Read kinyarwanda Abanyakorinti, iya 2 1 Bible Online

Abanyakorinti, iya 2 1 - kinyarwanda bible

Abanyakorinti, iya 2 1

¹Jyewe Pawulo, intumwa ya Kristu Yezu, uko Imana yabishatse, n’umuvandimwe wacu Timote[1], kuri Kiliziya iri i Korinti, no ku batagatifujwe bose muri Akaya[2]:

²tubifurije ineza n’amahoro biva ku Mana, Umubyeyi wacu no kuri Nyagasani Yezu Kristu.

³Haragasingizwa Imana, Se w’Umwami wacu Yezu Kristu, Umubyeyi w’impuhwe zose kandi utanga ihumure ryuzuye.

⁴Ni yo iduhumuriza mu magorwa yacu yose ikaduha natwe guhumuriza abashavuye bose, tubagezaho ihumure twiherewe n’Imana.

⁵Nk’uko twahawe gusangira na Kristu imibabaro ye yose, ni na ko yadusenderejeho ihumure rishyitse muri We.

⁶Mbese amagorwa turimo, si yo ababyarira guhumurizwa no kurokoka? Kandi se iyo duhumurijwe, si byo bibabyarira kwihanganira imibabaro dusangiye, maze mukagira ituze?

⁷Turabizeye bihagije: kuba dusangiye imibabaro, bizatuma dusangira n’ihumurizwa.

⁸Koko, bavandimwe, ntitwabahisha akaga[3] twagiriye muri Aziya; twakutse umutima birenze imivugire, tugeza n’aho twiheba nk’abagiye gupfa.

⁹Koko twari tumeze nk’abaciriwe urwo gupfa, ku buryo amizero yari yadushizemo, dusigaye twiringiye Imana gusa, Yo izura abapfuye.

¹⁰Ni Yo koko yatwaruye mu nzara z’urupfu, kandi izahora irutwaruramo. Twizeye rwose ko nta na rimwe izigera idutererana.

¹¹N’amasengesho yanyu azabidufashamo, bityo umukiro wacu tuzawukeshe gusabirwa na benshi, maze twese hamwe tuzafatanye gushimira Imana ubwo buntu izatugirira.

¹²Dore ishema ryacu aho rishingiye: ni uko umutimanama wacu utwizeza ko twabayeho kuri iyi si, cyane cyane muri mwe, mu bwiyoroshye no mu butaryarya biva ku Mana, tudakurikije ubwenge bw’abantu, ahubwo tuyobowe n’ineza y’Imana.

¹³Ntimukeke kandi ko mu mabaruwa yacu, tubandikira ibiciye ukubiri[4] n’ibyo musoma kandi muhita mwumva; nizeye ko noneho muzatwumva neza,

¹⁴kuko kugeza ubu mwatwumvise amahushuka. Muzasanga ku munsi wa Nyagasani mutwishimira, nk’uko natwe tuzabishimira.

¹⁵Nari nizeye kubanza kunyura iwanyu, ngo mwongere mwishime;

¹⁶noneho ngahaguruka iwanyu njya muri Masedoniya, ndetse nkongera kugaruka iwanyu, ngo muntegurire urugendo rwanjye rwo muri Yudeya.

¹⁷Mbese uwo mugambi nawufashe nsa n’ukina[5]? Cyangwa se imigambi yanjye irasa n’idafashe, nk’umuntu wemeye atemeye?

¹⁸Imana irandeba: ibyo nababwiye sinari ngambiriye guhita mbihindagura.

¹⁹Koko rero, Umwana w’Imana, Kristu Yezu, twamamaje iwanyu, jyewe, Silivani[6] na Timote, si uko ateye. Ntiyabaye icyarimwe «yego» na «oya», yabaye «yego» gusa!

²⁰Ku buryo amasezerano yose y’Imana yabaye muri we «yego», natwe tugakurizaho gukuza Imana, tuvuga tuti «Amen».

²¹Ni Yo ubwayo idukomeza muri Kristu, ikadutorera kuba abayo,

²²idushyiramo ikimenyetso cyayo, ikaduha no gutunga Roho wayo mu mitima yacu kugira ngo atubere ingwate y’ibyiza yatugeneye.

²³Imana imbeshaho ni Yo ntanzeho umugabo: nirinze kugaruka iwanyu i Korinti ngo ntabatera ibibazo.

²⁴Nta bwo dushaka kubagora mu byerekeye ukwemera, kuko ukwemera kwanyu kutajegajega, ahubwo turabafasha ngo muhimbarwe.