Read kinyarwanda Abanyakorinti, iya 2 6 Bible Online

Abanyakorinti, iya 2 6 - kinyarwanda bible

Abanyakorinti, iya 2 6

¹Ubwo turi abafasha b’Imana, turabashishikariza kudapfusha ubusa ubuntu bwayo.

²Kuko ubwayo yivugira iti «Mu gihe gikwiye, numvise isengesho ryawe; no ku munsi w’uburokorwe, naragutabaye[22].» Ngiki rero koko igihe gikwiye; nguyu koko umunsi w’uburokorwe[23].

³Nta we rero dushaka guhungabanya, kugira ngo ubutumwa bwacu butagira amakemwa.

⁴Ahubwo twihatira kugaragaza muri byose ko turi abagaragu b’Imana, turihangana bihagije, ari mu magorwa, mu mage no mu ishavu,

⁵ari mu ikubitwa, mu buroko no mu midugararo, ari mu minaniro, mu kutagoheka no mu isonza;

⁶tukitabaza ubuziranenge n’ubuhanga, ubwiyumanganye n’ubugwaneza, muri Roho Mutagatifu; dukoresha urukundo rutaryarya,

⁷ijambo ry’ukuri n’ububasha bw’Imana; turwanisha intwaro z’ubutungane, zo mu kuboko kw’iburyo n’ibumoso.

⁸Rimwe turubahwa, ubundi tugasuzugurwa; baradusebya, ubundi bakadushimagiza. Batwita ababeshyi, kandi tuvugisha ukuri.

⁹Dusa nk’intamenyekana, kandi tuzwi neza. Dufatwa nk’indembe, kandi turi bazima. Baraduhana, ariko ntibageze aho kutwica.

¹⁰Turashavuzwa, nyamara duhora twishimye. Turi abakene, nyamara dukungahaza benshi. Batugize abinazi, kandi ari twe dutunze byose!

¹¹Bavandimwe b’i Korinti, twababwiye ukuri kose, tubaranguriza umutima wacu.

¹²Muwufitemo umwanya mugari: uwanyu ubanza ari wo ufunganye!

¹³Nimutwishyure rwose, ndababwira nk’abana banjye: nimutwugururire namwe umutima wanyu!

¹⁴Ntimukagirane urunana rw’insumbane n’abatemera! Mbese ubutungane hari isano bugirana n’ubukozi bw’ibibi? Urumuri rwabangikana rute n’umwijima?

¹⁵Kristu na Beliyari bakumvikana bate? Uwemera n’utemera bahuriye he[24]?

¹⁶Mbese ingoro y’Imana yasangirwa ite n’ibigirwamana? Erega, ni twe ngoro y’Imana Nzima, nk’uko ubwayo ibyivugira iti «Nzatura muri bo, nzatambagire rwagati muri bo, maze nzabe Imana yabo, na bo bazambere umuryango.

¹⁷Nimuve muri abo bantu, mwitandukanye na bo, uwo ari Nyagasani ubivuga. Mwirinde gukora ku cyabahumanya, maze ubwanjye nzabakire.

¹⁸Nzababera umubyeyi, namwe mumbere abahungu n’abakobwa, uwo ni Nyagasani ubivuze[25].»