Read kinyarwanda Abanyakorinti, iya 1 11 Bible Online

Abanyakorinti, iya 1 11 - kinyarwanda bible

Abanyakorinti, iya 1 11

¹Nimube rero abakurikiza banjye, nk’uko nanjye nkurikiza Kristu.

²Ndabashimira ko muhora munyibuka, kandi mu budahemuka mukikomezamo ibyo nababwirije byose.

³Nyamara dore icyo mukwiye kumenya: Kristu ni we mugenga wa buri mugabo, umugore na we akagengwa n’umugabo; na we Kristu akagengwa n’Imana.

⁴Umugabo wese usenga cyangwa uhanura[52] yitwikiriye umutwe, aba asuzuguye umutegetsi we.

⁵Naho umugore wese usenga cyangwa uhanura atitwikiriye umutwe, aba asuzuguye umutegetsi we; mbese ni nk’aho yaba yimojeho umusatsi.

⁶Niba rero umugore adateze igitambaro[53], n’imisatsi yose nayimareho! Nasanga ariko bimuteye isoni kwimoza cyangwa kwikemuza, natege igitambaro!

⁷Umugabo we ntagomba kwipfuka mu mutwe, kuko ari ishusho n’uburanga bw’Imana; naho umugore akaba ikuzo ry’umugabo we.

⁸N’ubundi umugabo si we wakomotse ku mugore, ahubwo umugore ni we wakomotse ku mugabo.

⁹Kandi umugabo koko si we waremewe umugore, ahubwo umugore ni we waremewe umugabo.

¹⁰Ngiyo impamvu umugore agomba kwambara ku mutwe ikimenyetso cy’uko agengwa, mbese abigiriye n’abamalayika[54].

¹¹Nyamara muri Nyagasani umugabo wese agizwe n’umugore, n’umugore agizwe n’umugabo we.

¹²N’ubwo umugore yavuye ku mugabo, umugabo na we akabyarwa n’umugore, bombi baturuka ku Mana.

¹³Ngaho namwe nimumbwire: bishoboka bite ko umugore asenga Imana atitwikiriye umutwe?

¹⁴N’ubusanzwe biteye isoni ko umugabo atendeza imisatsi,

¹⁵nyamara ni ishema ry’umugore ko ayitunga atyo, bikurikije kamere yabo bombi, kuko umugore yayiherewe kumutwikira.

¹⁶Ahasigaye ushaka guhariranya, amenye ko atari umuco wacu[55], si n’uwa Kiliziya z’Imana.

¹⁷Tuvuye muri ibyo hari n’ibindi ntabashimaho: amakoraniro yanyu, aho kubagirira akamaro, abagwa nabi.

¹⁸Icya mbere cyo, bambwiye ko, iyo muhuriye mu ikoraniro, mwiremamo ibice kandi bisa n’aho ari byo:

¹⁹wagira ngo ni ngombwa ko muri mwe habamo amakimbirane, kugira ngo ababakomeyemo bigaragaze.

²⁰Igihe rero muteraniye hamwe, ntimuhuzwa n’isangira rya Nyagasani[56],

²¹kuko buri wese amaranira kurya ibyo yizaniye, ku buryo umwe yicwa n’inzara, undi yasinze.

²²Mbese nta mazu mugira yo kuriramo no kunyweramo? Cyangwa muzanwa no gusuzugura imbaga y’Imana, no gukoza isoni abatagira icyo bafite ? Mbabwire iki se? Mbashime se ? Oya, muri ibyo simbashimye.

²³Jyewe rero dore ibyo nashyikirijwe na Nyagasani, bikaba ari byo nabagejejeho : Nyagasani Yezu, araye ari butangwe, yafashe umugati,

²⁴amaze gushimira, arawumanyura, avuga ati «Iki ni umubiri wanjye ubatangiwe; mujye mubikora namwe bibe urwibutso rwanjye.»

²⁵Barangije kurya, n’inkongoro ayigenzereza atyo, avuga ati «Iyi ni inkongoro y’Isezerano rishya, rishingiye ku maraso yanjye; mujye mubikora namwe, kandi igihe cyose muyinywereyeho, bibe urwibutso rwanjye.»

²⁶Kuko igihe cyose murya uyu mugati, mukanywa no kuri iyi nkongoro, muba mwamamaza urupfu rwa Nyagasani, kugeza igihe azazira.

²⁷Ni cyo gituma uzarya uyu mugati, akanywa no kuri iyi nkongoro ya Nyagasani, atabikwiye, azaba acumuriye umubiri n’amaraso bya Nyagasani.

²⁸Buri wese nabanze yisuzume rero, maze abone kurya uwo mugati no kunywa kuri iyo nkongoro;

²⁹kuko uwarya cyangwa akanywa atubahirije umubiri wa Nyagasani, aba ariye kandi anyoye ikizamubyarira ubucibwe.

³⁰Ni cyo gituma benshi muri mwe barwaye kandi bamugaye[57], ndetse bamwe bakaba barapfuye.

³¹Iyaba twabanzaga kwisuzuma ubwacu, nta rundi rubanza twacirwa.

³²Ariko Nyagasani adutonganyiriza kutugorora, kugira ngo tutarohamana n’iyi si.

³³Bityo rero, bavandimwe, igihe muhuriye gusangira, nimurindirane.

³⁴Niba hari ushonje, nabanze ahembukire iwe, kugira ngo ikoraniro ryanyu ritababyarira ubucibwe. Ibisigaye nzabitunganya, igihe nzaba naje.