Read kinyarwanda Abanyaroma 16 Bible Online

Abanyaroma 16 - kinyarwanda bible

Abanyaroma 16

¹Mbashinze mushiki wacu Foyibe, umudiyakonikazi[81] mu Kiliziya y’i Kenkireya[82],

²kugira ngo mumwakire muri Nyagasani nk’uko bikwiriye abatagatifujwe, kandi ngo muzamufashe mu byo yabakeneraho byose, kuko na we yatabaye benshi, barimo jye.

³Mutashye Purisika na Akwila, abafasha banjye muri Kristu Yezu;

⁴abo ni bo bishyize mu kaga, kugira ngo barwane ku buzima bwanjye. Si jye jyenyine ubashimira, ahubwo na Kiliziya zose z’abanyamahanga.

⁵Mutashye na Kiliziya ijya iteranira mu rugo rwabo. Mutashye incuti yanjye Epayineto, we muganura Aziya yahaye Kristu.

⁶Mutashye Mariya wabavunikiye cyane.

⁷Mutashye bene wacu Andironiki na Yuniya, twasangiye umunyururu; ni intumwa z’ibirangirire kandi babaye aba Kristu mbere yanjye.

⁸Mutashye Ampiliyato, incuti yanjye muri Nyagasani.

⁹Muntahirize Urubano umufasha wanjye muri Kristu, ndetse na Sitaki incuti yanjye.

¹⁰Muntahirize kwa Arisitobuli.

¹¹Muntahirize mwene wacu Herodiyoni. Muntahirize abo kwa Narisisi bari muri Nyagasani.

¹²Muramutse Tirifayina na Tirifoza baruhira cyane Nyagasani. Mundamukirize inkoramutima Perisida, na we uvunikira cyane Nyagasani.

¹³Muramutse Rufo, intore muri Nyagasani, ndetse na nyina ari we wanjye.

¹⁴Mutashye Asinkirito, Filegonti, Erimesi, Patiroba, Herimasi n’abavandimwe bari kumwe na bo.

¹⁵Muramutse Filologo na Yuliya, Nereyi na mushiki we, na Olimpiya n’abatagatifujwe bari kumwe na bo.

¹⁶Nimuramukanye mu muhoberano mutagatifu. Kiliziya zose za Kristu zirabatashya.

¹⁷Ndabinginze kandi, bavandimwe, mwitondere abazana amacakubiri n’ingero mbi, bakanyuranya n’inyigisho mwahawe; mubagendere kure.

¹⁸Bene abo ntibakorera Kristu Umwami wacu, ahubwo inda yabo, maze amagambo yabo y’uburyarya n’ubucakura akayobya imitima itagira iribi.

¹⁹Ukumvira kwanyu kwamenyekanye hose; ndabishimiye rero ariko ndashaka ko muba abahanga mu gukora icyiza n’abaswa mu gukora ikibi.

²⁰Imana, Yo soko y’amahoro, izajanjagurira Sekibi mu nsi y’ibirenge byanyu vuba. Ineza y’Umwami wacu Yezu Kristu ibane namwe!

²¹Timote, umufasha wanjye, arabatashya, na bene wacu Lusiyo, na Yasoni, na Sosipateri.

²²Nanjye ndabatashya muri Nyagasani, jyewe Teritiyo wanditse[83] uru rwandiko.

²³Arabatashya Gayusi uncumbikiye jye na Kiliziya yose.

²⁴Arabaramutsa Erasito umubikamari w’umugi, n’umuvandimwe Kuwariti.

²⁵Nihasingizwe Imana, Yo ifite ububasha bwo kubakomeza bihuje n’Inkuru Nziza nabashyikirije namamaza Yezu Kristu, nkurikije iyobera ryari ryaracecetswe kuva kera kose,

²⁶ubu rikaba ryahishuriwe abanyamahanga bose, rikagaragarira mu byanditswe by’abahanuzi. Nguko uko Imana Ihoraho yabigennye kugira ngo na bo ibageze ku kwemera bayumvire.

²⁷Imana Nyir’ubuhanga nihabwe ikuzo muri Yezu Kristu, uko ibihe bihora bisimburana iteka. Amen.