Read kinyarwanda Abanyakorinti, iya 1 8 Bible Online

Abanyakorinti, iya 1 8 - kinyarwanda bible

Abanyakorinti, iya 1 8

¹Ku byerekeye inyama zatuwe ibigirwamana[38] ni koko: twese tubifitemo ubujijuke (nk’uko mubivuga). Nyamara ubumenyi butera kwirata, naho urukundo rukajijura.

²Niba hari uwibwira ko hari icyo azi, ntarageza aho kumenya uko bikwiye.

³Ariko niba hari ukunda Imana, uwo nguwo azwi n’Imana.

⁴None se byaba byemewe kurya inyama zatuwe ibigirwamana? Tuzi ko nta kigirwamana kibaho ku isi, kandi ko nta yindi mana iriho, usibye Imana imwe rukumbi.

⁵Koko, n’ubwo hariho ibyitwa imana byinshi mu ijuru no ku isi — koko kandi ibigirwamana n’ibikomerezwa ntibibarika! —

⁶kuri twe habaho Imana imwe, ari yo Mubyeyi, byose biturukaho, ari na Yo tugana; hakabaho na Nyagasani umwe, Yezu Kristu, ari We ubeshaho byose, natwe tukabeshwaho na We.

⁷Ariko bose si ko babifitemo ubujijuke. Hariho bamwe bakiva mu by’ibigirwamana, maze baba bariye inyama zabituwe, umutimanama wabo udakomeye ukabemeza ko bahumanye.

⁸Mu by’ukuri si ibiribwa bizatugeza ku Mana; tubiriye, tutabiriye, nta cyo tuzaba duhombye cyangwa twungutse.

⁹Cyakora mwitondere ubwo burenganzira mubifitemo, ngo hato butagusha abanyantege nke.

¹⁰Koko se umunyantege nke aramutse akubonye urira mu ngoro y’ibigirwamana, kandi witwa ko ujijutse, ntiyaboneraho akarya izo nyama zatuwe ibigirwamana, kandi umutima we utabimwemerera?

¹¹Bityo rero ubujijuke bwawe buzaba bugushije umunyantege nke, kandi ari umuvandimwe Kristu yapfiriye.

¹²Muri uko gucumurira abavandimwe banyu mubakomeretsa ku mutima usanzwe udakomeye, ubwo ni Kristu muba mucumuriye.

¹³Kubera iyo mpamvu, niba ibyo kurya bigusha umuvandimwe wanjye, nzazinukwa inyama burundu, aho kugusha umuvandimwe wanjye.