Read kinyarwanda Abanyaroma 4 Bible Online

Abanyaroma 4 - kinyarwanda bible

Abanyaroma 4

¹Twavuga iki ku mukurambere wacu Abrahamu? Hari icyo yaba yararonse ku bw’umubiri?

²Niba Abrahamu yarabaye intungane abikesheje ibyo yakoze, akwiriye kubyirata, usibye imbere y’Imana.

³None se ibyanditswe bivuga iki? Ngo «Abrahamu yemera Uhoraho, bituma aba intungane.»

⁴Umuntu kandi ukoze umurimo, igihembo ntagihabwa ku buntu, ahubwo barakimugomba.

⁵Naho utagize icyo akora, ariko akemera uha umunyabyaha kuba intungane, uko kwemera kwe kuzamuha ubutungane.

⁶Nk’uko Dawudi avuga amahirwe y’umuntu Imana iha kuba intungane kandi nta bikorwa, ati

⁷«Hahirwa abababariwe ibicumuro, maze ibyaha byabo bikarenzwaho.

⁸Hahirwa umuntu Nyagasani adashinja icyaha[16].»

⁹Mbese ayo mahirwe ni ay’abagenywe bonyine cyangwa ni n’ay’abatagenywe? Tuvuga ko «ukwemera kwahaye Abrahamu kuba intungane.»

¹⁰Kwabimuhaye buryo ki? Mbere cyangwa nyuma yo kugenywa? Si nyuma, ahubwo ni mbere yo kugenywa.

¹¹Nyuma ukugenywa yaguhaweho ikimenyetso, irango ry’ubutungane akesha ukwemera yagize ataragenywa, kugira ngo abe umubyeyi w’abemera bose batagenywe, ngo bahabwe kuba intungane,

¹²n’umubyeyi kandi w’abagenywe, batari abangenywe bonyine, ahubwo n’abashyira ikirenge mu cya Abrahamu bakurikiza ukwemera yari afite ataragenywa.

¹³Koko rero, nta bwo ari amategeko yatumye Abrahamu cyangwa urubyaro rwe basezeranywa guhabwa isi yose ho umurage, ahubwo ni ubutungane butangwa n’ukwemera.

¹⁴Kuko niba abiringiye amategeko ari bo ngenerwamurage, ukwemera kwaba nta mumaro, n’isezerano rikaba risheshwe.

¹⁵Kuko amategeko akurura uburakari. Ariko ahataba amategeko, nta we ucumura.

¹⁶Ni yo mpamvu, ari ku bw’ukwemera isezerano ryabaye ihame, ritangwa ku buntu, rigenerwa urubyaro rwose, atari abishingikirije amategeko bonyine, ahubwo ndetse n’abishingikirije ukwemera kwa Abrahamu, we mubyeyi wacu twese,

¹⁷nk’uko byanditswe ngo «Nakugize sekuru w’amahanga menshi[17].» Yemeye Imana, Yo isubiza ubuzima abapfuye, igaha kubaho ibitariho.

¹⁸Yizeye ibidashoboka nyamara aremera, maze aba atyo umubyeyi w’amahanga menshi bikurikije rya jambo ngo «Dore uko urubyaro rwawe ruzangana[18].»

¹⁹Ntiyigeze acogora mu kwemera areba umubiri we washaje — yakabakabaga imyaka ijana — n’inda ya Sara yumiranye, kuko urupfu rwari rwarabatashye bombi.

²⁰Ntiyabura ubwizere ngo ashidikanye isezerano ry’Imana, ahubwo akomezwa n’ukwemera maze yiragiza ikuzo ry’Imana.

²¹Yiyemeza rwose ko ishobora kuzuza icyo yasezeranye.

²²Ni yo mpamvu ibyo byatumye agirwa intungane.

²³Nyamara si we wenyine byandikiwe ko ukwemera kugeza ku butungane;

²⁴natwe ni uko bizamera, twe twemera Uwazutse mu bapfuye, Yezu umwami wacu,

²⁵watangiwe ibyaha byacu, akazukira kutugira intungane.