Read kinyarwanda Abanyaroma 12 Bible Online

Abanyaroma 12 - kinyarwanda bible

Abanyaroma 12

¹Bavandimwe rero, mbinginze ku bw’impuhwe z’Imana: nimuture imibiri[62] yanyu, ibe igitambo nyabuzima, gitagatifu kandi kinyuze Imana; ngiryo iyobokamana ryabava ku mutima.

²Kandi ntimukigane ibi bihe turimo, ahubwo nimuhinduke, mwivugururemo ibitekerezo, kugira ngo muzajye mumenya neza ugushaka kw’Imana, ikiri cyiza, icyashimisha n’ikiboneye.

³Ku bw’ingabire nahawe, reka ngire icyo mbwira buri wese muri mwe: ntimukirebe ibisumbye uko mugomba kwireba, ahubwo muzirikane ibifasha kwiyoroshya, buri wese mu rugero rw’ukwemera Imana yamugeneye.

⁴Mbese nk’uko mu mubiri umwe tugira ingingo nyinshi kandi ingingo zose ntizikore umurimo umwe,

⁵bityo turi benshi, ariko tugize umubiri umwe muri Kristu, buri wese ku buryo bwe akabera abandi urugingo.

⁶Dufite ingabire zinyuranye bikurikije ineza twagiriwe. Uwahawe ingabire y’ubuhanuzi, ajye ahanura akurikije ukwemera;

⁷uwahawe ingabire yo kwita ku bandi, abiteho; uwahawe kwigisha, niyigishe;

⁸uwahawe gutera abandi inkunga, nayibatere. Utanga, atange nta kindi akurikiranye; uyobora, ayoborane umwete; utabara abatishoboye, nabafashe anezerewe.

⁹Urukundo rwanyu ruzire uburyarya. Ikibi kibashishe mugihunge, naho icyiza mukihambireho.

¹⁰Mukundane urukundo rwa kivandimwe, mushyire imbere icyahesha buri wese icyubahiro.

¹¹Muragire umwete ntimukabe abanebwe, nimushishikare, mube abagaragu ba Nyagasani.

¹²Mwishimire amizero mufite, mwiyumanganye mu magorwa, ntimugahweme gusenga.

¹³Musangire n’abatagatifujwe bakennye, muharanire gufata neza abashyitsi.

¹⁴Musabire umugisha ababatoteza, mubasabire umugisha aho kubavuma.

¹⁵Mwishimane n’abishimye, murirane n’abarira.

¹⁶Muhuze imitima; ntimukararikire ibibasumbye, ahubwo mwimenyereze ibiciye bugufi. «Ntimukishime ubwenge bwanyu[63].»

¹⁷Ntihakagire uwo mwitura inabi; «mwihatire kugaragariza abantu bose ibyiza mukora[64].»

¹⁸Bishobotse, mu rugero byabaturukaho mwebwe, mubane mu mahoro n’abantu bose.

¹⁹Ntimukihorere ubwanyu, nkoramutima zanjye, ahubwo muhe akanya uburakari bw’Imana nk’uko byanditswe ngo «Kumara inzigo ni ibyanjye, ni jye uzatanga inyiturano[65]», uwo ari Nyagasani ubivuga.

²⁰Ahubwo rero «niba umwanzi wawe ashonje, muhe icyo kurya; niba afite inyota, muhe icyo kunywa. Kuko nugenza utyo, uzaba umurahuriye ku mutwe amakara agurumana[66].»

²¹Ntukareke inabi ikuganza, ahubwo inabi uyiganjishe ineza.