Read kinyarwanda Abanyakorinti, iya 2 13 Bible Online

Abanyakorinti, iya 2 13 - kinyarwanda bible

Abanyakorinti, iya 2 13

¹Ubu ni ubwa gatatu ngiye kuza iwanyu. (Nk’uko Ibyanditswe bibivuga) «Urubanza rwose ruzasozwa ari uko rukemuwe n’abagabo babiri cyangwa batatu[40]».

²Narabivuze ubwo nabasuraga bwa kabiri, n’ubu nkiri kure nongeye kubisubiramo, abaherutse gucumura n’abandi bose, ko nindamuka nje, nta mpuhwe nzabagirira,

³kuko ngo mushaka ikimenyetso cy’uko ari Kristu umvugiramo. Kristu si inganzwa kuri mwe, ahubwo azabagaragariza ububasha bwe.

⁴Ni koko yabambwe ku musaraba bishingiye ku ntege nke ze, ariko ubu ni muzima bishingiye ku bubasha bw’Imana. Natwe kandi muri We turi abanyantege nke, ariko nk’uko muzabyibonera, tuzabana na We ku bw’ububasha bw’Imana buzabagaragarizwa.

⁵Nimwisuzume ubwanyu, mwigerageze, murebe ko mutacogoye mu kwemera. Mwaba se mwariyibagije ko Kristu abatuyemo nyirizina? Keretse rero, musanze mwaratsinzwe[41]!

⁶Nizeye ko mudashidikanya ko twe twatsinze.

⁷Turasaba Imana ngo mutazavaho mukora nabi. Icyo tugamije si ukugaragaza ko mwatsinzwe n’igeragezwa, ahubwo ni uko twababona mukora neza, maze tukaba ari twe twibeshya.

⁸Nta ntege dufite zo kurwanya ukuri, ahubwo tuzifitiye kugushyigikira.

⁹Duhora twishimye iyo twe ducogoye ariko mwe mukaba mukomeye. Impamvu y’amasengesho yacu ni uko mwatera imbere.

¹⁰Ni cyo gitumye mbandikiye nkiri kure, ngo ntazazanwa no guca urubanza, nkoresheje ububasha Nyagasani yampereye kubakomeza aho kubacogoza.

¹¹Ahasigaye rero, bavandimwe, muhorane ibyishimo, mutere imbere, muterana inkunga, mushyire hamwe, mubane mu ituze, bityo Imana yuje urukundo n’amahoro izabana namwe.

¹²Muramukanye mu muhoberano mutagatifu. Abatagatifujwe bose b’ino barabaramutsa.

¹³Ineza y’Umwami wacu Yezu Kristu, n’urukundo rw’Imana Data, n’ubusabane kuri Roho Mutagatifu, bihorane namwe mwese.