Read kinyarwanda Abanyaroma 10 Bible Online

Abanyaroma 10 - kinyarwanda bible

Abanyaroma 10

¹Bavandimwe, icyo umutima wanjye wifuza n’icyo nsaba Imana ni uko barokoka.

²Ndahamya rwose ko bafitiye Imana ishyaka, ariko nta bushishozi,

³kuko bayobewe ubutungane buturuka ku Mana, bashaka gushyiraho ubwabo bwite, ntibayoboka ubutungane bw’Imana.

⁴Kuko amategeko agarukira[44] kuri Kristu, kugira ngo uwemera wese ahabwe kuba intungane.

⁵Koko rero Musa yanditse ko ubutungane buturuka ku mategeko, kandi ko umuntu uzayubahiriza, azabeshwaho na yo.

⁶Naho ubutungane buturuka ku kwemera bwo bukavuga buti «Ntukavuge mu mutima wawe ngo ’Ni nde uzazamuka mu ijuru?’» ari byo kuvuga kumanurayo Kristu,

⁷cyangwa ngo «Ni nde uzamanuka ikuzimu?» ari byo kuvuga kuzamura Kristu mu bapfuye.

⁸Ni ukuvuga iki se ahubwo? «Ijambo rikuri bugufi cyane, riri mu kanwa kawe no mu mutima wawe[45].» Iryo jambo ni iry’ukwemera twamamaza.

⁹Kuko niba wamamarisha umunwa wawe ko Kristu ari Nyagasani kandi ukemera mu mutima wawe ko Imana yamuzuye mu bapfuye, uzarokorwa.

¹⁰Nuko rero umuntu yemera n’umutima bikamuha ubutungane, yakwamamarisha umunwa bikamuha uburokorwe.

¹¹Kuko Ibyanditswe bivuga ngo «Umwemera wese ntazakozwa isoni[46].»

¹²Nta tandukanyirizo rero hagati y’Umuyahudi n’Umugereki: Nyagasani ni umwe kuri bose, akungahaza abamwambaza bose.

¹³Kuko «umuntu wese uzambaza izina rya Nyagasani, azarokorwa[47].»

¹⁴Bakwiyambaza bate rero Uwo bataremera? Bakwemera bate se Uwo batarumva? Bamwumva bate ntawamwamamaje?

¹⁵Bamwamamaza bate niba batatumwe? Nk’uko byanditswe ngo «Mbega ngo biraba byiza ibirenge by’abogeza inkuru nziza[48]!»

¹⁶Nyamara si ko bose bumviye Inkuru Nziza. Koko rero Izayi yaravuze ati «Nyagasani, ni nde wemeye inyigisho zacu[49]?»

¹⁷Bityo rero, ukwemera gushingira ku nyigisho, inyigisho na yo ku ijambo rya Kristu.

¹⁸Reka nanjye mbaze: mbese ntibumvise? Barumvise. Ahubwo ndetse ngo «Ijwi ryabo ryakwiriye isi yose, n’ijambo ryabo rigera ku mpera z’isi[50].»

¹⁹Nongere mbaze: mbese Israheli yaba itarasobanukiwe? Musa ni we wabanje kuvuga ati «Nzabaharika ikitari umuryango muterwe ishyari[51] n’ihanga ritagira ubwenge[52].»

²⁰Izayi we ntatinya kuvuga ati «Nabonywe n’abatanshakashakaga, nigaragariza abatambaririzaga[53]»;

²¹naho Israheli akayibwira ati «Nirije umunsi ntegeye amaboko umuryango utanyumvira, wigometse[54].»