Read kinyarwanda Abanyakorinti, iya 2 11 Bible Online

Abanyakorinti, iya 2 11 - kinyarwanda bible

Abanyakorinti, iya 2 11

¹Icyampa ngo mushobore kwihanganira ubusazi bwanjye ho gato! Ngaho se nimunyihanganire!

²Mbakunda byansajije, nk’uko Imana ibakunda. Nabashyingiye umukwe umwe rukumbi, mbashyikiriza Kristu muri nk’umugeni w’isugi.

³Nyamara, nk’uko Eva yaguye mu mutego w’inzoka, ndatinya ko namwe, imitima yanyu izahuma mugateshuka ku bupfura mukwiriye kugirira Kristu.

⁴Dore nawe, uwadutse wese abamenyesha undi Yezu utari uwo twabigishije, cyangwa se akabarohamo umwuka wundi utari Mwuka w'Imana mwahawe, cyangwa se akabazanira indi nkuru nziza itari Iyo twabashyikirije, uwo muntu mumutega yombi.

⁵Ndibwira ko izo ntumwa z’akataraboneka nta cyo zindusha.

⁶Ndi umuswa koko mu byo kuvuga neza, nyamara sindi we mu by’ubuhanga. Ibyo twabibagaragarije muri byose no ku buryo bwose.

⁷Ubwo se cyabaye icyaha cyo kubicishaho bugufi, mbamamariza Inkuru Nziza y’Imana ku buntu, kugira ngo mbaheshe agaciro?

⁸Nacuje za Kiliziya z’ahandi, nemera gutungwa na zo ngo mbone uko mbakorera.

⁹Iyo nagiraga icyo nkenera ndi iwanyu, nta we nigeze ndushya, kuko ibyo nari mbuze nabihabwaga n’abavandimwe baturutse muri Masedoniya. Iteka ryose nirinze kubagora, kandi nzakomeza kubyirinda.

¹⁰Mbarahirije ukuri kwa Kristu undimo, nta we uzanyaga iryo shema mu turere twose two muri Akaya.

¹¹Kuki se? Kuko se ntabakunda? Imana ni Yo ibizi!

¹²Nzakomeza uko nsanzwe ngenza, kugira ngo ndaha urwaho abarunshakaho, babure impamvu yo kwirata ko duhwanyije agaciro.

¹³Bene abo bantu ni ingirwantumwa[35], ni abahendanyi biyoberanyamo intumwa za Kristu.

¹⁴Ibyo kandi ntibitangaje : Sekibi na yo yihinduramo umumalayika w’urumuri.

¹⁵Nta gitangaje rero ko abagaragu bayo bihinduramo abaharanira ubutungane. Nyamara amaherezo yabo ni ukugarukwa n’ibyo bakoze.

¹⁶Nongere mbisubiremo, ntihakagire ukeka ko ndi umusazi, cyangwa se nimunyemerere kuba we maze nanjye nshobore kwirataho gato[36].

¹⁷Ibyo ngiye kuvuga, simbibwirijwe na Nyagasani, ahubwo mu bisazi byanjye nishimiye kugira icyo niratana.

¹⁸Ubwo benshi biratana ibyo bakesha kamere, reka nanjye nirate.

¹⁹Mwebwe muzwiho ubwitonzi, mwihanganira abasazi nta ngorane!

²⁰Mwihanganira ko babagira abacakara, ko babaryana utwanyu, ko babacuza, ko babishongoraho, ko babakubita mu maso.

²¹Mfite isoni zo kubabwira ko twagize intege nke nka bo! Ibyo abandi batinyutse kwivuga — noneho mvuge nk’umusazi — nanjye ndabitinyutse.

²²Mbese ni Abahebureyi? Nanjye ndi we! Ni Abayisraheli? Nanjye ndi we! Inkomoko ya Abrahamu? Nanjye ndi yo!

²³Mbese bakorera Kristu? — Reka mvuge amateshwa — Ndabarusha bose! Mu miruho? Narabarushije! Mu buroko? Incuro nyinshi kubarusha! Inkoni? Nakubiswe izitabarika! Amakuba y’urupfu? Nayagize hato na hato!

²⁴Incuro eshanu Abayisraheli bankubise ibiboko mirongo itatu n’icyenda[37].

²⁵Nakubiswe inkoni incuro eshatu, rimwe mpondaguzwa amabuye, ndohama gatatu mu mazi, ndetse mara ijoro n’umunsi rwagati mu nyanja.

²⁶Mu ngendo zanjye nyinshi nagiriye amakuba mu nzuzi, mpura n’abambuzi, ngira akaga k’abo dusangiye ubwoko n’ako ntewe n’abanyamahanga, ngirira ingorane mu mugi, mu butayu no mu nyanja, nkubitiraho imitego y’abagambanyi biyita abavandimwe!

²⁷Mu miruho n’iminaniro, mu kurara irondo kenshi, mu nzara n’inyota, mu gusiba kurya kenshi, mu kwicwa n’imbeho no kubura icyo nambara;

²⁸ntavuze n’ibisigaye: inkeke ya buri munsi mpagaritswe umutima na za Kiliziya zose!

²⁹Ni nde wacogoye, sincike intege? Ni nde wateshutse, maze simpinde umushyitsi?

³⁰Niba kwirata ari ngombwa, nziratana intege nke zanjye.

³¹Imana, Se wa Nyagasani Yezu, yogahora isingizwa iteka, izi ko ntabeshya.

³²I Damasi, igisonga cy’Umwami Areta cyarindishije umugi ngo bamfate.

³³Nuko bancisha mu idirishya, bamanurira ku rukuta mu gitebo, murokoka ntyo.