Read kinyarwanda Abanyakorinti, iya 1 4 Bible Online

Abanyakorinti, iya 1 4 - kinyarwanda bible

Abanyakorinti, iya 1 4

¹Buri wese rero natubonemo abagaragu ba Kristu n’abagabuzi b’amabanga y’Imana[18].

²Kandi icyo abagabuzi batezweho si ikindi kindi atari ukuba indahemuka.

³Jyeweho, sintewe inkeke n’uko mwancira urubanza, cyangwa ko narucirwa n’urukiko rw’abantu, ndetse nanjye ubwanjye sindwicira.

⁴Nyamara n’ubwo nta kibi niyumva mu mutima, ibyo si byo bingira umwere; Nyagasani wenyine ni we uncira urubanza.

⁵Namwe rero ntimugace imanza igihe kitaragera, mutegereze ko Nyagasani azaza, agashyira ahabona ibihishwe mu mwijima, akanatangaza ibyo umutima ubundikiye. Ubwo ni bwo Imana izaha buri wese ishimwe rimukwiye.

⁶Muri ibyo byose, bavandimwe, nifuje ko tubabera urugero, ari jyewe, ari n’Apolo, kugira ngo mwitoze kutirata murwanirira ishyaka uyu cyangwa uriya.

⁷Mu by’ukuri, ni iki kigusumbije abandi? Ni iki utunze, waba utahawe? Niba se waragihawe, ni iki cyatuma wirata nk’aho utagihawe?

⁸Dore muratengamaye! Dore mwarikungahaje! Yewe mwabaye abami[19], twe tutarimo. Ubonye mwakwimitswe, kugira ngo natwe twimikanwe namwe!

⁹Jye uko mbibona, twebwe intumwa, Imana isa n’iyadushyize inyuma y’abandi, nk’abaciriwe urwo gupfa; koko rero twahinduwe agashungero k’isi, n’ak’abamalayika n’abantu.

¹⁰Twebweho turi abasazi ku mpamvu ya Kristu, naho mwe mukaba abanyabwenge muri Kristu; twebwe turi abanyantege nke, naho mwe murakomeye; murubashywe, naho twe turasuzuguritse.

¹¹Kugeza magingo aya, turicwa n’inzara, dufite inyota, twambaye ubusa, turakubitwa, turabuyerezwa,

¹²kandi turacogozwa no gukoresha amaboko yacu. Baradutuka tukabifuriza umugisha; baradutoteza tukihangana;

¹³baradusebya twe tugahoza abandi! Twahinduwe nk’icyavu cy’isi, kugeza na n’ubu batugize ibicibwa mu bantu.

¹⁴Ibyo simbyandikiye kubakoza isoni, ahubwo ni ukubaburira nk’abana banjye nkunda.

¹⁵N’aho mwagira ibihumbi n’ibihumbi by’abarezi muri Kristu, ababyeyi banyu si benshi, kuko ari jyewe wabibyariye muri Yezu Kristu ku bw’Inkuru Nziza.

¹⁶Ndabinginze rero, nimukurikize urugero[20] nabahaye.

¹⁷Ni na yo mpamvu mboherereje Timote[21], umwana wanjye nkunda kandi indahemuka muri Nyagasani; azabibutsa imibereho yanjye muri Kristu, mbese nk’uko mbyigisha muri za kiliziya zose.

¹⁸Bamwe muri mwe bibwiye ko ntazagaruka iwanyu, batangira kwitera hejuru.

¹⁹Nyamara, Nyagasani nabishaka, nzabagarukamo vuba, maze aho kwibanda ku magambo y’abo birasi, nzirebere ibikorwa byabo.

²⁰Kuko Ubwami bw’Imana atari amagambo, ahubwo bushingiye ku bikorwa.

²¹Mbese icyo mwahitamo ni iki? Ko nabazanamo inkoni, cyangwa se urukundo n’umutima ugwa neza?