Read kinyarwanda Abanyakorinti, iya 1 3 Bible Online

Abanyakorinti, iya 1 3 - kinyarwanda bible

Abanyakorinti, iya 1 3

¹Bavandimwe, sinashoboye kuvugana namwe nk’ubwira abantu bayoborwa na Roho w’Imana, ahubwo nababwiye nk’uvugana n’abantu bakigengwa na kamere yabo gusa, mbese nk’abakiri ibitambambuga muri Kristu.

²Nabatungishije amata, sinabagaburira ibyo kurya bikomeye, kuko mutari kubibasha. Ndetse n’ubu ntimurabibasha,

³kuko mukiri ab’iyi si. None se ko mukirangwa n’ishyari n’amakimbirane, ibyo ntibigaragaza ko mukiri ab’iyi si, mukaba mwitwaye bya runtu?

⁴Iyo umwe avuga ati «Ndi uwa Pawulo», undi ati «Ndi uwa Apolo», ubwo se ntimukurikiza amatwara ya runtu?

⁵Ngaho nimumbwire: Apolo ni iki? Pawulo ni iki? Si abagaragu[13] babagejeje ku kwemera; buri wese akoresheje ingabire yahawe na Nyagasani!

⁶Jyewe nateye imbuto, Apolo arayuhira, ariko Imana yonyine ni yo yayikujije.

⁷Bityo, uwateye nta cyo ari cyo, n’uwuhiye ni uko; Imana yonyine irihagije, yo itanga gukura.

⁸Nyir’ukubiba na nyir’ukuhira nta ho bataniye; buri wese azahabwa igihembo gihwanye n’umurimo yakoze.

⁹Twembi turi abafasha b’Imana, mwe mukaba umurima wayo n’inzu yiyubakira.

¹⁰Ku bw’ingabire nahawe n’Imana, nashije ikibanza nk’umufundi w’umuhanga, undi acyubakamo. Nyamara buri wese yitondere uburyo yubaka.

¹¹Nta kindi kibanza kindi gishobora guhangwa, usibye igisanzwe: Yezu Kristu.

¹²Niba rero kuri icyo kibanza umuntu yubakishijemo zahabu, feza, amabuye y’agaciro, ibiti, ibyatsi cyangwa ibikenyeri,

¹³umurimo wa buri wese uzagaragazwa ku munsi w’urubanza. Ni bwo byose bizasuzumwa n’umuriro[14], ari wo uzatangaza agaciro k’umurimo wa buri wese.

¹⁴Uzaba yarubatse muri icyo kibanza kandi umurimo we ugahonoka, azahembwa.

¹⁵Naho nyir’umurimo uzaba wakongotse, azabura igihembo; gukira we azakira, ariko nk’uwiyatse umuriro.

¹⁶Ubwo se ntimuzi ko muri ingoro y’Imana[15], kandi ko Roho w’Imana abatuyemo?

¹⁷Nihagira rero usenya ingoro y’Imana, Imana na we izamusenya. Kuko ingoro y’Imana ari ntagatifu, kandi iyo ngoro ni mwebwe.

¹⁸Ntihakagire uwihenda: niba hari uwikekaho kuba umuhanga ku bw’iyi si, nabanze yihindure umusazi kugira ngo abe umunyabwenge nyakuri;

¹⁹kuko ubuhanga bw’iyi si ari ubusazi mu maso y’Imana, nk’uko byanditswe ngo «Ni Yo ifatira abanyabwenge mu mutego w’uburiganya bwabo[16]»,

²⁰kandi ngo «Nyagasani acengera ibitekerezo by’abahanga, agasanga byose ari amanjwe[17].»

²¹Ku bw’iyo mpamvu rero, ntihakagire ushingira ikuzo rye ku bantu, kuko byose ari ibyanyu:

²²yaba Pawulo, yaba Apolo cyangwa Kefasi, yaba isi, bwaba ubugingo cyangwa urupfu, byaba ibiriho cyangwa ibizaza, byose ni ibyanyu,

²³naho mwebwe muri aba Kristu, na We Kristu akaba uw’Imana.