Read kinyarwanda Abanyaroma 3 Bible Online

Abanyaroma 3 - kinyarwanda bible

Abanyaroma 3

¹Umuyahudi arusha iki abandi? Ukugenywa bimaze iki?

²Bifite akamaro kanini kandi ku buryo bwose. Mbere na mbere kuko ari bo baragijwe amagambo y’Imana.

³Bite rero? Niba bamwe muri bo barahemutse, ubuhemu bwabo bwahindura ubusa ubudahemuka bw’Imana?

⁴Ntibikabeho! Imana irabe imvugakuri, naho umuntu wese abe umubeshyi, nk’uko byanditswe ngo «Urabe intungane mu magambo yawe, uzatsinde nushyirwa mu rubanza[9].»

⁵Ariko se niba inabi yacu igaragaza ubutungane bw’Imana, tuvuge ngo iki? Mbese Imana ntirenganya, Yo ihanira ko yarakaye?

⁶Ndavuga ku buryo bw’abantu. Ntibikabe! Naho ubundi se, Imana yazacira ite isi urubanza?

⁷Nyamara se, niba ukuri kw’Imana kurushaho kugaragara ku mpamvu y’ikinyoma cyanjye, maze Imana igahabwa ikuzo, ni uruhe rubanza rwampamya kuba umunyabyaha ?

⁸Kandi ni iki kitubuza gukora ibibi ngo bibyare ibyiza, nk’uko batubeshyera bavuga ko ari yo nyigisho yacu ? Abo ngabo bazacirwa urubanza rubakwiriye.

⁹Bite rero ? Hari icyo turusha abandi se ? Habe na mba ! Dore tumaze guhamya bose icyaha[10], ari Abayahudi, ari Abagereki,

¹⁰nk’uko byanditswe ngo «Nta ntungane wabona, habe n’imwe,

¹¹nta we uzi ubwenge, nta we ushaka Imana.

¹²Bose barayobye, babereye ibigoryi icyarimwe, nta n’umwe ukora icyiza, habe n’umwe.

¹³Umuhogo wabo ni imva irangaye, indimi zabo zisuka ibinyoma. Iminwa yabo ijunditse ubumara nk’ubw’impiri,

¹⁴akanwa kabo kuzuyemo imivumo n’amagambo asesereza.

¹⁵Ibirenge byabo byihutira kumena amaraso,

¹⁶amatongo n’imiborogo ni byo biranga aho banyuze.

¹⁷Ntibazi inzira y’amahoro,

¹⁸nta gitinyiro cy’Imana mu maso yabo[11].

¹⁹Nyamara tuzi ko ibyo amategeko avuze byose, bibwirwa abagengwa n’amategeko kugira ngo akanwa kose kazibe, maze isi yose yemezwe kuba yaragomeye Imana.

²⁰Ni yo mpamvu nta n’umwe uzagirwa intungane mu maso yayo n’uko yubahiriza amategeko, kuko amategeko afasha gusa kumenya icyaha.

²¹Ubu ngubu ariko ubutungane bw’Imana bwarahishuwe hatagombye amategeko; intangamugabo ni amategeko n’abahanuzi.

²²Ni ubutungane bw’Imana butangwa no kwemera Yezu Kristu, bukaba bugenewe abemera bose nta vangura.

²³Kuko bose bagomye, bakivutsa ikuzo ry’Imana.

²⁴Ariko bahabwa kuba intungane[12] n’ineza yayo ku buntu, babikesha gucungurwa[13] na Kristu Yezu.

²⁵Ni We Imana yagize intangacyiru mu maraso ye ku bw’ukwemera, kugira ngo igaragaze ubutungane bwayo, Yo yarenze ku byaha bya kera,

²⁶mu gihe yabyihanganiraga. Ubu ngubu rero igaragaza ubutungane bwayo kugira ngo ibe intungane[14], kandi ihe kuba intungane ugengwa no kwemera Yezu.

²⁷Wa mwirato ushingiye he se noneho? Warashize. Uzize irihe teka? Iryo kubahiriza amategeko? Oya! Ahubwo itegeko ry’ukwemera[15].

²⁸Koko rero, turahamya ko umuntu ahabwa kuba intungane n’ukwemera hatagombye ibikorwa by’amategeko.

²⁹Mbese Imana yaba iy’Abayahudi bonyine? Nta bwo se ari n’iy’abanyamahanga? Yego, ni n’iy’abanyamahanga.

³⁰Ubwo ari Imana imwe, izaha uwagenywe kuba intungane abikesha ukwemera, n’utagenywe na we abikesha ukwemera.

³¹Ubwo se turambura amategeko agaciro kayo tuvuga ukwemera? Ntibikabe! Ahubwo tuyahaye ishingiro.