mu ndurwe isharira no mu ngoyi y’icyaha.»

²⁴Simoni ni ko gusubiza ati «Nimunsabire namwe kuri Nyagasani, kugira ngo hatagira ikingwirira mu byo mwavuze.»

²⁵Petero na Yohani bamaze guhamya no kwamamaza ijambo rya Nyagasani, basubira i Yeruzalemu. Bamamaza Inkuru Nziza mu nsisiro nyinshi z’Abanyasamariya.

²⁶Umumalayika wa Nyagasani abwira Filipo, ati «Haguruka, ugende werekeje mu majyepfo, unyure mu muhanda umanuka i Yeruzalemu ujya i Gaza, ubu ngubu ukaba utarimo abagenzi.»

²⁷Filipo ahera ko aragenda. Ubwo Umunyetiyopiya wari icyegera cya Kandasi, umwamikazi wa Etiyopiya, akaba n’umunyabintu we, yari yaje gusengera Imana i Yeruzalemu.

²⁸Yari mu nzira ataha, yicaye mu igare rye, agenda asoma igitabo cya Izayi umuhanuzi.

²⁹Roho Mutagatifu abwira Filipo ati «Genda, wegere ririya gare.»

³⁰Filipo ariruka, yumva uwo mutware asoma mu gitabo cya Izayi umuhanuzi, aramubaza ati «Mbese aho ibyo usoma urabyumva?»

³¹Undi aramusubiza ati «Nabyumva nte se, ntabonye unsobanurira.» Nuko asaba Filipo kurira ngo yicare iruhande rwe.

³²Muri ibyo Byanditswe yahasomaga ibi ngibi «Bamushoreye nk’intama bajyanye mu ibagiro, cyangwa nk’umwana w’intama wicecekera imbere y’uwupfura ubwoya, na we ntiyaruhije abumbura umunwa.

³³Yacishijwe bugufi, acirwa urubanza rw’akarengane. Ni nde uzavuga iby’abazamukomokaho? Ko ubugingo bwe bwazimanganye ku isi, nta cyo yasize[42].»

³⁴Uwo mutware abaza Filipo ati «Ndagusabye ngo umbwire: ni nde umuhanuzi avugaho ibi ngibi? Ni kuri we ubwe, cyangwa se ni undi muntu yavugaga?»

³⁵Filipo ni ko guterura, ahereye kuri iyo ngingo y’Ibyanditswe, amumenyesha Inkuru Nziza ya Yezu.

³⁶Uko bagakomeje inzira baza kugera ku mugezi, wa mutware aravuga ati «Dore amazi! Ni iki se kandi cyambuza kubatizwa?» (37 [43] Filipo aramusubiza ati «Niba wemera Yezu n’umutima wawe wose, birashoboka.» Undi aramubwira ati «Ndemera ko Yezu Kristu ari Umwana w’Imana.»)

³⁸Nuko ategeka ko bahagarika igare, bombi baramanuka bajya mu mazi, Filipo n’umutware, maze Filipo aramubatiza.

³⁹Bamaze kuva mu mazi Roho Mutagatifu ajyana Filipo, uwo mutware ntiyongera kumubona ukundi, ahubwo yikomereza urugendo rwe yishimye.

⁴⁰Naho Filipo ngo arebe, asanga ari mu mugi wa Azoti, maze yamamaza Inkuru Nziza mu migi yose yanyuragamo, kugeza ko agera i Kayizareya.