Read kinyarwanda Abanyakorinti, iya 1 16 Bible Online

Abanyakorinti, iya 1 16 - kinyarwanda bible

Abanyakorinti, iya 1 16

¹Ku byerekeye imfashanyo zigenewe abatagatifujwe[74], muzakurikize namwe amabwiriza nahaye Kiliziya zo mu Bugalati.

²Ku munsi wa mbere ukurikira isabato, ari ho ku cyumweru, buri wese ajye azigama icyo yashoboye gusagura, ku buryo mutazarindira igihe nzazira ngo mwegeranye amaturo.

³Ubwo ningera iwanyu nzohereza abo muzaba mwihitiyemo, bajyane amabaruwa n’amaturo yanyu i Yeruzalemu.

⁴Nibiba ngombwa ko nanjye njyayo, tuzafatanya urugendo.

⁵Nzaza iwanyu maze kwambukiranya Masedoniya, kuko nzayinyuramo gusa.

⁶Birashoboka ko nzatinda iwanyu, ndetse nkahaguma itumba ryose, kugira ngo munshakire uburyo bwo gukomeza urugendo rwanjye.

⁷Sinshaka noneho kubakubita urubandu, ahubwo nizeye kuzagumana namwe umwanya uringaniye, Nyagasani nabinyemerera.

⁸Icyakora nzaguma Efezi kugeza kuri Pentekositi,

⁹kuko umurimo wanjye wahugururiwe amarembo magari, n’ubwo hari abantambamiye benshi.

¹⁰Niba Timote aramutse aje iwanyu, muramenye ntazagire icyo abishishaho, kuko dufatanyije gukorera Nyagasani.

¹¹Ntihazagire rero umusuzugura[75]. Ahubwo muzamufashe mu rugendo rwe, ngo angarukire amahoro; ndamutegereje hamwe n’abandi bavandimwe.

¹²Naho umuvandimwe wacu Apolo, namusabye nkomeje ngo azane n’abandi bavandimwe iwanyu, ariko yabaye abyanze muri iki gihe, ngo azaza nabona umwanya umutunganiye.

¹³Murabe maso rero, mukomere mu kwemera, mube abagabo, mube intwari;

¹⁴ibyanyu byose mubikorane urukundo.

¹⁵Indi nama nabungura, bavandimwe, ni ukutibagirwa ko Sitefana n’urugo rwe babaye uburiza muri Akaya, bakaba baritangiye rwose abatagatifujwe.

¹⁶Nimushobokere abantu nk’abo, kimwe n’abandi bose bafatanyije imirimo n’imiruho.

¹⁷Nanyuzwe n’uko Sitefana, Forutunati, na Akayikusi baje kunsura; barahababereye rwose.

¹⁸Batwuruye umutima, ari jye, ari namwe. Mujye mumenya gushimira bene abo bantu.

¹⁹Kiliziya zo muri Aziya zirabaramutsa. Akwila na Purisika barabatashya cyane muri Nyagasani, hamwe na Kiliziya ikoranira iwabo.

²⁰Abavandimwe bose barabatashya. Namwe rero muramukanye mwese, mu muhoberano mutagatifu.

²¹Iyi ndamutso ni jye uyiyandikiye[76], jyewe Pawulo.

²²Niba hari udakunda Nyagasani, uwo arakaba ikivume. Marana ta[77]! Ngwino, Nyagasani!

²³Ineza ya Nyagasani Yezu Kristu ihorane namwe.

²⁴Ni jye, ubakundira mwese muri Kristu Yezu.